President Putin nih “Russia ram him tein khamnak ding caah raltuknak dah ti lo

Russia President Putin Ukraine ram cu kan tei hrimhrim Lai!
===============
Ukraine Operation kan tei hrim lai tiah Russia President nih a chim. Russia President Vladimir Putin nih Moscow nih aa tinhmi le Ukraine Operation cu kan tei hrimhrim lai tiah a chim.

Ukraine Operation ṭha tein tuah khawhnak ding caah Belarus President Alexsandr Lukashenko he biaruah ding in Russia President Vladimir Putin cu Amoeba a phan lio April 12 ah a chim. Mi ram tuk a duhmi hruaitu 2 cu Russia Cosmonautics Day an tuahnak Vostochny Cosmodrome ah an kal.

Russia Cosmonautics Day hi 1961 ah Soviet Astronaut Yiri Gagarin nih Space ah a voikhatnak bik a zuan ni a si.
President Putin nih “Russia ram him tein khamnak ding caah raltuknak dah ti lo a dang thim awk a um lo, Nitlak lei phu nih Moscow a mah te lawng umding in an tuahnak pakpalawng a si hi Russia nih Space lei teinak a hmuhmi hi tette an si” tiah a chim.

Cun, Ukraine Buchara khua ah Russia ralkap nih miphunning in thahnak (Genocide) an tuah tiah puh a simi hi Nitlak lei phu nih thawngpang dik lo an thlahmi a si tiah a chim.

Russia Ral Doh Ding In Zelenskyy Nih Ukraine Mipi A Forh Ṭhan Hna! Russia ralkap hna nih Kiev khuapi an kirtak hnu in Ukraime nichuahlei le thlaklei cu biatak tein a vun kah hoi ṭhan caah Ukraine President Volodymyr Zelenskyy nih cun Ukraine ralkap le mipi hna cu Russia ral doh ding i timhcia tein um ding in a forhfial hna.

Russia ral a lianh chin lengmang lio ah Zelenskyy nih cun ramleng bawmhnak zong biatak tein a kawl cuahmah ve i, UK zong nih nai ah bawmhnak zeimawzat a pek. A ra lai mi zarh ah hin Russia nih biatak tein Ukraine cu a nam ṭhan lai, tiah biachokvai a leng i Ukraine mizapi cu timhcia tein um ding in Zelenskyy nih a cah colh hna.

hrim

Nizan April 11 ah khan Austria Chancellor Karl Nehammer nih cun, February 24 i Russia nih Ukraine a tuk hnu a voikhatnak ah, President Putin cu Moscow ah a va ton. Russia nih Ukraine tuk hnu ah Ukraine mipi nuai 11 leng cu umnak ngei lo in hmun kip ah an zaam hna i, civil mi nunnak tam tuk a liam cang.

Nizan April 10 Zarhpi Ni ah khan Russia nih Ukraine khuapi pakhat Dnipro Airport cu rawk dihlak in a kah ṭhan, tiah Al Jazeera nih a ṭial. Dnipro khuapi hi Dnieper tipi nel ah a um mi a si i, Ukraine ram i thilri serchuahnak (indusrial) hmunpi pakhat a si.

Central Dnipro ramṭhen Governor Valentyn Reznichchenko nih cun, “Russia lei in missile kah kan tong ṭhan i, kan khuapi Airport cu rawk dihlak in an kah; a zei taktak hmanh a taang ti lo. Russia missile pawl cu atu le tu van ah an zuang peng ko,” tiah nizan zarhpi ni ah a chim. Russia missile nih cun Povlorad District i inn pakhat zong a khen caah mibawmchantu 5 hliam an tuar i, innchung thilri tampi an rawk.

Russia ralkap lei nih missile an kahnak kong he pehtlai in thawng an thanh colh ve i, Zonetsky khuapi ah Ukrainian ralhriam chiahnak hmunpi pakhat cu rawk dihlak in an kah kong an langhter. “Hi Ukraine ralhriam hmunpi kan kah mi ah hin ramleng in ralhriam bawmhnak an hmuh mi tampi zong an i tel,” tiah an chim.

Nizan Zarhpi ni ah khan Ukraine President Volodymyr Zelenskyy nih cun, “Germany Chanchellor Olaf Scholz he Russia ram chuak gas phihkhar kong kan ceih,” tiah twitter ah a ṭial. Sinain Germany lei nih cun Russia gas phihkhar kong ah biafang zeihmanh an thanh rih lo.

Russia nih Ukraine a tuk hnu in Germany nih Russia sin ah oil a cawk mi 35%(zatuak ah sawmthum panga) cu 25% in a niamter cang. Germany hi Russia oil a cawtu ram ngan pakhat a si caah Russia phihkharnak a tuah ahcun Russia ca ah sungzawtlaknak nganpi a si kho. Sinain Germany nih Russia oil phihkhar a duh ahcun ramdang in oil laknak ding le a herhhai mi thilri tampi a zalh hmasa a hau lai.

