Nihin Chin ramkulh chung kahdohnak update thar!

Hakha le Mindat Peng ah kahdohnak a chuak
========
2022 May 2, Chin Ramkulh Hakha le Mindat peng chung ah Council ralhrang le CDF ralkap karlak ah kahdohnak a chuak i ralhrang lei a thi mi le hliam a tuar mi an tam tiah kan theih. Hakha Peng chung ahhin nihin zingka ah Hakha in Falam lei a panh mi ralhrang motor 20 leng le raltuknak motor (Armoured vehicle) pahnih cu CDF Hakha nih Chuncung phak hlan ah an kah.

“Hakha thar in aa thawh mi hna kha an si. Chuncung phak hlan ah CDF nih an kah hna i ralhrang lei a thimi theih an si rih lo. Atu zong an i kap cuahmah rih,” tiah himnak ca ah min langhter awk a tha lo mi thawnghram in kan theih.
Cun tuzing zinglei sang ah Mindat CDF nih ralhraang hna cu Mindat le Matupi kar lampi ah an kah ve hna i ralhrang lei minung panga an thi tiah theih a si.

SAC nih Chin ramkulh ah pengkomh 2 a ser chap, Myanmar ram ah pengkomh 121 in then a si. State Administration Council (SAC) nih ramp pumpi in ramkhel lei, uknak lei, sipuazi lei, zatlang nun a tluan deuh khawh nak hnga caah le hmunkip a ṭhancho khawh nak hnga caah tiin Myanmar ram ah pengkomh 75 in ṭhen a rak simi chung in pengkomh 46 bet chap a si cang tiah Ministry of Home Affairs nih April 30 ah a thanh.

Chin ramkulh cu Falam, Matupi, Mindat le Hakha tiah pengkomh 4 ah ṭhen a rak si i SAC nih Tedim le Paletwa tiah pengkomh 2 a bet chap tiah theih a si. Nay Pyi Taw ah pengkomh 2 a rak um cia cangmi chung in pengkomh 2 ser chap a si. Kachin ram cu pengkomh 4 in ṭhen a rak si i a tu cu pengkomh 2 bet chap a si. Kayah ram ah peng komh 2 a um i pengkomh 2 bet chap a si. Kayin ram zong pengkomh 4 a rak um cang i pengkomh 2 chap ṭhan a si.

Sagaing ah pengkomh 11 a rak um i peng komh 2 bet chap a si. Cu bantuk in, Taninthayi ah 1, Bago ah 2, Magway ah 2, Mandalay ah 4, Mon ah 2, Rakhine ah 2, Yangon ah 10, Shan ah 9, Ayeyawady ah 2 tiah pengkomh pawl bet chap an si.
Myanmar ram cu pengkomh 75 in ṭhen a rak si nain SAC nih pengkomh 46 a bet chap caah SAC tang ah a zapi tein pengkomh 121 ser a si cang tinak a si.

Mizoram ah hriam thil tampi le CDF thandar tlaih an tong. Mizoram ah Assam rifle le Mizoram palik fonh in India-Myanmar ramri ah kuat ding tiah ruahdamh a simi hriam thil tampi tlaih a si tiah theih a si.

Assam rifle le Mizoram palik phufonh hna nih thawngpang an rak theih bantuk in Aizawl khua in 19 kilometres aa hlatnak Kelish khuate ah mawṭaw 2 dirter in an check hna. Ramri ah kuat an timhmi hriam thil pawl cu minung 4 he kan tlaih hna tiah Mizoram thawngzamh nih a langhter.

An tlaihmi hriam thil vialte cu 3,000 kilo a ritmi gelatin bom thluan 24,000, safety fuse box 4 (2,000 meters), 22 rifle zuun 5, 12 gauge shot gun zuun 3, kuan (1.77) 20, zen 100 kilo le Telescope sight 7 leng ah CDF thandar zong tlaih chih a si tiah thawngzamh nih an langhter. A tu bantuk thil sinning he pehtlai in Mizoram mi 4 zong tlaih chih an si i Kulikawn palik sakhaan ah an fim hna tiah theih a si. Credit: The Hakha Post, The Chinland Post

Be the first to comment

Leave a Reply

Your email address will not be published.


*