MITTHLI HE THANTLANG KA CHUAHTAAK!
=======
Nihin 19 September, 2022 ni hi mitthli he Thantlang kan chuahtaaknak kumkhat atling ruangmang. Kannun himnak dingah khawzeidah kan panh lai tiah September thla chung hi kan i saisaek lingcing, lule lam hngal loin vantek tlakhnawh bang Thantlang khua cu libang ai hninh thla asi.
Zeimaw kan sual e sunghno anu le semmawng rual, Kanruninn le chumtual chuahtaak, Zeizawnpanh lai hngal ri lo, Khuachuah hauhnar kan liam ni ahcun, Vuichip marau zong nih tuar ve mang rua” tiah hla maw asi bia dek ka kaa in ahung chuakmi biafang ka vun thil chih.
1 Febuary, 2021 ni zingka te ah SAC nih State Emergency apuan. Nawlngeihnak an laakmi thawng asi. 7 Febuary, 2021 ni in duhlonak lamzawh an thok ban tukin Thantlang zong cu boruak nih cun avun kah ve. Ngakchia mino he, upa he, pastorte he nichiar duhlonak lam zawh arak si. Lamzawhnak achan, mihthenkhat cu an i fiang lai nain mino thenkhat cu ifian dawh an si lem lo.
Caan zeimawzat ahung liam. Azual deuh deuh. Acozah riantuanmi hna zong nan rian chuahtaak uh. CDM nan tuah dih lai tiah tiah an ti hna. Mithenkhat cu an chushtaak taktak. Mithenkhat cu pawcawmnak ruah ah achuahtaak ngamlomi zong an um ve thiam thiam.
Cu ticun caan ahung kal i tlangthluan kip in irunvennak bu an ser. Idornak hmun kan siam ah atha an ti. Facang, chitile aherhmi dangdang cawknak dingah tangka zong an rak kan khawlh cio. Khathil vialte kha atu ah hman awk tlakin atu tiang a hmun hnga dek maw tiah ka ruat tawn.
Kan nih chung hi kanmah inn te ah eidin dawr kan tuah. Dum le hau tuahbu in athudirmi kan si lioah, kaninn hmai i kan dirter mi kan motor cu bomb in an hun kan cheh piak. Zeiruangahdah asi hnga tiah nihin nihinni tiang ka fiang lo. Nilininga hrawng arauh ah khin Dr. HmuhThang inn acoka lei cu bomb in an cheh than i zeimawzat arawk. Midamlo mi kan caah Clinic atuah i mizaw mi paoh nih amah kan fuh, kanpanh. Zeibantuk ruahchannak he dah hithil hi acan hnga? Aho nih dah afial hna hnga? tihi nihin ni tiang ka fiang lo.
Thantlang khua ah kum 42 ka khuasaknak asi caah zeibantuk thil hmanh tlung ai kun, kachuah taak lai lo tiah kai sehchih mi asi. Asinain ka ruahmi vialte cu apelh dih. Aruangcu:
18September, 2021 ni zanlei sangah avawihnihnak ahung kaang. Innkaangmi phalh awkah minung zeimawzat kal an tiim. Bomb le meithal thawng adai lo. Tuksapur in athawng athang. Culio ah PastorBiak Kolh akal ve. Ahmunan phak hlan ah anunnak aliam e an ti. Kanchuak ngam lo. Ahimdeuhnak hmun kan timi ah kan i thup. Aruak an lawipi cang an ti nain ruakhumh ah kan kak ngam hlei lo. Aharko tihlei in chim ding a um lo.
Athai zingka te ah Hakha lei in Pastor te ruakvui ah an ra e an ti. Thantlang Pastor zeimawzat cu an um ti rua lo. Zinglei 8:30 hrs ah aruak an vui in ka hngalh. Ruakvuituan rak kirhlan in motor cungah an thilri an rak khin piak dih hna i an hung kirbak ah zaam dingin an i thawh colh.
Cu liote ahcun Pastor pakhat ara i hitin bia akan chimh. Kapa PaSang pa, ruakvuikhawh in kan nau le cu Hakha Pastor he kan ton hna le nithumchunah zaam dih uh, tiahan kan ti. Cucaah zeiti awk atha ne lo, zaamne ko kun hna usih mu tiah ahung kan chimh.
Umm. Kanzaam dih ahcun Thantlang ahim lai lo tiah ka timi kha atak in achuak ne lai mu ti lawng ka chim khawh. Motor cycle he motor he an chuak thluahmah. SangLian nu, thilna sanh khawhtawk sanh zokzok. Kannih motor kan remh hih ka ti. Tha athir, Lungacaw, Zeisetkan sanh hnga ti awk kan hngal lo. Kan vaivuan khim cang.
Zanlei sang kan hung phan.. Nuhmei pathum cu an puantom he kalnak hngal lo phurtu ngei lo in an vai. NuRem, NuBawi nu le Hlei Cuai nu an si. Motor cungah kai ko uh. Kanmah nih kan in thithruai ko hna lai ka ti.