Ukraine khualipi Kiev pawng Bozova khuate ah Ukraine civil mi a tomtom in an phum hna nak thlankhur pakhat April 9 ah kan hmuh ṭhan, tiah Ukraine nawlngeitu pakhat nih a chim. Hi hmun hi Russia ralkap nih an lak i zarhkhat hrawng umhmun an khuar hnu ah an chuahtak mi hmun a si, tiah a chim chih.

Mithi ruak pawl hi Datsi (petrol) dawr kam lutihor(tiluhor) kuang ah kan hmuh hna i Bozova khua le a dang khuate komh in khuatekomh ukbawi a ṭuantu Terres Didich nih a chim i, miruak zeizat si ti hngalh a si rih lo, tiah a chim chap.

April thla thok hrawng ah khan Bozova khuachung le a pawngkam hrawng ah mithi ruak 30 hrawng an rak char bal cang tiah Ukraine media pawl nih am langhter. Atu ah cun Russia ralkap kut in Kiev khuapi kam hmunhma khuapi le khuate hna cu Ukraine ralkap kut a phan ṭhan cang.

Cu hmun hrawng ah cun Civil mi ruak a tomtom in an phum hnanak hmun/ thlan an hmuh pah lengmang caah ram kip nih iRussia mawh an chiat. A hlei in Bucha khuapi ah civil ruak tamtuk hmuh a sinak kong ah Russia cu ramkip nih fak piin mawh an chiat. Credit: The Chin Post

Good News: President Zelenskiy le Prime Minister Boris Johnson cu tonnak an ngeih cang! Ukraine President Volodymyr Zelenskiy le British Prime Minister Boris Johnson cu nihin ni ah meeting hlan ah an i ton i, kuttlaihnak zong an ngeih kho, tiah thawngpang theih asi. Ukraine ram le British ram hnih karlak ah pehtlaihnak tha chinchin in ser khawhnak dingah abiapi tuk hringhran.

British Prime Minister Boris Johnson cu Ukraine ram a tong lio a si i, President Zelenskyi he pumpak in an ton kho, tiah thawngpang theih a si. Ukrainian mipi cu i hlumte in umnak le lung khah tein kan in dirkamh hna, tiah a langhter.

British Prime Minister Boris Johnson le Ukraine President Volodymyr Zelenskiy cu tonnak an ngeih lai i, British ram nih Ukraine caan sau bawmhchan khawhnak kong le atu a kal lio ah hin zeimawzat bawmhnak zong a pek lai, tiah zumh a si. British ram le ralkap hriamnam lei zong in tampi a bawmh chi lai, tiah zumh cio a si.

Ukraine tuknak ni 44 chung ah kan ralkap tamtuk an nunnak a liam cang, tiah Russia nih a chim i, atutan hi a voikhatnak bik “Ukraine ah kan ralkap tampi an thi” tiah Russia nih an chim hmasa bik a si.

Ukraine ram i kan ralkap tamtuk an thih hi Russia caah a fak tuk mi ngaihchiatnak a si, tiah Russia President aiawh in biachimnak nawlngeitu Demetripeskov nih April 7 ah Sky News thawngzamh sin ah a chim i, atu hnu ni tlawmpal ah Ukraine ah Russia nih kan i hmaithlak mi kan hmuh cang lai, tiah a chim chih.

Ukraine tuknak ah Russia ralkap 1,351 an nunnak a liam cang, tiah Russia Defence Ministry nih March 25 ah a rak thanh nain Ukraine nih cun Russia ralkap 19,000 deng kan nawn cang cang, hna tiah an chim ve. Kaphnih nih an thanh ning aa dan pinah aa thlau tuk i aho deuh thanh mi dah zumh a tlak ti chim khawh a si lo nain Nitlaklei ram pawl nih cun Ukraine tuknak ah Russia ralkap a thi mi hi 7000-15000 hrawng an si lai tiah an ruahdamh.

Demetripeskov nih cun Ukraine tuknak hi a si khawh chung in ngolter kan i zuam ve ko, a rauh hlan ah Ukraine kan tuk hnawh chan mi kan hmuh cang lai i Ukraine – Russia palai tonnak zong an hlawh a tling chom lai, tiah a chim chap.

Tutan cu sau nawn in van ttial ning mu. Russia ralkap hi ruahning bantuk in an rak tthawng lo. Lenglang ruah ning tluk in an rak tthawng taktak lo ti kha mi tampi ruah ning asi. Ukraine ralkap nih an khuapi cheukhat Russia kut in an lak tthan thluahmah. Russia ralkap thong tampi inn tlung ti in an liam. An vanlawng, raltuknak tank, helicopters tamtuk a lo.

