President Obama Tuan Bia..

President Obama cu August 4. 191 ah HONOLULU ah a rak chuak. A nu cu Americanmi a si i, a pa cu Kenya ram in America ah sianginn kaimi a rak si i a nu he cun an rak i tong. Obama kum hnih a si ah a nu le pa an i tthen i a pa cu Kenya ram ah a kir tthan. Hi lio ah hin a pa cu Kenya ah nupi a ngei ko. Cun, a nu cu Indonesia pa he an i um i Indonesia ah kum 10 a si tiang a um. Cu hnu ah a pi le pu (a nu, pi le pu) sinah a um.

Vawleicung minthang sianginn a si mi Columbia University ah BA (political science-international relations) a dih hnu ah Harvard University ah Law degree a dih fawn.

U.S. lawng hmanh ah si loin vawlei cungah Columbia University le Harvard University cu min thang bik lak ah an i tel, Hi bantuk in cawnnak sang a ngeih caah mipi nih an uar khun.

Laipa cu sisehlaw, ngahttahpa ti khawh a si. Kum hnih a si hnuah a pa he hin voikhat te lawnglawng an i hmu. A pa nih a thih tak. Anu zong kum 54 a si ah a thih fawn. A pi le pu sinah a tthang. Columbia University in BA a dih hnu ah krihfabuu sermi mi bawmhchanh rian a ttuan. Cu hnu ah politics lei ah a zuang. Mi teima, mifim le milung sau a si. Michelle Obama he an i um i fanu pahnih a ngeih hna.

President Thimnak:

America cu Britain ram in 1776 kum ah luatnak (independence) a rak lak. Vawlei cungah ram a kauh lei ah pathumnak a si. Mipi 300 million reng lo an um. Mirang cu 79.96 % an si. Minaak cu 12.85% lawnglawng an um. Asian le bang cu 4.43% lawnglawng an um. Hi tluk mirang tam lak i minaak a simi Obama nih president a tlin khawh caah America ram tuanbia thar a ttial, an ti cio.

Cun, biaknak lei zong nih an ttanh ngai. Protestant an tam bik i 51.5% an um. A changtu ah Roman Catholic an si i 23.9% an si. Democratic Party aiawh in president aa rak i cuh balmi Al Gore (kum 2000) le John Kerry (kum 2004) nak tam deuh thimfung a hmuh.

America president cu kum li dan ah voikhat lengmang thim a si. President pakhat nih voihnih (term hnih) tiang lawnglawng a ttuan khawh. Term khat cu kum 4 a si. Kum 2008 thimnak cu November 4, 2008 ah tuah a si i Democratic Party aiawh in aa cuhmi Barack Obama nih Republican Party aiawh in aa cuhmi John McCain a tei. January 20, 2008 ah biakamnak le rian fehternak cu Obama nih a tuah. January 20 chun in America president a si cang.

Kum 4 chung fel tein a ttuan khawh ahcun kum 4 hnu ah thimnak a um tthan tik ah a tei tthan ko lai.

Obama Nih A Teining:

President thim tikah America ram chung mipi vialte thimfung nih bia a chat lo. State 50 le Washington, DC nih aiawhtu an ngeih hna. State pakhat ah an i cuh i mipi thimfung tam bik a hmu mi nih state nih a ngeihmi aiawhtu vialte a lak dih. Tahchunhnak ah Washington, DC ah thimnak an tuah. Washington, DC nih a ngeihmi aiawhtu pathum a ngei. Obama nih mipi thimfung cu McCain nak in tam deuh a hmuh caah aiawhtu pathum ningin a lak dih. Cu ti cun state pakhat hnu pakhat thimnak an tuah. Obama nih 365 a hmuh. MCain nih 173 lawnglawng a hmuh. A sunghning a fak ngai. A zapi in 538 a si. Mipi thimfung vialte fonh ahcun Obama nih 52.9% a hmuh i McCain nih 45.7% a hmuh. Mipi thimfung ahcun a tei tuk theng lo. Opinion Poll (ruahnak a laa tu hna) nih cun 7% hrawng in a tei te lai tiah an rak chimh chung bantuk in a si taktak ko. State 50 chungin Obama nih 28 a lak. McCain nih 22 lawnglawng a lak. Obama nih Washington, DC a lak chih fawn.

