Nangmah Naa Mawhchiat Maw

Nangmah Naa Mawhchiat Maw?
——————————————-
Zinglei ni chuakka ah Nengpi cu tidel pawngah a dir i amah le amah aa zoh tikah a chimmi cu, “Ka ki cu aa dawh tuk i, a ka dawhtertu a si nain ka ke cu a chiatuk le aa dawh lo tuk ee” tiah amah le amah aa ruat lio ah ramvai pa a hmuh ciammang i zeihmanh ruat lo in a tli. Ramvai pawl nih hmuh lonak dingah bur chungah a lut i, a ki cu bur chungah aa tap i, a duhning in kal kho lo in a um caah fakpi in a cawlcang lengmang nain a hlipphuak kho ti lo. Nengpi nih khua a ruahmi cu, “Ka Ki cu kaa uar tuk nain ka caah thihnak lam a phaktertu a si ee… asinain ka Ke cu kaa zahpi tuk nain a ka luattertu a rak si” tiah a ti.

Hi tuanbia hin thazaang pek kan duhmi hna cu keimah zong ke zeng ka si. Tleirawl a si lio ah hin keimah le keimah ka zoh tikah ka pum rua hi a tha pah ve ko nain ka vorhlei ke te hi zeng hlah sehlaw cu nungak zong nih an ka uar pah ve ko hnga mu… tiah ka Ke hi ka rak mawhchiat lengmang ve.

Caan a liam lengmang. ka vorhlei Ke a zengmi ruangah thathnemnak ka hmuh. Voikhatnak cu 1996 lio ah Thantlang ah Ralkap nih pawta an rak kan tleih lio ah kei cu Ka Ke a that lo kan tinak I ka Ke cu ka rak piah hna i, sorry…sorry an ka ti i an ka rak luat. Voihnihnak cu 2014 lio ah Taiwan ram Taipei City ah Disability Development Initiative (DDI) min in “Asian NGO International Conference” ka rak kai i, Bangkok khin vanlawng thlending a rak si caah kal ka rak tih tuk. Sihmanhsehlaw, pumtlinglomi cu kawlram airport in wheelchair in an kan kalpi, Bangkok ah special bak in motor dang nih an kan don, vanlawng dang thlen hlan ah dinhnak special room ah an kan chiah. Vanlawng dang cung kan kai tiang minung pakhat nih tuanvo an kan lak dih. Aw… ka ke bei hlah sehlaw… ka ti cang… ka ke beinak nih Taiwan a ka phakter, Hotel thatha a ka tluntertu, Vawlei cung ram 18 hruatu minung he hawikomnak a kan tuahtu tiah lawmhnak a ka pek. A tu cu ka kete cu kaa uar tuk cang.

Paul nih, “Zei bantuk thil nan ton hmanh ah lunglawm in um u. Khrih Jesuh chung i nan nunning ah hin hitihin nung hna seh, tiah Pathian nih an duh hna (1 The.5:18)” tiah kan hmuh bantukin Pathian nih a kan serning cio ah lungawi hi Pathian duhmi a si.
Kan sining cio cungah lungsi hnangamnak kan hmuhnak hnga Pathian nih thluachiahnak kan pek piak ko seh. By Rev.Sang Uk Cung.

 

Be the first to comment

Leave a Reply

Your email address will not be published.


*