Mitbenh Thlen A Hau

A rel rih lomi caah:

Topic: Mitbenh Thlen Hau
———————————-
Mirum taktak pakhat zeizong vialte ah tlamtlingmi a rak um. Asinain a “Mit” hmuhnak leiah thazaang a der. Doctor” pakhat sinah a va kal i a chimhmi cu, “Na mit damnak ding caah a hringmi zawng lawnglawng zoh law na dam ko lai” tiah a ti. Cucaah mirum pa cu inn a lawi bak in a ummnak inn vialte cu a zapi in a hringmi zawng lawngte in a tuh dih. Cucaah cu a hringmi lawnglawng hmun ahcun khua a sa.

Doctor pa cu mirum pa sinah len ding le a mit va zoh dingah a kal. Mirumpa innka (Gate) hngakmi nih Doctor pa cu a thil vialte cu a hringmi in an thlen dih lawngah mirum pa inn ahcun an luhter. Doctor pa cu a lau tuk. Mirumpa a va ton tikah Doctor pa nih cun zeiruangah dah na inn cu a zapi cun a hringmi cu na thuh dih. Cun, keimah zong thil hring lawng hrukter i ton a si fawn” tiah a hal tikah Mirum pa nih Doctor pa cu, “Nangmah nih pei a hringmi lawnglawng zoh law na dam ko lai na ka ti kha, cucaah ka hmuhmi poahpoah hi hring dih seh tiah ka tuah” tiah a leh.

Doctor pa nih a lehmi cu, “Na inn vialte le na hmuh ding vialte poah a hring in na thlen dih nak in, nangmah nih naa hrukmi “Mit-benh” tu hi a hringmi zawng in thleng law, khawika na kal hmanh ah na hmuhmi vialte pei an hring dih ko lai cu “ tiah a leh.

Hi tuanbia hin thazaang la ti hna usih ti ka duhmi cu, “Kan thinlung damnak dingah midang lawng thlenter kan duh i, kanmah i thlen ve kan herh hi kan i philh tawn. Kanmah kan hmuhning le lungput kan i thlen i, midang kan hmuhning hna a that poah ahcun thinlung dam tein nun khawh a si” ti hi chim ka duh. Jesuh nih, “Na mit chung i a ummi thingtan kha ruat tung loin zeicahdah na unau mit chung i a ummi mithnawmte kha na zoh? Na mit chung i thingtan a um ko buin zeitindah na unau cu, ‘Na mit hnawm cu in coihpiak ning,’ na ti ngam? Midepdepa, na mit chung i thingtan kha chuah hmasa law pei, na unau mithnawm cu fiang tein na hmuh lai i na coihpiak khawh lai cu!”(Matt.7:3-5) a kan ti.
Pathian nih fiannak kan pek ko seh. By Sang Uk Cung.

 

Be the first to comment

Leave a Reply

Your email address will not be published.


*