Putin nih EU le vawlei pumpi buaiter ai tinh mi hi ttihnung ngai asi i ai tinh mi hi dot-thum in a um!

Putin nih EU le vawlei pumpi buaiter ai tinh mi hi ttihnung ngai asi i ai tinh mi hi dot-thum in a um!
=======
Kan hnung te ah Putin nih nitlak lei sanctions tuah mi lehrulhnak ah Ukraine’s blockaded Black Sea kha a phih kanh hna i Africa le Middle East ram pawl kha rawlttam ding in ”kidnap” a tuah hna tiah ka rak ttial. Cu he pehtlai in Yale-professor Timothy Snyder (American historian asi i Central and Eastern Europe kong specialize a tuah mi) nih a chim mi ka van in hromh hmanh hna la.

Nitlak lei ram USA le EU hi biatak te buaiter, lungfim loin tuah ding khi Putin nih ai zuam lai i cucu bom le rocket a hmang lai lo, hriamnam phundang tu a hman lai ti asi. Cucu zeitin a tuah lai tiah cun; Ukraine le Russia nih ramleng ah an kuat mi tawn mi kawm le grain timi ah ai tel mi tirawl vialte kha kuatnak lam phih dih i Africa le Middle East minung an rawl ttam ter, cu hnu ah Africa le Middle East in ralzaam kha EU ah a bungh bak in an i bung lai.

EU kha awlokchong in an um lai, a ti awk an theih ti lo hnu ah buainak (crisis) chanhtu dirhmun ah Russia nih hmunhma lak khawh ding khi ai zuam lai ti asi. Mah ti hin Putin nih nitlak lei ram pawl sanctions le Ukraine an bomhnak kong ah lehrulhnak fak bik a tuah khawh mi asi tiah Timothy Snyder nih a ti. A chim rih mi cu; Putin nih Ukraine lawng hi hrawh ai zuam mi asi lo, nitlak ram EU le vawlei pumpi buaiter ai tinh mi hi ttihnung ngai asi i ai tinh mi hi dot-thum in a um a ti.

Pakhatnak ah Ukraine hi state pakhat an si nak kha hrawh piak, pahnihnak ah lam le sul vialte hrawh piak dih i ramdang ah Ukraine nih a chuahmi tirawl vialte ramleng ah kua kho loin tuah i Ukraine nih export a tuah mi tirawl hngatchan in a um mi ram pawl ah mangttam tlun ter i buainak chuah ter. Cuhnu ah EU le nitlak ram pawl kha ralzaam buai in buai ter. A donghnak ah vawlei pumpi ah mangttam tlunter (worldwide famine) khi Putin nih Ukraine a tuknak phen ah ai tinh mi asi tiah Timothy Snyder nih a ti.

Thil umtuning zoh tik ah hi pa chim mi hi zumh a um ngai ko. Kan hnung te ah Germany caan sau pi a hruaitu Angela Merkel nih Putin hi vawlei in a pheu bak i pheu ding phun asi deuh lo e ati. A chim duhnak cu tongte pheu i pheu ahcun thlachiat ruat lo ttihnung ngai phun asi caah Europe le vawlei pi caah thil poi tampi a chuak pi lai ti deuh khi asi (Angela Markel cu caan sautuk Europe a hruaitu asi i Putin sining a thei bik asi lai an ti mi asi). Cheukhat experts nih cun tulio Russia-Ukraine ralthawhnak hi vawlei ralpi pakhatnak lio thil sining he ai khat ngai cang an ti.

Energy crisis: Nizan ah Norway petrol man cu litre pakhat ah 27.36 kr a phan. A luan cia kum 2 hrawng ah litre pakhat ah 15 kr hrawng asi tawn i a let bak in a kai cang ti nak asi. US hi a buaktlak in $ 5 per gallon asi ve rua i hmun tampi ah $ 6 per gallon a phan ve rua. Nain Europe lei nak cun a deng deuh rih. Gallon pakhat ah 3.79 litre a um. Norway ahcun litre in rawn asi. Litre pakhat ah 27.36 kr asi ahcun gallon pakhat ahcun 103.69 kr asi hnga i USD in van thlen ahcun $ 11.52 asi hnga. Cucaah US lei nak in letkhat in a fak deuh ti nak asi. Hi pin zong ahhin a kai deuhdeuh kho mi asi rih.

