Pathian Thilsiam Khiaruahhar, a mak tuk!

Pathian Thilsiam Khiaruahhar
========
A thawng taktakmi James Webb Space Durbing in thlakmi hmanthlak nih van (space) kong hlathlainak he pehtlaiin cahmaithar a kau (open). Asinain cu kong cu arfizohthiam pawl nih fiangin an hliah kho taktak rih lo, tiah theih a si.

Lamhlatpi ah a ummi khat le khat ai ngerhmi Galaxies (arfibu umnak) siseh, gas in a khatmi vawlei ngan pipi le a thi cuahmahmi arfi pawl cu Dollar million tampi dihin sakmi hlathlainak zung nih hman in a thlak hna. Hi durbing hi lamhlapi tiang a zoh khawh i, mifim pawl nih an saduhthah ning tein a rong (color) tiang telhchih in hman cu a thlak khawh hna, tiah theih a si.

Tutan i hman a thlak hi cu an cinhnak (practice) sawhsawh a si ko nain, an ruahning leng tiangin hmailei i hlathlai an duhmi hmunhma tampi zong a hmuhter khawh hna, ti a si. Tutan i hlathlainak (research) an tuahmi ah hin hlan chan in ai semmi Galaxies pawl an i semning kong siseh, arfi pawl an nun ai thlennawn ning (life cycle) siseh, lamhlatpi ah a ummi nika pawl a heltu, minung umkhawhnak vawlei kong dothlatnak le, kan solar system a lenglei ah a ummi thlapa pawl an i semning kongkau an i tel, tiah theih a si.

Webb durbing hi amah hlan i kumpi kum 30 chung an rak hman cang mi Hubble Space durbing nakin a let 100 in a fiangdeuh i, tutan i hman a thlakmi pawl hi mifim pawl hmanh nih an ruahlo pi tiangin a fian caah, an khuaruah lei lawng a har, tiah theih a si. “JWST durbing nih zeihdah a chuahpi lai ti hi ahonih kan thei kho ruam lo. Asinain, khuaruahhar thil tampi a chuahpi lai, ti cu ka fiang” tiah Near-Infrared Imager and Slitless Spectrograph ah hlathlaitu a si mi Rene Doyon nih a chim.

Webb hi nikum December tein khan an thok i, tu hi rian a tuannak thla 7 a si ve cang. “A um lai, tiah a ruah awk hmanh kan theihlo mi thil tampi Van (Space) chungah an um rih hna. Cu kong cu Webb durbing hmangin arfizohthiam pawl nih hlathlai an i timhlamh lio pi a si,” tiah 1990 lio ah Big Bang theory a rak dirpitu, NASA in Nobel Prize zong a hmuh ve mi John Mather nih a chim.

DARK MATTER, DARK ENERGY; Mit in hmuh khawh lo mi le a kong tlawmte lawng theih a si mi Dark Matter kong cu Mather le a dang scientists pawl nih an i hmaithlak. Van (space) i boruak kong he pehtlaiin hi Dark Matter kong hi a linsa ngaimi thil pakhat a si. Asinain tutan Webb durbing nih hin a sining fenh kho te sehlaw a dawh, tiin ruahchannak nganpi an ngei.

Cu ve bangin cun, khuaruahhar thil tampi siseh, Dark Energy siseh, kan Universe pi a kauh lei a panh chinchinnak kongah mifim pawl an i ruahchannak lengin Hubble zong nih hmuhchuahnak thar a chuahpi ve thiamthiam, tiah theih a si.

Universe pi a sining i 95% tluk cu hi Dark Matter le Dark Energy lawngte in a khat, tiin scientists pawl nih an chim. Galaxies dihlak siseh, vawlei dihlak siseh, vawleidip siseh, gas vialte siseh, cun a dang hmuhkhawhmi thil tete nih a tangmi 5% lawng hi hmunhma an lak ve, tiah theih a si. “Cu kong cu khuaruahhar taktak khi a si” tiin Mather nih a chim. “Webb durbing hmangin kan vun theihte lai dingmi thil kongkau hi chim chung awk a tha rih hrimhrim lo,” tiin Webb ah deputy project scientist Amber Straughn nih a chim.

Webb durbing nih a hmasabik a thlami hmanthlak chungah Dark Matter hi ai tel cang. A bu in a ummi Galaxies (SMACS 0723) pawl a thlakmi chungah ai tel. Universe ai semnak ni le thla a dikdiar in theih khawhnak kutka a awn bantuk a si. Hmunkhat ah ai bu mi Galaxies mangtara pawl le hmuhkhawhlo mi Matter nih cun an kiangkap vialte cu cerpup in an kah. Cu ceu cu an hnung zawn i lamhla piah a ummi galaxies pawl sinin a rami a si i, a hung fiandeuh chel le fian lo deuh chel, ti bantuk khin a vun ceuh hna, tiah theih a si.

Hmanthlak a kil zawn te i a ummi ceu khi kum 13.1 billion thluk a tar/hlun cangmi a si i, a liamcia kum 13.8 billion lio i kan Universe a sining mitthep kar ah a thlengtu, tiah ruahnak a ummi Big Bang theory 95% tluk hrawng tiangin a fehter/namhneh, tiin mifim nih an chim. Asinain, lamnaihnak zawn i hmuhkhawhmi Matter vialte hna cu hmanthlak chungah fiangin an lang kho lo. A ruang cu, Dark Matter a um ruangah hmathlaknak nih fiangin a thla kho lo le a si theu lai, tiah zumh a si.

“Hi bantukin lamhlapi tiang hmanthlak khawhnak seh vialte lakah Webb durbing hi a thawngbik a si. Asinain cu Webb durbing he zong in cun Dark Matter hi direct in kan hliah kho taktak rih ruam lo. Asinain, Dark Matter nih a chuahpimi thil kong cu kan hmuh khawh cang. Universe pakhat a um ko rih. A chungum thilri zoh khawhnak durbing ser kan hau” tiin Webb operation project scientist Jane Rigby nih a chim.

Kan solar system ah a ummi vawlei nganpi pakhat cu Webb nih avoikhatnak hman a thlak i, cu ah cun ruahlo piin ceu thar pakhat an hmuh. WASP-96 b, tiin min an bunhmi Jupiter tluk in a nganmi gas in a khatmi vawlei a si, tiah theih a si.

Cu vawlei nganpi nih cun amah nih ai ngeihmi a nika cu a hel i, mimthla bangin a thlapale cu ai lek i, a chungah tikhu, khuadawm le minmei kan hmuh, tiah mifim pawl nih an chim. Hi kan data chungah hin kan hmuhchuahmi tampi a um. Hmuhchuahmi tampi kan ngei ko nain, an sining thatein a hlathlai kan thok kho rih lo,” tiin Webb program scientist Eric Smith nih a chim. Credit: Chelsea Bawi

Be the first to comment

Leave a Reply

Your email address will not be published.


*