Ukraine a ning piin lak khawh ding an izumh ti lo caah Ukraine nichuah lei um Donbas region lei tu focus tuah in kan nam cang lai an ti. Cutin Ukraine khuapi lak ding an hmuitinh cu an chuah tak i nichuah lei ah retreat an tuah. Russia thazaang le Ukraine thazaang van zoh ta hmanh sih;

Active soldiers: Russia 900000 Ukraine 209000, Reserved soldiers: Russia 2000000 Ukraine 900000, Fighter jets: Russia 1379 Ukraine 125, Heavy artillery: Russia 4684 Ukraine 1122, Tank vehicles: Russia 3170 Ukraine 927, Raltuknak tinbaw: Russia 31 Ukraine 1, Storm tank: Russia 5220 Ukraine 1184, Hitluk in thazaang ai thlau ko mi

zeiruangah hitin Russia an der hnga i Ukraine a lak khawh lo ti mi ah thiamsang pawl nih an chim ning cu hitin asi;
Russia ralkap chung ah corruption a tam tuk i a chung in mum nih a ei bantukin an rop an ti. Feb 26 ah Ukraine cozah nih an rak chim mi cu Russia nih hmanding in an chiah mi raltuknak tank pawl pahra ah pakhat lawng an hmanh khawh an ti. Aruang cu a chung thil le engine pawl kha an ralkap lila nih an rak zuar, an rak ei dih ti asi. Russia hi Transparency International nih a langh ter ning ah vawleicung a corrupt bik ram pawl ah ai tel ve.

An moral a tla, a niam. A hramthok tein corruption a tam ahcun moral a niam cia cang. Cupinah Putin nih Ukraine ah a thlah mi hna ralkap tampi cu Ukraine ah raltuk ding in an kal kha an thei lo, information va lak ding sawhsawh ah kan kal tiin an ruah ti asi. Cunglei order in ral an van tuk taktak tik le Ukraine lei nih moral tthawng tuk in an rak doh hna tik ah an rak iruah ning asi ti lo i an moral a tla colh ti asi. An ralkap tampi cu zeiruang ah Ukraine ral kan tuk ti zong an fiang lo ti asi.

Cunih offensive war taktak an van luh tik ah an moral a cak kho ti lo. Mah zawn ahhin NATO ram ralkap le Russia ralkap ai dannak an chim mi cu; NATO ram pawl cu assignment-based leadership asi i tanglei ralkap kha zeidah tuah ding ti mi le zeiruang ah ti kha chimh dih an si i zeitin na tuah lai ti kha chimh asi lo ti asi. Zeiruangah na tuah lai ti kha zeitin na tuah lai ti mi nak in a biapi deuh zungzal ti si. Russia tu cu “zeiruangah” ti kha tanglei minung nih an i fian lo tik ah an moral a cak kho lo ti si.

Ral hmai a kal mi kha hnulei in an herh mi an pe chan kho hna lo (logistical failure). Ukraine lei hi an tactic a rak ttha ve. Ral hmai a kal mi Russia ralkap kha hnulei in pechan kho lo ding in chah khawh an izuam. Ral hmaikal nih an herh mi thilri (ammunition, fuel tbk) hnu lei in an pe chan kho hna lo. Russia nih an ral hmai kal pawl herhmi pechan tu ding ah 5 columns bak in an thlah mi trucks pawl cu an duhnak hmun an phan kho lo.

Russian generals tam tuk an thi. Atu tiang ah Russian generals hi paruk an thi cang. World War 2 lio ah ral a dih tiang ah US generals 10 an rak thi ve i cu hna cu ruah lo piin Pearl Harbor Japan nih a rak kah nak in a thi mi an tam. Russia tu cu anmah bak nih an iremh an iremh i an fa fuh mi ah caan rau lo ah generals 6 an thih tik ah strategy fak piin an ipalh ko ti a lang i cu nih cun an tanglei ralkap pawl moral zong a zawr ter ti asi.

Russian ruble tu cu an control khawh ngai. Ukraine a tuk tlawmpal ah nitlak ram pawl nih fak taktak in economic sanctions an pek ruang ah Russian phaisa cu 60% bak in a man a rak tla i 1 USD ah 150 ruble tiang a tla. Cu le kangka in, Russian nih leklak an economy a pur lo nak ding, an phaisa fak pi a tlak lo nak ding, thilman fak tuk a kai lo nak ding tiin action an van lak colh ve.

Interest rate kha 20% an kai ter colh, Russian companies vialte nih ramdang currency an ngeih mi kha Russian phaisa ah an thlen ter dih hna, an cozah nih currency market ah ramdang phaisa cawk lo ding in an phih. Cutin an van cawl ve ruang ah Russian ruble cu a man a kai tthan i a tu hi 1 USD ah 80 ruble asi tthan cang (ralthawh hlan level he ai khat luklak). An i ven ning hi economic theories umtuning te asi ko. Cucaah fak deuh in sanctions tuah chap ding in an aupi cuahmah. Credit: Sangukceu Zinhlawng

Be the first to comment

Leave a Reply

Your email address will not be published.


*