Kum 2004 thimnak ah George Bush nih 285 aiawhtu a hmuh. John Kerry nih 251 a hmuh. Bush nih 50.7% mipi thimfung hmuh. John Kerry nih 48.3% a hmuh. An i tei tuk lo. Kum 2000 le bang ahcun Bush nih mipi thimfungah 47.9% lawnglawng a hmuh. Al Gore nih 48.4% a rak hmuh caah mipi thimfung nih bia chah ding sisehlaw Gore nih a tei ko hnga. Bush nih 271 aiawhtu a hmuh i Gore nih 266 a hmuh. Hi hna zoh tthan tikah America mipi nih Obama cu an duh taktak ti a lang.

Thimfung A Thlatu-hna:

Obama nih McCain a teinak a thazang nganbik cu mino le thimfung a pe thar mi lawngte an si. An lung a thawhter tuk hna. Kum 18 a simi poah thimfung pek khawh a si. Kum 18 le kum 24 kar lak i 68% nih Obama an pek. Cun, kum 25 le kum 29 kar lak nih Obama an pek fawn. Kum 65 cung lawnglawng ah McCain nih a tei. Cun, mithar 72% nih Obama an thim fawn. Mitlawm (minorities) hna nih Obama an ttanh ngai. Thimfung a hmuh ning cu Minaak 96%, Latinos 67% le Asians 63% an si. Cun, siangiin tthittha a kai lomi hna thimfung 63% a hmuh fawn.

Obama Biacah (message)

Ram pakhat, miphuun phun khat kan si ti hi a aupi bik. Mirang, minaak, Asian le Latino ti a um lo. American miphun phunkhat kan si, a ti. Miphun thleidannak um loin ram pakhat miphun phunkhat lungput le ram le miphun caah lungrualnak kong a chim bikmi biacah hna an si. America ram ahhin minaak le mirang tiin miphun zeimawzat thleidannak a rak um ti a si i, cu ruang ah cun Martin Luther King chimmi bia le nunnak zong min a rak ngei.

Cun, democrats le republicans le independents ti a um lo, United States of America ti lawnglawng a si ding a si tiah a aupi. Mah party ttanhnak lungput a ngan tuk cang. Party pakhat le pakhat an i do hna. Cucaah hi kong hi thlen a cu cang tiah a ti fawn.

Cucaah a si lai, a tu amah he ttuantti dingin republican chungtel pahnih a lak hna. Bush chan in a ttuan liomi Robert Gates zong a rian a pehter fawn.

Amah he bia tak tein a rak i dohmi Hillary Clinton cu secretary of state ah a thim fawn. Cun, John McCain le bang cu amah upat peknak caah tiin zaan riah dumttinak a tuah piak. Hi ti hin democrat a si ko nain, republican chungtel he hmunkhat ah lungkhat thinkhat tein rian ttuantti aa tim.

Ram Hruaining Kalpimi (policy) Kong Ah:

Ram pakhat khat hruainak kong ah suttung pawlisi phun hnih a um. Ramchung policy (domestic policy) le ramleng policy (foreign policy) an si. Ramchung kong ah pawcawmnak (economy) hi bia tak tein a kalpi lai. Zei dang nak in hi kong hi a biapi bik. Mipi zong nih mah kong ah hin an lungre a theih bik ve. Rian ngei lo an tam chin lengmang. Inn man a pe kho lomi aa karh chin lengmang. Hi kong ah a kut le ke an zoh bik lai.

Ram leng kong ahcun Iraq in American ralkap kir ter in Afghanistan lei ah bia tak tein thazang a chuah hnik. Cun, Israel le Palestine kongah thazang a chuah fawn lai.

Rian Ttuan Dingin Fehternak (inauguration):

Mipi an tam taktak. 1.5 million hrawng an si. A kik tuk nain an tam tthiamtthiam. Lawmhnak mitthli a luang an ti cio. President hlun George W. Bush zong aa lawm. Min ngei deuh ah Collin Powell le Rev. Jesse Jackson an i lawm. Amah a dotu bik John McCain zong aa lawm tuk ve. Fek ngai in dirpi aa tim.

