Myanmar Mizapi Kan In Tuarpi Hna Kan Si Khawhtawk In Bawmhchanh Kan I Zuam Lai Tiah CYMA President Nih Chim

Myanmar Mizapi Kan In Tuarpi Hna Kan Si Khawhtawk In Bawmhchanh Kan I Zuam Lai Tiah CYMA President Nih Chim

Ral ruang, ramkhel ruang ah harnak phunphun tongmi Myanmar mizapi nan ngaihchiatnak kan in hrawm pi hna ralzaam mi nan harsatnak cungah hmaikhahnak ngei lo in chim ulaw kan si khawhtawk in bawmhchanh ding timhcia kan si tiah Mizoram ramkulh Canter Young Mizo Association ( CYMA) President Pu R.Lalnghetea nih a chim.

Mizo mizapi nih nan tuarinnak kan in tuarpi hna, nan ngeihchun inn lo nan chuahtak i Mizoram ah harsa ngai dirhmun in nan rak phanh mi cungah lung cu a nuam hrim lo, nan harsatnak kan theihthiam, harsatnak nan ngeih cun phuhrunnak ngei lo in chim u, Central YMA nih kan in tuahpiak khawhmi hna cungah hnu kir kan i tim lo tiah ” CYMA President nih a chim.

Mizoram ramkulh um Hangzo Natural Park le Zo Friendship International hna fonh in Mizoram ah a dormi ralzaam hna thazaang pek ( Raltlan Thlahual) tonpumhnak cu Vaute 7 ah Hangzo Natural Park ah an tuah, hi tonpumhnak ah khuallian ah sawmmi CYMA President nih a tu bantukin a chim hi a si.

Central YMA nih Mizoram ramkulh chung ah ralzaam in aa dormi hna an i dornak khua ram ah tlawn dingin timhlamhnak an rak ngei nain

Covid 19 zawtnak ruang ah a tlamtling lo i Aizawl kiangkap ah aa dormi ralzaam riahbuk ah Vaute 11 le 12 eh vehvatnak kan ngei lai tiah a chim fawn.

Mizo mino bu ( CYMA) cu Mizoram chungah cozah a si lo mi bu an si nain thazaang a ngancem zatlangbu an si.

Hi tonpumhnak ah Kalay peng Pyituh Hlutdaw palai Pi Siammi nih ralzaam bawmchantu Mizo mizapi cungah lawmhnak bia le , khua le ram nih aa ngeih ning ahcun ramkhat le ramkhat kar ah ramri a um ko nain thisa khat unau ah ramri a um lo ti a langhter tiah a chim.

Mizoram ah a rak i dormi ralzaam mi lunglawm te’n a kan cohlang tu Mizo mizapi, Mizoram cozah le cozah riantuan, ralzaam kong he pehtlai in India center cozah sinah nawlnak tuahtu MP, MLA, NGO le a dangdang hna cungah Myanmar ram aiawh in lawmhnak bia ka chim. Ram pakhat dirhmun ah ramri timi cu a um nain thisa khat unau a si mi ah ramri ti a um lo, Myanmar ram ah um hmanh usilaw nan mi dawtnak cu zei tik hmanh ah kan philh lai lo tiah ” Pi Siammi nih a chim.

Mizoram ramkulh ah ummi Mizoram Rural Bank (MRB) Chairman Shri. Jaya Chandra zong khuallian ah sawm a si i ralzaam caah Rs. sing 10 a hlut tiah theih a si.

Hi tonpumh ah Mizoram ah ai dormi Chin ramkulh Chief Minister hlun Salai Lian Luai telh in Palai 21 an kai i, Myanmar, Mizoram, Chin ram ah minngei hlasakthiam Benjamin Sum, Iang Len Sung, Biak Hlei Par, Vanlalsailova, Zomuanpuii, Joseph Fanai, PC Lalnunpuii, Rebecca Zorintluangi, Mathlenga, LRa, Lalthazuala hna nih hla an sak tiah theih a si.

Credit:21The Chin Times

Be the first to comment

Leave a Reply

Your email address will not be published.


*