Putin nih Ukraine ral hi a tei hrimhrim lai lo!

Update (May 26, 22)
=======
Russia ral cu ai peh cuahmah ko rih. Ukraine khuapi Kiev an kir tak, an khuapi pahnihnak Kharkiv zong an kir tak i Ukraine nichuah ramri lei khi lak thlu khawh ding in biatak tein an nam tthan ti asi. Kan hnung te ah Ukraine ramri an khuapi pakhat Mariupol zong Russian missiles an tuar khawh ti lo caah Russia nih an lak.

Russia nih caan tawite chung ah Ukraine khuapi lak i cu hnu ah Ukraine ram dihlak lak ding ai timh mi a tlamltin ti lo caah strategy a thlen i caan sau a rau mi ralthawhnak (protracted war) lei ah strategy a thlen ti asi. Ukraine a tuk nak ah tamtuk sunghnak a ton cang caah cu a sungh cang mi chung in lesson tampi lak ve dawh asi, i.e., Moskva Warship cu Ukraine nih Black Sea ah pil lak in an kah hnu in an raltuknak tinbaw vialte Ukrainain missiles phak khawh lo nak hmun ah an chiah hna (an i ralring deuh ngai cang).

Atu tiang Ukraine – Russia ralthawhnak kan zoh tik ah Putin nih kan sung a ti duh bak lo nain an sung ti khawh asi ko. Ukraine ah Russia sungh zatlaknak a ruang hi diplomat biafang cun “strategic error” an ti. Voikhat bel te April 7 ah Putin aiawh chimnak nawl ngei Dmitrij Peskov nih ”kan ralkap nih Ukraine ram ah sungh zatlaknak fak piin an tuar” tiah a rak chim, nain ral kan sung ti cu nihin tiang an cohlang lo. NATO/EU tuak ning ah Russia ralkap 40000 an tlau i hi chung ah 7000 – 15000 kar hi a thi cang mi an si lai tiah an ruah.

Ukraine cozah nih cun Russia ralkap 28000 hrawng an thi lai an ti ve. Russia nih (Soviet Union asi lio) Afghanistan a tuk lio kum 9 chung ah a ralkap 15000 an rak thi. Tutan Ukraine he an i tuknak ahcun thla hnih chung ah a ralkap 15000 an thi. Ukraine president chim ning ah Russia nih Ukraine ah a sungh cang mi cu; raktuknak tanks 1000, raltuknak vanlawng (aircraft) 200 le raltuknak hriam bunh mi motor (armored vehicles) 2500 asi cang ati (Dagbladet). Cu pin ah Black Sea rili control nak an hman mi le an i uan ngai mi Moskva warship an sung, an ralkap rengsang 9 generals an sung. Sungh fak ngaingai asi ve cang nain nihin tiang Putin cawlcangh ning zoh tik ah a sung pek ai tim lo.

NATO/EU ram nih Ukraine sin ah hriam an kuat mi a phak khawh lo nak hnga Ukraine tlanglawng lam (railway lines) kha biatak tein Russia nih missiles in a kah ve. Cucaah Europe le US kuat mi hriamnam an duhnak phak ter ding (transporting weapons) caah challenge ngaingai asi ve ti asi. Hriam ngan tthatha (tank-kaa tbk) an bomh mi hna hi “front line” ah kuat a hau hoi i rianrang in Ukraine nichuah ramri lei “front line” phak ter kha thil har ngai asi ve ti asi.

Nai te ah military expert asi i historian zong asi mi expert pakhat Jacob Skaarborg nih phundang ngai in a tu ral kong hi a van chim ve. A nih hi Denmark’s military intelligence service ah kum 26 a ttuan mi asi. A nih chim ning ahcun; Russia cu ralthawh ai thok ka poah ah ai tinh ning in a kal bal lo, ai chuah sual lengmang nain a hnu ah ai hrim tthan tawn i a ral kha an tha dawng lak in a tuah khawh tthan tawn hna.

Tutan zong hi Russia hi ai hrim tthan lai i a mah nih a tei te ko lai a ti. A chim rih mi cu; NATO/EU nih hriamnam an bomh mi hi ralthawhnak caan a sauh ter tu asi. Zoh u ca, a tu ah Donbas-region le Luhansk ah Russian missiles nih a target 40 hrawng a khen khawh i fak taktak in a phomh cang hna. Nitlak ram nih hriamnam an bomh mi hi Ukraine le Russia deihnak-biaruahnak caah dawntu asi. Ral deihnak ding caah a herh mi biaruahnak tuah kho lo in rawhnak le thihnak tam deuh a chuah ter tu pei asi ko cu tiah a van ti bak ve.

A chim rih mi cu; Russia nih Ukraine ram dihlak a la kho lai lo, nain Ukraine nichuah ramri lei khi tam deuh in a lak te lai tiah a ti (VG). Cu lio ah German Chancellor Olaf Scholz nih cun “Putin nih Ukraine ral hi a tei hrimhrim lai lo” tiah Davos ah an tuah lio mi World Economic Forum ah a chim ve. Hi vial in si rih seh. Hnu deuh ah Russia nih zeitindah nitlak ram pawl le Ukraine a bawm tu response a tuah hna ti mi ka van ttial tthan te la. Credit: Sangukceu Zinhlawng

Be the first to comment

Leave a Reply

Your email address will not be published.


*