A tlang piin chim ahcun zing lei ah aa pum. Cun, Rick Warren nih thla a cam piak. Cu hnu ah Chief Justice John Roberts nih biakamnak a tuah. Hi biakamnak a tuah lio ah hin a kut orh lei a thlir. Kehlei a kut nih Bible cungah a chuan. A Bible hi a nupi Michelle Obama nih a tlaih piak. Cu hnu ah Rev. Joseph E. Lowery thluachuahnak a pek. Cu hnu ah Obama nih bia a chim.

Obama nihcun kum 1861 lio i President Abraham Lincoln nih a rak hmanmi Library of Congress ah an chiahmi Bible a hman. Bible cauk cung ah cun biakamnak a tuah lio ah a kut a chuan. Amah belte Bible a kau lo.

A luancia caan hi president hlun hna nih Bible cauk cungah an kut an chuanning kong tlawmpal kan zoh hnik lai.

James E. Carter (kum 1977 ah) nih an amah innchungkhar hmaanmi Bible a hman. Mikah 6.8 a kau.

Nannih hmun kip kaa kip i a ummi vialte hna, Pathian nih cun thil ttha kha zeidah a si ti kha an chimh cang ko tung hna; An halmi hna cu, ding tein thil ti le zaangfahnak ngei le na Pathian hmai i toidor tein khuasak pei a si ko cu.

Ronald W. Reagan (kum 1981 le kum1985 ah) nihcun a nu nih a tthenh mi Bible cauk a hman. 2. Chanrelnak 7:14 a kau.

Ka min in kawhmi ka mi hna nih khan an lung an thumh i thla an cam i ka hmai kha an kawl i an lam ttha lo khan an i mer ahcun, van khin ka run theih lai i an sualnak cu ka ngaihthiam hna lai i an ram cu ka damter lai.

George H. W. Bush (kum 1989 ah) nih anmah innchung khar Bible a hman. Matt 5 a kau.

Tlang Cung Cawnpiaknak a si.

William J. Clinton (kum 1993) ah a pi (a pa nu) nih a tthenhmi Bible a hman. Galati 6:8 a kau.

A pumsa duhnak lo ah a tuh ahcun, thihnak kha a zun lai; Thlarau lo ah a tuh ahcun, Thlarau nih zungzal nunnak kha a pek lai.

George W. Bush (kum 2001 le kum 2005) ah amah innchung khar Bible a hman i a kau lo.

President dang hna nih Bible Biakam Thar ah an hmanmi hna cu: Mathai 7:1, Mathai 18:7, Revelation 16:7. James 1:22-23, John 1 I Corinthians 13 Matthew 5:3-11 an si. Biakam Hlun ahcun Proverds le Psalms deuh an hman. Tahchunh ah Proverbs 3:17 Proverbs 21. Proverbs 21:1 Proverbs 16 an si. Psalm cu Psalm 118:11-13.. Psalm 31:1-3 Psalm 121: 1-6. Psalm 91:12-16. I Kings 3:9-11 le Isaiah 11:1-3 zong an hman hna.

Hi tluk in American President hna nih Pathian an zumh. An ram sernak dingah Pathian an i bochan taktak. Vawlei fimthiamnak lawng cun an hna a ngam kho lo. Vawlei thil ti khawhnak lawng in America caah ttuan cu a si kho lo tiah, an zumh.

Biafunnak:

Pawcawmnak kong ah John McCain nakin Obama cu a ti kho deuh lai, an zumh taktak. A ti khawh le khawh lo cu caan nih a chim te lai. Amah Obama fimthiamnak le thil ti khawhnak ruangah president ah thim a si cang. Asinain, American mipi Mirang hna lungput zong zoh chunh awk tlak taktak cu an si. An tam deuh saumau. Anmah hnatlaknak loin president tlin khawh a si lo. Mah hi ram fim, ram tthangcho hna lungput cu a si. Ram hruai ding ahcun a ttuan kho mi poah nih ttuan hna seh, ti hi a si awk te cu a si ko. President i cuh tik zongah keimah ka ti kho bik lai an ti bak ve. Pumpak kong an hrial. Ram hruaining kong an chim. Hi hna hi President Obama thimnak kongah American mipi thinlungput a si tiah ka hmuh.

Senri 2010 By Dr.Zo Tum. Hmung chungta lakchin mi asi,

Be the first to comment

Leave a Reply

Your email address will not be published.


*