Pom zong pom lo zongah a hmanmi cu Mindat-CDF cingcing an si ko!

Pom zong pom lo zongah a hmanmi cu Mindat-CDF cingcing an si ko!
==========
Pom zong pom lo zongah a hmanmi cu Mindat-CDF cingcing an si ko. Tutan Mindat-CDF nih Kawl ralkap pawl a puahhnawhmi bom hi tutiang ahcun Chinram chungah a pin bik bom puahmi record asi men lai dah.

Chinram chungah Kawl ralkap tambik a thah kho tu le Kawl ralkap sinin hriamnam tambik a chuh kho tu hi tutiang ahcun Mindat-CDF hi an si ko.

Hi bantuk bom tampi le a pin takmi puah khawhnak tiang an thiammi zoh tikah Chin hriamnam dohthlennak hmai ah a kal thluahmah cang timi a lang.

Mindat-Matupi lamcung kahdohnak ah ralhrang ralkap 35 an thi, CDF-Mindat nih bom an puah hnawh hna. Mindat in Matupi lei ah a kalmi ralhrang ralkap mawṭaw thluan 83 cu March 29 ah CDF-Mindat nih bom an puah hnawh hna caah cuni kahdohnak lawngah ralhrang ralkap 15 an thi i tampi nih hliamhma an tuar tiah CDF-Mindat sin in theih a si.

Cu ralkap mawṭaw thluan ahcun, ralhrang ralkap 250 hrawng an tel caah kahdohnak a fak rih kho men tiah CDF-Mindat in biachimnak nawl a ngeitu nih Yangon Khit Thit ah a chim. Mah ralhrang ralkap mawṭaw thluan 84 cu Matupi Byu-ha ah eidin chanding in a kalmi an si i Mindat in an chuah lioah CDF-Mindat nih an kah hna hi a si.

Ralhrang ralkap mawṭawl thluan donding ah a kalmi ralhrang ralkap pawl cu Chanpyan khuathar pawngah CDF-Matupi nih an kulh hna i an kah hna caah ralhrang ralkap 20 hrawng an thi tiah Khit Thit thawngzamh nih a langhter.

April 1-2 Kahdohnak Thawngpang Cu Matupi CDF Nih Cathanh An Chuah! April 1-2 ah khan CDF Matupi nih vawlei tangah an chiahmi bomb ruangah Mindat leikap ah a kalmi SAC ralhrang ralkap hna lakah a tlawmbik ah (3) an thih pinah a dang tampi nih hliam an tuar. Cupinah April (2) ah Chin Pian khua pawngah cu SAC ralhrang ralkap le CDF Matupi karlak ah kahdohnak a chuak i, SAC ralhrang ralkap (6) an thih pinah a dang tampi nih hliam an tuar.

SAC ralhrang ralkap nih pawngkam ramtang cu mei an khangh. Matupi ah hrambunhmi SAC ralhrang ralkap hna nih thazaang an chap caah mipi nih CDF Matupi caah thla rak kan campiak hram u tiah cathanh an chuahmi ahcun an langhter.

Hakha Khuapi Ah SAC Ralhrang Nih Ti Toih Puai Tuah A Timh! Chin ramkulh Hakha khuapi ah SAC ralhrang ralkap nih April 13-16 tiang ti toih puai tuah a timh tiah theih a si.

Ti toih puai hramthoknak le kharnak caan hmangtu dingah SAC ralhrang nih Chin ramkulh cheif minister rian a pekmi pa nih biatawi chimnak a ngei lai i, puai onh-nak hri chahnak zong a tuah chih te lai. Karaoke seh zong Chin ramkulh budget chungin cawk an i timh tiah theih a si tiin Zalen nih a tial.

Ranger Kalay PDF Nih An Cawkmi Hriamnam Hna Cu Tluang Tein An Phan! Nawlngeihnak latu SAC ralhrang ralkap ralchanh in kahdohnak dingah mipi nih an thawhmi phaisa hmangin cawkmi hriamnam hna cu tluang tein an phan cang tiah April (2) ah Ranger Kalay PDF nih cathanh an chuah.

Hriamnam cawk a har ning, a thiar ning le i kuatnak a harsat ruangah a hmasa ahcun hriamnam hi kut chungah an phan khawhlonak a si i, tu thla chungah AK meithal zunkhat, a phan chap dingmi a um rih tiah an langhter. Kuanfang man a fak ngaingai cang tikah MM40 kuanfang zong tlawmpal lawng cawk khawh a si. Cucaah mipi nih pehzulh in bawmhnak nan kan pek chap nak lai zangfah kan in nawl hna tiah Ranger Kalay PDF nih cathanh an chuah hi a si.

Tamu PDF Pakhat Si-ai Thlopbulnak Caah Bawmhnak Hal! People’s Defense Force Tamu PDF Battalion (2) in ralkap pakhat Nat Soe cu Sagaing ramthen Tamu peng Kun Taung khua pawngah kum 2022 March 30 zanlei sangah a chuakmi kahdohnak ah hriamngan nih a khenh caah a kehlei ke aa taan. A orhlei khuk, a hnugzang leikap zongah hliam a tuar. Si-ai thlopbulnak ding caah phaisa kan i zat lo ruangah mipi sinah Tamu PDF Battalion (2) nih bawmhnak kan in hal hna.

CDM Tuahtu Ralkap Le Palek Hna Cu Lawmhnak He Rak Donh Hna U Tiah NUG Nih Forh! Dohthlenhnak caah kahdohnak a hung zual tikah zeizong vialte kaltak/chuahtak in CDM tuah in mipi sinah aa fonhmi ralkap le palek hna i thazaang hna hi a biapi cemmi thazaang taktak a hung si.

Micheukhat cu hramhram uknak a feh khawh nakhnga SAC ralhrang ralkap nih duh paoh in rianfial chukcho le hmanmi sinak dirhmun cu chuahtak/kaltak in mipi sinah fonh hratin an fimnak le thiamnak hna hmangin rampi caah a si khawh chungin rian an tuan.

SAC ralhrang ralkap nih duh paoh in rianfialnak le namnehnak ruangah ralkap chung lila zongah buainak le thencheunak tiang a chuahter. Ningcang loin uknak le hruainak hna cu lehrulhnak tuah kho dingin tutan hi caan rem/caan tha taktak a si caah mipi sinah fonh cio dingin kan in forh hna nak a si.

Hakha-Gangaw Karlak Hmun Pakhat Ah PDF Sakhan Cu SAC Ralhrang Ralkap Nih Kan Laak Cang Tiah An Chim! Chin ramkulh Hakha-Gangaw karlak kalnak lampi လုံကျွေး khua le လေအွမ်ခ khua pawng i a ummi PDF sakhan cu April (1) zinglei sml 9:00 hrawngah kan laak tiah SAC ralhrang ralkap nih hrokhrawl in thawngpang an chuahnak Telegram ah an langhter.

SAC ralhrang ralkap nih an laakmi PDF sakhan ah minung umnak thlam (7), rawl chuannak thlam (1), facang tun (1), cite bag (1) telh in eidin thilri dangdang zong an tel. Credit: The Federal Times

Be the first to comment

Leave a Reply

Your email address will not be published.


*