International Energy Agency (IEA) nih 1970-1980 kar ah rak ton mi oil crisis nak fak kan tong kho tiah an thanh. 1970 hrawng kha cu oil crisis lawng asi, atu cu caan khat teah oil crisis, gas crisis, electricity crisis tiin ton asi caah mipi nih kan tuar ning a fak khun an ti (NRK). Rang tuk in hitin oil & gas man a kainak ruang hi Russia-Ukraine war ruang ah asi bik ko. Electricity crisis hi cu a ruang tampi ai cawh (ral thawh hlan in ai thok cang mi asi).

Putin nih Russian gas import a tuah mi poah nih Russian Rubel in nan pek lai, Rubel in a pe duh lo mi poah cu gas supply kan in phih kanh hna lai a rak ti hna. Hnatlaknak an rak tuah ning ah Russian phaisa in pek ding ti asi lo caah ram tampi nih an duh ve lo. Cucaah Poland, Bulgaria, Finland cu gas supply a phih kanh cang hna. Denmark zong a phih kanh ve lai ti asi. Nain Denmark nih Russian natural gas a cawk mi cu natural gas an hman mi dihlak chung ah 18% lawng asi caah kan zei a poi lai lo, mahhi 18% hi cu ramdang supply-chain in airolh khawh asi ko an ti.

Global food crisis: Russia le Ukraine war ruang ah fak ngai in food crisis a chuak ve. Russia le Ukraine chuah mi changvut (wheat) hi vawlei pumpi ah chuah mi dihlak i thumchuah khat asi. Cu pin ah Ukraine hi kawm(corn) le necia chiti (sunflower oil) a chuah tu major exporter asi fawn. Ukraine nih a chuah mi thil kha Black Sea rili tan in Africa, Middle East, Asia lei ah a kuat tawn i an rampi phaisa hmuhnak hram asi ve.

Cu Ukraine nih changvut (wheat) a kuat tawnnak Black Sea port cu Russia nih an phih kanh hna i export an tuah kho ti lo (The Guardian). Russia nih sanctions nan phoih deuh ahcun Ukraine’s blockaded Black Sea hi ka on ko lai a ti hna (western sanctions hi kan i ready tuk cia mi asi, kan zei a poi lai lo an ti mi kha a tak ah an i muai ve ko ti nak asi). Phundanng chim ahcun Putin nih Ukraine teinak ah a lam a hmuh mi poah a hman ve i sanctions phoih piak nak ding ah export an tuah nak ram pawl kha Black Sea lam phih piak in “kidnap” a tuah hna.

Cu ruang ah Africa le Middle East lei cu zingzan an ei tawn mi tirawl an nei ti lo, a um hnihchun zong a man a kai tuk caah zapi nih an caw kho ti lo ti asi. Africa le bang cu mangttam a tlung cuahmah ko ti asi. The Guardian news article ttial tu nih tulio vawlei thil sining hi apocalypse (catastrophic destruction) he a tahchunh i khuaruah awk tam ngai khin a um.

Cyberattack:Russia nih Ukraine ram hriannam in a bawm mi ram poah cu hi ralthawhnak ah nan itel ve tiah kan ruah lai an ti lengmang. Nai te ah Finland le Sweden cu tulio thil sining an zoh lengmang tik ah NATO ah kan luh ve a hau ko an ti i NATO luhnak an sawk (Turkey nih a block hna, an buai cuahmah lio asi). Finland le Sweden nih NATO luhnak an sawh lengka Russia ai hro colh ve. Dai tein kan um lai lo, lehrulhnak an ton hrimhrim lai an ti.

Thiamsang pawl nih an ruah mi cu Russia nih NATO ram pawl le Ukraine a ttanpi tu pawl hi a phun2 in lehrulhnak tuah ai zuam lai i rianrang in a tuah lai tiah an zumh mi cu cyberattack hi asi (Cyberattack ahhin Russia, China, N.Korea pawl hi an ti kho ngai). Cucaah cyberattack hi cuhlan nak in a tam deuh ngaingai lai tiah thiamsang hna nih an ruah (abc/nyheter). Credit: Sangukceu Zinhlawng

Be the first to comment

Leave a Reply

Your email address will not be published.


*