Chin ramkulh SAC kuttang Sakremhnak zung in lam lei Director Pu Ṭha Peng le an nu an zaam!
========
Chin ramkulh, SAC kuttang Sakremhnak zung in lamlei Director Pu Ṭha Peng le an nu cu SAC tuahtonak an celh lo caah an zaam cang tiah Chin ramkulh SAC lei thawngzamh sin in theih a si.
August 31 zinglei sml 2:30am ah Chin ramkulh, Hakha khua, Pyidawta sang ah a ummi Sakremhnak zung ah inn pakhat a rak kangh ruang, Hakha pengkomh lam lei zung in AD U Nyan Hein Aung, AE U Win Maw, adang zung rianṭuantu pawl, rianṭuantu 8 tiah an zapi te rianṭuantu 11 an tlaunak kong ah rian na ngei tiah an ti caah U Ṭha Peng cu Hakha palek sakhaan ah sual an phawt i zung zong ah an auh caah Pu Ṭha Peng le an nu cu an zaam tiah theih a si.
“Hakha inn kanghnak, rianṭuantu pawl an tlaunak ruangah CE Pu Ṭha Peng cu palek sakhaan an sual an phawt. Zung ah an auh. PDF pawl zong nih Pu Ṭha Peng cu Non-CDM a si caah ralrin an rak pek. Chin ramkulh Sakremhnak zung le Chin ramkulh cozah zong nih Pu Ṭha Peng cu an ti tuk. Cucaah CE le an nu cu an nunnak thinphan a si caah a thli tein an zaam. CDM ka tuah tiah a ka in a chim lo nain zung le Chin ramkulh cozah nih fialmi rian a tuah ti lo caah CDM a si ko” tiah Chin ramkulh SAC lei thawngzamh nih fianternak a tuah.
A tlau i an tlaih hna tiah ruahdamh a simi Sakremhnak zung in bawi le rianṭuantu 11 chungah Engineer EE U Nyan Hein Aung cu Chin ramkulh hlei remhnak phu i rianngeitu a si i Hakha-Thantlang lam cungah a um i Chin hriamtlai pawl nih an rak puahmi Timit hlei remh ṭhan ding in a rat lioah a tlau hi a si tiah theih a si.
“Chin ramkulh ah CDF nih hlei pakhat an hrawh. Cu hlei an hrawh mi cu Chin ramkulh cozah duh mi Bailey hlei pakhat sak piak ding in Kalay in Hakha tiang Chin ramkulh SAC Chief Minister aa citmi helicopter a rak zul. Chin ramkulh cozah zung ah SAC Chief Minister he meeting tuah le ceihmainak an ngeih hnu Chin ramkulh Sakremhnak zung chungah rianṭuantu pawl he an ih lioah zung chung inn a kaang i Engineer 4 le rianṭuantu 8 tiah an zapi te 11 an tlau” tiah Chin ramkulh SAC lei thawngzamh nih a fianh.
Atu lioah a tlaumi rianṭuantu 11 an luat khawhnak hnga SAC nih Non-CDM Chin miphun pawl ceihmainak a tuahter hna tiah theih a si.
SAC ralkap 2 CDF-Kanpetlet sin ah CDM an tuah. Chin ramkulh, Kanpetlet peng ah riankhinh a simi ralkap Nay Thu Aung le ralkap Van Ding hna cu CDF-Kanpetlet sin ah hriam tling he CDM an tuah tiah theih a si.
Ralkap Nay Thu Aung le ralkap Van Ding nih CDM tuah kan duh ko tiah CDF-Kanpetlet sin ah pehtlaihnak an tuah i CDF-Kanpetlet nih an va don hna i tangka laksawng an pek hna hnu ah himnak hmun ah an kuat hna tiah CDF-Kanpetlet nih September 26 ah a thanh.
CDM a tuahmi ralkap pahnih nih an pum lawng si loin G3 zuun 1, MA2 zuun 1, G3 kuan bawm 2, MA2 kuan bawm 4, G3 kuan 28, MA kuan 346 le kuan khamnak 1 an rak i put chih tiah CDF-Kanpetlet thawngthanhnak in theih a si.
