SAC Nih Thimnak An Tuah Ding Mi Ah I Tel Lo Ding Le Milu Relnak A Tuah MiThazaang A Petu Cu Dantat Dingin NUG Nih Ralrin Pek!
======
SAC nih phung ning loin thimnak an tuah lai ding mi ah a hohmanh i tel lo dingin NUG cozah, Ministry of Interior nih nizaan January 9 ah theihternak an tuah. SAC nih phung ning lo le a dik lo ning in thimnak tuah nakding ca ah January 9 in 31 tiang inn khat hnu inn khat in minung cazin an lak i cheukhat hmun ah cun January 7 in SAC kuttang khuabawi chungtel hna le Lah Wah Kah nih minung cazin le milu relnak an tuah cang, tiah theih a si.
Cu pinah SAC nih inn khat hnu inn khat kai in minung cazin an lak lioah rian a bawmtu SAC kuttang khuabawi chungtel hna, Lah Wah Kah hna le mi dangdang hna zong ralhrang dohnak upadi in fak piin dantatnak kan tuah hna lai, tiah NUG nih ralrin peknak cathanh an chuah.
Kalay PDF Nih Kalaymyo Khua Chungah SAC Ralkap 3 An Thah Hna, SAC Ralkap Nih Tualchung Mi Pakhat An Kah Thah! Kalaymyo Tahan sang ah kahdohnak voihnih kan tuah i SAC ralkap 3 kan thah hna, SAC ralkap nih duh paoh in meithal an thlah caah tualchung mi pakhat a nunnak a liam, tiah January 9 ah Kalay PDF nih cathanh an chuah.
Tahan sang Duwaichaung(ဒိုးဝိုင်းချောင်း) lam ah January 9 zinglei sml 7:30 hrawng ah ralven dingin a kalmi SAC ralkap pawl cu Kalay khua chungah a cawlcang mi Operation MoMo phu nih bomb an rak hmanhmi in an puahhnawh hna caah SAC ral 3 nak tlawm lo an thi. Cu hnuah minutes 10 chung hrawng duh paoh in meithal an thlah, tiah theih a si.
Cu ṭhiamṭhiam in zing sml 11:00 hrawngah Tahan sang Wesley sii-inn lam kam ah umhmun a khuarmi SAC ralkap sakhan cu, Kalay PDF, khua chungah a cawlcang mi hna nih an va kah i SAC ralkap a thimi le aa hliammi an um le um lo cu theih a si rih lo. Cu hnuah SAC ralkap nih duh paoh in meithal an thlah caah tualchung mi pakhat a nunnak a liam, tiah theih a si.
Singapore Ah Chin Nu Thi Lakin A Hremtu Inntek Nu I A Nu Cu Kum 14 Thongdan An Pek. Singapore ah sin-um a tuanmi Chin nu thi lak in a hremtu inntek nu i a nu cu tuni, Jan 9 ah kum 14 thongdan an pek tiah theih a si! Biaceihzung nih an kut in an vuak pin ah a phunphun in an hrem tiin biakhiahnak an tuah i kum 64 a simi Prema S Naraynasamy atu bantukin thongdan an pek hi a si!
Inntek hremnak in a thimi Piang Ngaih Don cu Chin ramkulh Tidim peng Dinpi khuami a si! An hremnak le vuaknak cu CCTV ah tling tein a um tiah biaceihzung nih an thanh! Piang Ngaih Don cu May 28, 2015 thok in an sinah a um i July, 2016 tiang nifatin in hrem le vuak a tong i cucu a tuar khawh lo caah July 26, 2016 ah a nunnak tiang a rak liamnak a si!
Piang Ngaih Don cu hrem le vuak a tuar pin ah ti le rawl an pek huaha lo caah a der tuk i a thih ah hin 24kg lawng a rit tiah South China Morning Post nih a tial! A thihnak a ruang bik cu a lu i an vuaknak ah a thluak a rawk ti a si! Kum 41 a simi Inntek nu Gaiyathiri Murugayan 2021 ah khan kum 30 thongdan an rak pek cang! A pasal hlun palik bawi a si i Piang Ngaih Don thihnak ah aa tel ve an ti caah a rian in an rak chuah ve! Credit: The Chin Post
Leave a Reply