Pathian Pekmi Kan Tiram Nih Khumzual Mi Chin Ralkapbu Le Pasalṭha Rual!
==========
Kawlte Ralhrang Rallokap nih Ke Raldohnak in an kan ngamh ti lo. 12 – 14 May 2022 ah Mindat Chin Mino nih Puahceh in Rallokap Motor 6 an hrawk cikcek, Automeithal Tampi kan lak. Hriamtling aa ngeih mi, Vawleipi ah Ralkap ṭhawnnak 38th asi mi Kawlte Rallokap cu Chin Mino nih Pauhceh in kan tei hna, Rallokap Motor cu a luruh le a keruh lawng a tang tiah vawleipi ah Chinmi kan min a thang.
Vawlei tuanbia ah aum ballo I, hmai lei zong ah a um ti lailo mi Tuanbia cu CHINMI nih an ṭial tiah vawleipi nih ti kan si. Rallokap Battalion (340) cu Motor le Tank 100 leng in Matupi ah an rak kai. Chin Mino nih Pauceh in an doh hna, kutsiam bomb an puak hnawh hna, ni 7 lamkal kha thla 1 leng an rau. Matupi an phan hnu ah Lengchuak an ngamh ti lo. An um hmun in Hriam lian pipi in CDF an um lai tinak ah an kah, CDF nih kan naih ngam hna hlahseh an ti.
Cucaah Rallokap nih raldoh ningcang an thlen. Chin Khuapi 9 lawng ah um in kan uk cang ti awk ah asi. Chin Khuate kan tuk hna ahcun, Chinram lawng nih an kan tei lai ti kha fiang tukin an hngalh caah si. Rallokap nih CHIN khuapi 9 le an Sakhan lawng ah an um nak cu Ral sung lai kha an duh lo caah asi. Rallokap nih CHINMI Teirul chamh nak caah, CHIN Khuapi dawh ah aa tel ve mi Thantlang Khualipi cu 2021 October ah, mei in an duah dih tiah Vawleipi tuanbia ah record an tuah.
Chinram bantukin Hmawng an tam, tiva horkuang le chengpalang lawngte in a khat mi cu Taliban ram Afghanistan le Vietnam ansi. Vawleipi ah a ṭhawngbik mi American hi Afghan le Vietnam lawng ah ral an sung bal. Taliban ral in American an sung hi, Pu Trump chan ah khan si sehlaw, Laipa Kutzung cu amah tein hri aa awk men lai ka ti. Pu Trump minung USA um CHINMI zong nan si ning ding tuak ah ruah ngam asi lo.
Pathian Pekmi TIRAM ropui tuk mi aa ngeih mi kan si caah, Tibual Raldohnak ah Raltuknak Vanlawng 7 tiang an hmang nain, an kan tei hlei lo, CHIN Ralkap kan him dih. Mipi thlacamnak cu Tiram hmang in BAWIPA nih an kan umpi I ral an kan doh pi.
Timit Kahdohnak ah, ni fatin ti awk in, Rallokap nih Helicopter le tohmun kahmi IT chan Hriamngan ṭhaṭha hmang in an kan kah nain, Bawipa Pekmi kan tiram ruangah Chin Ralkap kan him dih, Rallokap tampi kan thah hna I, hriamnam ceilak kan lak lehlam. Ralkapbu Bawipa cu amin zungzal thangṭhat siko seh. Sunpar Lianngan nak vialte BAWIPA nih co zungzal ko seh. Upatnak sangbik cu Bawipa nih co zungzal seh.
Bawipa thimh hlei mi Israel miphun cu Bawipa nih ral a doh pi hna tikah a hmang mi hna cu: Khuaingal, Rial, Minmei, Thinghmui hma nei, Tu ki, Muko, Meifar, Nika le Arfi Thlapa, anmah le mah a thah ter hna: Kannih CHINMI cu kan Tiram, Horkuang, Thingkung, Hmawngram, Lungpang le Chengpalang hna hmang in Bawipa nih ral an kan doh pi. Hi hna hi ral teinak le kan ral kut in himnak caah Pathian pek mi thluachuah ansi.
Pathian nih a Vancungmi a thlah ti hna lailo. Miphun dang nih a hme LAIRAM ti in kan zawmtai hna hmansehlaw, Saram umnak ah a um mi tiah thlang lamh mi CHINMI si hmanh usih law, Kan Tiram le horkuang, Lungpang ruang tu ah BAWIPA sinah lawmhnak bia chimh cio usih tiah kan sawm hna.
Kanpa le/ kan u le / College an kai lio ah CHINRAM in zeidah a chuak an ti ah, an thin linh tuk caah CHINRAM in nu aa zuarmi kan chuak lo tiah an leh tawn hna. Tu cu kaa-an ngam le mit-au ngam hmanh an si ti lo. Suingun Lungvar le lunghring an chuak lo, CHINRAM cu Saram umnak asi tiah an kan nek mi kha: Rultlang in Nickel relcawk an um cang.
Midang kut ah phan lo ding in Pathian nih a khumzual caah asi. Adang thil mansung a um rih. CHINMI kan Fimthiamnak nih a zawh rih lo caah, Pathian nih a thup rih mi asi. Kan Tiram le Thingkung Vawlei in rum ding ah Pathian timhmi cu asi. Midang kutin kan rum lai lo, midang kut in kan luat fawn lai lo. Israel miphun bantukin, Amah Pathian bawmhnak thawng in, Kanmah kutek tein luat ding hi BAWIPI Planning asi. Credit: Joseph R. Thang
Leave a Reply