Model Thin Zaw Wint Kyaw Luat Khawhnak Ding Ah Ralhrang He Caihhmainak Kan Ngei

Model Thin Zaw Wint Kyaw Luat Khawh Nak Ding Ah SAC He Caihhmainak Kan Ngei – SSPP
=========
Model Thin Zaw Wint Kyaw Luat Khawh Nak Ding Ah SAC He Caihhmainak Kan Ngei – SSPP: Tlaih a tong mi lemcang thiam le model Thin Zar Wint Kyaw cu luatnak a hmuh khawh nakhnga SAC he caihhmainak kan ngei, tiah SSPP/SSA in chimphuannak nawlngeitu General Sai Bung Han nihin July 7 ah RFA ah a chim.

Thin Zar Wint Kyaw cu SSPP/SSA headquarters umnak Shan ram chaklei Wamhai ṭhanchonak ding ca ah zuk thlaknak a ngei i, dih hnu ah July 6 chunhnu ah khan Wamhai in Lashio a kir lei ah Shan ram chaklei KyaeTi(ကျေးသီး) le Shan ram thlanglei MaiRel(မိုင်းရယ်) peng ramri NamhLawng(နမ့်လောင်း) hleidonh ah SAC ralkap nih an tlaih, tiah SSPP nih a thanh.

Thin Zar Wint Kyaw lawng siloin amah ṭamhtu le pa pali, an dihlak minung 6 cu tlaih an si. Luatnak an hmuh khawh ṭhan nakhnga kaphnih in caihhmaiṭinak kan ngei, tiah general Sai Bung Han nih cun a chim. SAC ralkap lei ṭang in SAC ralkap thawng a thanhtu Han Ngein Oo nih amah telegram ah model Thin Zar Wint Kyaw nih SSPP thuam he aa thlakmi hmanthlak cu zamh in, tlaih ding a si tiah a langhter. Thin Zar Wint Kyaw tlaih a tonnak kong he pehtlai in SAC ralkap lei nih thawng thanhnak an tuahmi a um rih lo.

SSPP cu ramkulh le ram pumpi in remdaihnak ah min an thu nain, Nationwide Ceasefire Agreement(NCA) ah cun min thutnak an tuah lo. SSPP cu SAC ralkap nih sawmmi daihnak ding ca tonbiaruahnak ah tel ding in cazin petu tlangcung hriamtlai phu 10 chung ah aa telmi an si nain, nihin tiang ah SAC ralkap he tonbiaruahnak an ngei rih lo.

Union Election Commission(UEC) Hruaitu Le Chungtel Cheukhat Bia Ceih An Si! Union Election Commission(UEC) Hruaitu Le Chungtel Cheukhat Bia Ceih An Si!: NLD cozah lio i Union Election Commission (UEC) hruaitu U Hla Thein(ဦလှသိန်း) le commission chungtel 2 cu phungrelnak 130(a) in kum 3 cio thong tla ding in Naypyidaw thonginn biaceihzung ah nihin July 7 ah bia ceih an si, tiah biaceihzung rianṭuantu he naihniam in a um mi pakhat nih RFA ah a chim.

Biaceih a si mi 3 cu U Hla Thein, U Hla Hte(ဦးလှဌေး) le U Myint Naing(ဦးမြင့်နိုင်) an si i, 2021 November thla khan Naypyidaw thonginn ah hren an si. Thong chung biaceihzung ah biaceih beh an si i, atu i bia an ceih mi minung leng ah a dang an tlaih mi hna cu zeitin dah bia an ceih ve hna ti cu fiang in theih khawh a si rih lo.

Phungrelnak 130(a) hi dohkalh ah siseh, hlawt le hrial ahcun dantat ton khawhnak phung a si pinah kum 3 thong thlak khawh a si, tiah phunghram pi(Law) ah langhter a si. President U Win Myint, rampi ruahnak petu Aung San Suu Kyi le NLD central committee chungtel cheukhat zong phungrelnak 130(a) in dantat an si ve.

Election ah vote pek ning a felfai lo ti in Aung San Suu Kyi le NLD party chungtel 422 hna cu tlaih an si i, ramkulh le ramṭhen UEC hruaitu tel in chungtel 2489 cu dantat ding in timhtuahnak kan ngei, tiah SAC Election Commission nih tukum January thla ah khan an thanh.

A luancia 2020 Election kong he pehtlai in case 1077 a chuak i, case 546 cu zohfelnak tuah a si cang. Cu chung ah taza cuai mi case 342 a um i, case phih piak ṭhan mi 194 lakah pungrelnak he zohchihmi mi 10 an um, tiah SAC Election commission nih an thanh. 2020 Election kong he pehtlai in Febuary 1, 2021 ah SAC nih uknak an laak i, cu hnu ah an duh ning poh in phunghram an mersan i, hmalaknak an tuah.

Nihnih Chung Kahdohnak Ah SAC Ralkap 7 An Thi Tiah CDF-Matupi Nih An Thanh! : Chin ramkulh Matupi peng Lailenpi khua in Matupi lei ah ke in rallam a sialtu SAC ralkap le CDF-Matupi karlak kahdohnak voi 3 a chuak i, cu kahdohnak ah cun SAC ralkap 7 an thi i, hliamhma tuar mi zong an tam ngai, tiah CDF-Matupi nih cathanh an chuah.

A voikhatnak kahdohnak cu July 6, zinglei suimilam 9:00 hrawng in a si i, Ringkhan(ရဲန်ခဲန်း) khua le Ammilai(အမ်မိလိုင်း) khua karlak ah kahdohnak a rak chuak i, cu kahdohnak ah cun SAC ralkap 3 an thih lengah 2 faak ngai in hliamhma an tuar, tiah theih a si. Cu ni zaanlei ṭhiam ah cun kahdohnak a chuak ṭhan i SAC ralkap 2 an thi ṭhan, tiah theih a si. SAC ralkap lei nih cun, hliam tuar le a thi mi an tam caah Mizapi ralkap lehrulhnak ah Ringkhan(ရဲန်ခဲန်း) khua inn 3 cu an rak khanghpiak hna.

Cun, July 7 ah CNA, CDF-Matupi, CDF-Zotung phufonh le SAC ralkap hna cu Ammilai(အမ်မိလိုင်း) khua ah a voithumnak an i kap ṭhan i, cu kahdohnak ah cun SAC ralkap lei in 2 an thi ṭhan, 6 hliamhma an tuar tiah CDF-Matupi nih cathanh an chuah. Lailenpi in Matupi lei ah ke in a kal mi SAC ralkap hna cu Ammilai(အမ်မိလိုင်း) khua ah an um rih ko, tiah CDF-Matupi in ṭuanvo ngeitu pakhat nih a chim. SAC ralkap pawl cu 100 hrawng an si lai tiah zumh a si. Credit: The Chin Post

Be the first to comment

Leave a Reply

Your email address will not be published.


*