Inntangah ka va tum. Kanthilri vialte ka va muai dih hnu ah thla ka cam. Inncungah ka hung kaithan. Kankheng le bel kan dawrthil vialte ka va muai than i thla ka cam than. Cuve bantukin ka fapahniang Tluang Za Hnin Thang zong nih thla acam ve Anu nih arak cam ve. Kanlung ummi vialte kha Bawipa sinah kan up ta dih. Cuticun innkhar tawh kan hrenh dih hnu ah motor cungah kan kai dih hna. Ahohmanh kan i chawn kho lo. Kan kal i hauka kan phan. Thlacamnak ka ngeih hnu ah kan khuallam kan peh.
Ka mipum akal nain kathinlung akal ve loKan runinn le kan chumtual nih an kaltaak ne mu tikha an hei hngal tung lai lo ka ti. Zeitonhme kan ton ti hlei in chim ding a um ti lo.
Lahva kan tan, vuichip kan chuak. Kan in check hna an ti. Kan ttum dih. Thantlang ahnubik ka hei cuan ta. Cucu adonghnak asi. Thlualam lei ah kan lan than. Thlualamahcun kan in check hna lai an ti than. Nuhmei nubawi nu le Hleicuai nu cu Thlualam ah kan tum ko lai an ti i kan chiahta hna. Kanlan thliahmah i zanlei sangpi ah Bungtlang kan phan.
Kan fale nih zanriah an rak kan chuan donh. Zankhatkan riak. Athaizing Mizoram panh in kan kal than. Sangauin kan fapa Hruaite nih motor pahnih in an kan don. Tipi kan phan. Katupa Hmunte le kafapa nih thil an cheek. Tilawng fate in kan thil cu an kan phurh. Amanpek ahau lo an kan ti. Ralzaampei nan si cu ankan ti. Kan i lawm taktak.
Motor cun Pangkhua lei ah kan kai. Anlam abi. Lam an remh lo. Akuarkap atam. Vuleicungkhual ka tlawnnak ah aharbik lam asi lai dah. Katupa Van Nun Thang ai tah sek.Ziah cuticun na ttah ka ti? Ahar tuk ati. Ziahan motor hi hiti rumro in cit ahar aka ti. Anlam atha lo ka ti. Lam cu zeidah asi? aka ti than. Pangkhua ksn phakin atha te lai tish ka leh.
Sangau kan phan. Kanfapa Hruaite inn ah Kafale NiSui te chung he an kan chiah. Home quarantine in zarhkhat kan um hnu ah Lawngtlai ah kan lan.
Lawngtlai khuasa kanfale nih inn an rak kan hlan piak. Aherhmi dangdang zong an damhkhan dih. Siaremtein an kan chiah colh. Ancungah kan i lawm tak tak. Sangaulei he Lawngtlai lei he kan fale le thawngin ralzaam dirhmun an kan theihter lo. Lawngtlai cu Lai Autonomous Distric Council asi bantukin Lai kan sinak te kha an kan tanh. YLA, VCPle Krifabu zong an tha ngai ngai.
Lawngtlai khua kan phak hnu ah thawngpang tha theih awk a um ti lo. Innkangh thawng thihloh thawng lawngte theih asi cang. Naninn akaang dih cang. Vutcaam ah acang dih cang ti ka theih ni cu” Taklawng in ka chuak i, taklawngin aka chiah than mu, Bawipa nangmah nawl si ko seh”” tiah ka kaa ka pau.
Atu ahcun kawlram mi zong kan si ti lo i Mizoram mi zong kan si fawn lo. Mitlau dirhmun in ralzaam ah kan i cang. Aharnak atampi. Identity document pakhat hmanh kan ngeih lo caah xeihmanh tuah khawh asi lo. Fale kuatchom in kan thudir. Cu laklai ahcun CDF caah tiin khawlhbur zong ahung um thiam thiam.TBC le JMBC lei nih cheuhra cheukhat cabawm aphan ve. Kan umnak Krifabu khawlhbur zong cu asi. Pekawk kan ngeih lo le ning azak. Azeizong vialte aiphua.
16 Sptember, 2022 ni The Lairam Times nih kumkhat tlinnak alanghter ning ahcun: Thantlang khua hi, 1.Inn 1800 lengkai asi. 2.Chungkhar 2200 lengkai an um. 3.Minung 10000 leng an um. 4.Ralzaam hnu ah nunnak aliammi 75 an si. 5.Ingkaangmi dihlak 1340 reng lo. 6.Zaamtaak khuazat: A. Mixoram ah khua 44, B. Ramchungah khua 94 an si tiah an langhter.
Thantlang kan chuahtaak nak kumkhat atling cang. Hmailei kong zeidah kan lawh lai timi cu chim chung awk ah ahar ngai rih lai. Hmuhning le pomning zong aikhat fawn cio lai lo.
Thantlang kan inn le lo, hmunle hma cio ahkhan, ahlan kan siningkel te hlam thannak ding ahcun ka kum le ka khua nih azo ti hnga maw, ti ruahbu in nihin cu caan ka hmang e. No Lal Ling Hlichal, Date 19/9/2022, Lawngtlai.
Leave a Reply