Mungzua Ralhrang Hriamnam Chiahnak Zungpi Cu Mei A Kang

Monywa North-Western Regional Military Command hriamnam chiahnak inn a kaang
➖➖➖➖➖➖➖➖➖➖➖➖➖➖➖
March 12, 2022

Sagaing ramthen, Monywa hrambunh North-Western Regional Military Command (အနောက်မြောက်တိုင်းစစ်ဌာနချုပ်) hriamnam chiahnak inn cu nihin zing lei ah puahkeh thawng a thang i a kaang tiah tualchung mi le tualchung PDF sin in kan theih.

March 12, zing suimilaam 9:11 ah North-Western Regional Military Command i hriamnam chiahnak inn cu a langhlat control mi bomb in voi 4 kan kah i a kaang tiah PDF thawnghram nih a chimnak in kan theih.
Source: Khit Thit Media

Credit. The Hakha Post

Relchap

Dinfel Theipar
——————-
Mirum pakhat cu phaisa hmuhnak duh ah Dawr nganpi (Supermarket) tuah dingin hmunhma a kawl lio ah a zal a thlau. Cu zal chungah a ummi phaisa tampi nakin a sian lomi cu a ID, bank card le a riantuannak ca vialte hna kha a si deuh. Cucaah cazual (newspaper) pakhat ah thanhnak a tuah i lungre thei ngai in a um. Caan sau a rauh hlanah tlangval note pakhat nih mirum pa sinah cun a zal cu a rak pek.
Mirum pa nih cun a zal chung a zoh i tlamtling tein a thilri a hmuh tikah aa lawm tuk i tlangval note cu, “Zeidah na duh bik kan tuah piak lai?” tiah a ti. Hi tlangval note hi sifakmi a si nain mifel Pathian a tihmi a si. Saduhthahnak a rak ngeihmi cu amah bantuk sianginn kai ah harsami hna caah sianginn man lo tein kainak tuah hi a rak si. A lehmi cu, “Phaisa fanghnih te in ka duh” tiah leh. Mirum pa nih cun, “Ziah cu phaisa fanghnih te lawng cu na duh?” tiah a hal tikah a lehmi cu, “Kei cu sifak tuk kan si le nangmah zal peknak hlatnak dingah phone chawnhnak dingah phaisa ka ngei lo i, a ba in phone kan chawnh caah cu phone man pek dingah ka duh ee” tiah a leh.
Mirum pa cu tlangval note lungput le sining a zoh tikah aa lawm tuk i, laksawng tampi a pek lawng siloin Supermarket tuah loin sifakmi vialte nih man lo tein fimnak an kai khawhnak dingah “Sianginn” a ser piak hna. Caan kal lengmang i tlangval note cu sainginn ahcun sayaci ah a cang.
Hi tuanbia hin thazaang lak ka duhmi cu Jesuh nih, “Dinnak kha rawltam tihal bantukin a tamhalmi cu mithluachuak an si, an lungtum an khen lai” (Matt. 5:6) tiah a ti. Hi tlangval note nih dinnak aa tleih tikah Pathian nih mirum pa hmang in laksawng tampi a hmuh lawng siloin a lungtum a khenter. Minung tampi cu Pathian kan tih loh, sifah kan tih tuk ruangah dinfelnak kha kan hlawt i, a theipar cu ningzahnak le chiatserhnak a si. Miphun a lianngantertu cu dinnak a si, sualnak cu zei miphun poah caah ningzahnak a si.(Phungthlukbia 14:34).
Pathian nih kan zapi caah thluachuahnak kan pek piak ko seh.
Rev. Sang Uk Cung
GS, CBA,Kalaymyo.

 

Be the first to comment

Leave a Reply

Your email address will not be published.


*