Putin nih Ukraine Mipi pawl anmah le mah Ukraine Ralkap Dohter a Timh hna!
=========
Ukraine ram cheukhat i Putin nih a chuahmi Martial Law ruangah Ukraine mipi pawl hi an Ukraine ralkap pawl ralchanh in Putin caah ral an tu te kho men, tiin mifim pakhat nih a chim. Ukraine pengkulh 4 ah Wednesday ah khan Putin nih Martial law a thanh. Martial Law, timi cu ‘mipi (civil) cozah kha ralkap cozah nih hranhram in nawlngeihnak an chuh hna’ tinak a si.
Tutan Martial Law tangah zeibantuk karhlannak dah tuah a si lai, timi kongkau belte Putin nih a langhter colh lo. Sikan belte rengh chinchin dawh in a um. Khuatlawn le mipi i tonnak hna hi kham i police kut ah nawlngeihnak tamdeuh in pek dawhdang a si, tiah the Associated Press nih a chim. Martial law cu nihin Thursday in cun a tak in hman a si cang lai i, pengkulh 4 i khuasa Ukraine mipi pawl hi Russia ralkap uknak le nawlpeknak tangah an um cang lai, tiah William Reno nih a chim.
Ukraine mipi hi an Ukraine ralkap pawl doh dingin hnek an si ah cun, mah hi pengkulh 4 lak thanh le fonh than dingin Ukraine cozah nih thazaang a chuahmi hi hnahnawhpek a tong ngai te kho mi a si. Russia lei a tang le tanglo, tiin buainak a chuak te hrimhrim fawn la. Mah bantuk karhlannak hi zoh a chia ngaimi thil a si te lai, tiin tuanbia nih a chimchung cang, tiin Reno nih a chim.
Ralkap 300,000 khomhsuat rian cu Putin nih Russia ah a kalpi cuahmah ko rih. Hihnu zarh 2 ah cun a zat kan tlinh cang ko lai, tiin Putin nih a chim. Martial law a chuah ruangah, pengkulh 4 chungum Ukraine mipi hi a dang Ukraine mipi he then an si cang lai. Mah bantuk i hranhram in ram mipi sinin a dang rammi then hi khahlan Soviet nih a hman zungzalmi phung a si. Tutan zongah Russia kut a phanmi pengkulh paoh ah cun mah bantuk phung hi kalpi dawhdang an si ko cang, tiin Reno nih a chim.
Pengkulh 4 i Martial law a sernak a ruang pakhat cu, mah hi pengkulh hna hi a zungzal in Russia ta an si cang, ti langhter a duh caah a si. Asinain, mah ti thawngthanhnak a tuah ruang i a zun dingmi theipar cu, kadohnak ngol in cabuai cung biaruahnak kan ngei lai, tiin khua an khanmi hi a buaiter chinchin cang lai, tinak a si.
Kan hnung thla tiangah khan cun mah hi pengkulh 4 hna hi an ningpi in Russia nih a lakmi pakhat hmanh an um rih lo, tiin Newsweek nih a thanh. Kherson le Donetsk he ti bantuk pengkulh le bangah cun Ukraine nih an detkhawt ngaingai hna. Ukraine President Zelensky nih Feb. 24 i nawl a chuah tein khan Ukraine mipi hi Martial Law tangah an um diam cang, tiin University of Michigan i prof. Yuri Zhukov nih a chim.
Ukraine pumpi ah Putin nih Martial law a thanh cang. Cucaah kan Ukraine ralkap pawl nih ‘mi vialte tei’ dih dingin kar an hlang cuahmah, tiin Zelensky nih a chim. Kan lak cangmi hmunhma, timi min bunh riangmang in Russia phung tangah zeizong vialte tawlrel a duh cang caah, a tu bantukin Putin nih nawl a chuah colh hi a si.
Capar ningah cun, Martial law hi Russia le Ukraine ah thanh a si diam cang: ram luh, chuahtak an kham, ram chungah mipi pumhkhomh an kham, zalong tein holhnak nawl an kham, a cheukhat ramkhel party an kham hna, election le referendum tuah lo dingin an kham, ram runvennak caah pumpak thilri lakpiak khawhnak nawl an chuah diam cang. Cucaah, tutan Martial law thanh ruangah mipi khuasaknak hi zei ti piin ai thleidang hlei lai ka zum lo, tiin Zhukov nih a chim.
Asinain, Putin nih pengkulh 4 i martial law a thanh ruangah hin, mah ka a ummi Ukraine pawl hi amah duhning tein a tawlrel cang hna lai i, an Ukraine ralkap pawl lila kha a dohter te hna lai. Cun an pumpak thilri zong a chuh khawh cang hna lai. Asinain, mah vialte zong cu tuan tein khan Russia nih tuah a thok dih cang ko hna. Mah nak in a chiakha deuhmi tuahsernak hmanh a kalpi diam ko cang cu ta, tiin Zhukov nih a chim.
Cun mah ti i Martial law a chuahnak a ruang pakhat a um rih mi cu, Ukraine pengkulh 4 ka lammi kongah zeitluk in dah kai biatak, tihi amah a tanhtu hna sinah theihter a duh caah a si. Ukraine vawlei ah Russia ralkap pawl sungh lawngte nolhcip in an renh cuahmah cang caah, laihlum Russia ramkhel pawl nih an tuahtuanmi a theipar hna cu a si khawh chungin a hmaimilhpiaknak lam lawngte an kawl ve.
Putin thanhmi martial law nih Ukraine ah zeihmanh a thlenter khawhmi a um lo. An sin a phanmi pengkulh pawl lak kan i tinhmi rian zong kan kalpi peng ko rih, tiin Ukraine presidential adviser Mykhailo Podolyak nih a chim. Credit: Chelsea Bawi
Leave a Reply