Nang e, Kei e, ti Um Hlah Seh!

Nang e, Kei e, ti Um Hlah Seh!
=======
Tulio cu ramchung he ramleng he kan ram dothlennak ah i telhlo ngah lo bak asi, mizeihmanh kan luat lo i kan luat kho fawn lo, luat i timh khawh zong asi lo i, luat ai timmi zong an um lai ka zum lo. Cucaah kan buaituk lio cio asi caah biaalnak le khat le khat sual i phawtnak tete zong naihrawng cu a vun tam ngai ramchung le ramleng lei dirhmun tete kong ah.

Cu kong cu keimah pumpak ka hmuh ning le ka ka lungput tawite in vun Tial ve ka duh ko. Kan pasal/nusal tha CDF kongah zemaw tete biaalnak tete asiloah Facebook catialmi tete ah hmuh ding a vun tam ngai, cun keimah zong a kum in meeting a thu peng ve mi le fundraiser pakhat asi bal ve mi ka si i ramleng lei phaisa pakhat thawh le fund kawl cu a fawite mi asi ko timi biaka tete hi hmuh le tialmi tete a vun tam ngaingai naihrawng cu.

Thantlang hi nikhat te nan ven khawh ahcun, Hakha nikhat te nan ven khawh ahcun, Kalay nikhat te nan ven khawh ahcun, ti asiloah, meithal voikhat te hmanh tlai ballo mi nih nan holh tak ko e, ramthumnak um riangmang in nan duhduh in bia nan chim ve nan ngamh tak ahcun meithal hung tlai ve u ca, phaisa $500/$1,000 hrawng thawh i nawl nan kan ngeih colh, timi biaka tete hmuh ding a tam ngaingai.

Ramchung ral timi ahcun tarnu le tarpa zeihmanh thahnem tilomi hmanh khi thathnemnak an rak ngeihnak zawn tete khi a um kho ve tawn. Nunnak pek bakin hriam he raldohtu hi kan hero cu nan si i, kan hmai kal (frontline) taktak cu nan si, kan in bochan hna i teinak zong nanmah kut ah a ummi, a biapi bikmi nan si hi philh cu chimlo kan in bochan tuk hna.

Asinain theihthiam a herh ve mi cu mu, miramdang i manhlo tuk buin le caan ngeihchunh vialte pek in thinlung dihlak he nupi fate he hmanh chawnh caan ngei loin nan caah ningzah le an caan vialte kha an pek ve timi kha vun philh lai u cuh. Nupi le chungkhar he i then deng tiangin chungkhar ah nanmah caah riantuanmi an um len.

Kan ralkap pawl hi an hartuk sual lai tiin Khrihfabu hmanh ah an thawh khawh lomi do cawi chawmh in mitchinh kamseh in a vun i zuam tualmal mi zong ah tampi. Mi ngei nung caah cun $10,000 thawh hi a fawite ko, asinain company ah $17 hrawng tein a tuanmi, fale 5 tluk riantuan kho rih lomi tleirawl tete ngeimi, chungkhar pacem lawng riantuan mi, thlakhat hmuhmi $2,000 tluk lawng siin inn man, motor bill, Khrihfabu thawhvo, khua lei kaphnih chungle kuat peng hau ve mi harsa mi kan tamtuk rih.

Asinain kan ram thlennak ding caah le kan ralkap pawl caah cun, tiah a thanalo in mi do cawimi ka theihmi an um len. Tulio thawhbur a hei tam ning le thawhbur khawlh ah zaangfak kan hei si tawn ning le a thanalo in an vai tualmal mi hmuh ahhin lung lei hi a hno, a tlinh kho bak ti lomi an tampi innchungkhar bill, Khrihfabu le kaphnih chungkhar phasa kuat he cun. Asinain vuihram cu chim lo an hmuh te dingmi lakkhah hna in mi an pe ko.

Cucaah cun, ramthumnak um riangmang in nan duhduh in rak holh hlah u, Thantlang le Kalay hi hung veng tuah hnik u, na phaisa thawhmi nai hngalsak kan in khirh lai, timi pawl bia hi cu chim ti lo ah a tha lai dah ka ti. Duhnak le tantuknak a faktuk ve tikah cu sual phawtnak biaka hi a rat tawn phung asi ko, CDF dawt lo ruang ah asi lo. Motor cu a kee a um lo ahcun a kal kho lo, a innpi a um fawn lo ahcun a kee lawng in a ngah fawn lo, cubantuk thiamthiam in a engine a um lo ahcun zeitindah a kal khawh lai?

Cubantuk thiamthiam in kan ralkap pawl hi um hlah ulaw zeitindah kal cu kan doh khawh lai? Ralkap pawl nihhin meithal ngei hlah ulaw ralkap lawng cu zeidah a thathnem lai? Meithal zong cu a cawkpiak tu mipi um lo ahcun zeitindah nan ngeih khawh lai? Cucaah hi ral kan tei khawhnak ding ahcun kan dihlak in kan biapi, nang e, kei e, ti um sawh hlah seh, kan tei hrimhrim lai! Credit: Chelsea Bawi

Be the first to comment

Leave a Reply

Your email address will not be published.


*