India-Myanmar ramri ah rithai sii lung sing 5 leng an tlaih. Mizoram, Champhai pengkomh, Melbauh khua ah rithai sii (Methamphetamine) lung sing 5 leng cu Mizoram palek le Assam Rifle phu nih an tlaih tiah theih a si. Zokhawthar khua hrambunh Mizoram palek le Assam Rifle phu nih thawngpang an rak theih cang bantuk in September 23 ah ramri in a rak kaimi mawṭaw pawl cu Melbauh khua ah an check hna i rithai sii lung 500,005 le a ngeitu tiah ruahmi nu pakhat an tlaih tiah Mizoram thawngzamh nih a langhter.
An tlaihmi rihai sii hi India rupees sing thongkhat le zaruk leng man a si tiah an langhter. Atu an tlaih mi man hi Mizoram ah rithai sii an tlaihmi lak ah a tambik man a si tiah theih a si. Cu rithai sii le an tlaihmi nu cu Zokhawthar palek sakhaan ah September 24 ah an ap cang i sual an phawt cang tiah theih a si.
Cu bantuk in September 22 ah Champhai pengkomh Tupui khua ah Mizoram palek nih thilphor mawṭaw pakhat an check i rithai sii lung singkhat le India rammi pa 3 an tlaih hna tiah theih a si.
Kahdohnak a chuah ruangah Matupi peng Phanai le Ngalai khuami 1,500 leng an zaam. Chin ramkulh, Matupi peng, Phanai le Ngalai khua karlak ah SAC ralkap le CDF-Matupi karlak September 26 zinglei ah kahdohnak a chuah caah mipi 1,500 leng himnak hmun ah an zaam tiah theih a si.
Phanai le Ngalai khua pawngah kahdohnak a chuah caah khuami hna cu fing le tlang chungah atu le atu an zaam tiah theih a si. “Phanai le Ngalai khua ah SAC ralkap an rat cun ramlak ah kan zaam tawn. Ralkap an um lo tikah khua chungah kan kir ṭhan. Ramlak in lo lei ah an i ṭhial tawn. Cheukhat cu lo ah lo rianṭuan pah in an um beh” tiah khuami pakhat nih RFA ah a chim.
Phanai khua hi khuami 900 leng khua an sa i Ngalai khua hi khuami 600 leng khua an sa tiah theih a si. Hramhram in uknak lak a si hnu Chin ramkulh i a chuakmi kahdohnak ruangah khuate 300 leng cu ralzaam dirhmun an phan cang. UN OCHA i September 5 cathanh chungah cun hramhram in uknak lak a si hnu in Chin ramkulh chung ah ralzaam 40,000 hrawng an i chap tiah a langhter.
Falam peng kahdohnak ah SAC ralkap 1 a thi. Chin ramkulh, Falam peng, Tuphei khua ah hmunhma a khuarmi SAC ralkap pawl cu September 25 zaanlei sml 5:00pm hrawngah CNDF nih an kah hna i SAC ralkap 1 a thi tiah theih a si. Tuphei khua ah hmunhma a khuarmi SAC ralkap pawl Tuphei khua chung an i chawh lioah CNDF nih a thli tein an kah hna i SAC ralkap pakhat a thih hi a si tiah CNO/CNDF nih a thanh. Kahdohnak chungah CNDF lei him tein an kir kho tiah theih a si.
Minbya ah SAC tinbaw 2 AA nih a kah i pakhat a rawk. Rakhine ram, Minbya khua pawng, Tatpung tiva, Chaungshi pawng September 26 zinglei ah SAC ralkap le AA karlak ah kahdohnak a fak i SAC nih van, vawlei, le ti phufonh in a kah tiah theih a si.
September 26 zinglei ah Pauktaw lei in a rak ṭummi SAC tinbaw 2 cu Chaungshi pawng an phak ah AA nih an kah hmasa hna i tinbaw lei zong nih an kah ve hna caah sml 1 deng kahdohnak a chuak tiah theih a si. “Pauktaw in a rak kaimi SAC tinbaw 2 kha AA nih an kah.
Pakhat cu a tap. Can rau lo ah vanlawng 2 in a rak kah. Tibaw pawl kha an sung ngai, a khu hna a chuak” tiah khuami pakhat nih Khit Thit ah a chim. SAC kahdohnak vanlawng 2 nih a pawngkam khuate pawl a kah i cu vanlei kahdohnak ruangah fapawi lio nu 1 le hngakchia 2 an i hliam tiah theih a si. Credit: The Chinland Post
Leave a Reply