Putin ral le MAH ral hi update ka dawi peng ko!

Putin ral le MAH ral hi update ka dawi peng ko!
===========
Putin ral le MAH ral hi update ka dawi peng ko. Keimah hmuh ning te cun Putin zong a sung lai, MAH zong a sung lai. Putin hi a sung ti khawh a si cang nain “ral ka sung” ti kha a duh bak ve lo caah i silhnalh nak ah a lak khawh vial regions zeimawzat kha lak i kan i timh ning in kan tei ko tiin Russia mipi hmai ah i hmaimilh ai zuam. Kawlram zong hi a kakip in offensive war in an van nam deuhdeuh cang hna le a tuan le tlai lawng a tang ko cang tiin ka ruah.

Phan awk ngai in a um mi tu cu; Putin nih tactical nuclear weapon a hmang taktak sual la maw ti hi a si. Nuclear weapons ahhin phun 2 a um. Phunkhat cu tactical nuclear weapon a si i dindeuh in a puak mi, lamhlat a phan lo mi, battlefield deuh ah hman mi a si. Phunkhat cu strategic nuclear weapon ti a si i lamhlat a phan mi, a puah ning a fak taktak mi, vawlei pumpi a phan kho dih mi a si. Strategic nuclear siloin tactical nuclear hi Putin nih vansan le thinhun lung in a hman taktak te khawh mi a si ko tiah experts pawl nih an thinphan nak an chim cio.

Ukraine nichuah lei i tuknak a fahnak hmun 4 regions kha Putin nih Russia ramchung ah an i tel cang tiah cacawn ninga ahkhan cohlannak puai a tuah. Hi zong hi Putin thluak a si ve. Russian lei ttang zeimawzat an um ve nak a si caah phung ning lo in mipi lunglaknak (Russia ah kan i fawn lai maw fawn lo ti mi referendum) an tuah ter hna i cu ning cun Russia ram ah Putin nih a khumh cang hna (annex a tuah). Moskva khuapi ah conglomhnak puai an tuah thaizing ah Donetsk region chung um Russia ram chung ah a um cang tiah a thanh cang mi Lyman khua cu Ukraine ralkap nih an lak tthan. Khua chung ah Russian ralkap 5000 hrawng cu an erh-khumh hna i an cawl kho ti lo.

Russian ralkap nih a si kho ti lo ti an theih in Lyman khua kha dai tein zaam tak ding in Ukraine cu an nawl hna ti a si. Ukraine nih an duh naisai ve ti lo (hitluk nan kan tuahto hnu ah ti a si lai cu). An kah chih thluamah hna i Russian ralkap pakhat hmanh tang lo in Lyman khua cu an chuah tak cang ti a si. Russia ram chung ah an i tel cang tiah puai an tuah dih bak in van lak tthan colh cu Putin a thin a linh in a lin lai i zeitin a lehrulh lai ti kha an ruah cio mi a si. Lyman khua lawng asi loh, Kherson region lei zong ah Ukraine nih an tei cuahmah hna.

An phan mi cu; Putin nih 4 regions kha Russia ram chung ah cohlannak a tuah cang i Putin cozah caah Russia ram chung a si cang caah kan ramchung, kan territory an kan det khawt, chuh an kan timh tiin an neih mi hriamnam poahpoah a hmang taktak sual la maw ti kha an ruat cio. Zeicatiah kan hnung te zong ah Putin minung Russian president hlun (a tu cu defense lutlai a si cang) nih nitlak ram lei nan neih mi nak hriamttha tampi kan nei. A herh ahcun kan neih mi hriamttha hman ding in ready kan si tiin a rak i hro bal cang (a chim duh mi kha nuclear weapon asi tiah an rak ruah cio).

Nain, Washington cozah nih cun nuclear weapon cu an hmang ngam taktak lai lo an ti peng ve. Zeicatiah Washington cozah le Kremlin cozah (Russia cozah umnak hi Kremlin a si i Kremlin cozah ti zing in an kawh) hi a tu ral kong ah direct bak in zingzan an i chawn peng ti a si. Russia nih nuclear weapon nan hman ahcun lehrulh colh ding in ready kan si, fak tuk in nan tuar ve lai tiah Washington cozah nih an ti ve hna caah Putin nih a hmang ngam taktak lai lo an ti ve.

A cheu nih, Putin hi a tu ning cun hnubik Russian Tsar pennak (emperor Nikolaj II pennak) a dih phun le an thah phun khan a pennak dihnak ding lam a nai cang i Nikolaj II an thah ning phun i a caan dongh ter nak cun nuclear weapon zong hi a hman taktak khawh mi a si ko an ti ve. Credit: Sangukceu Zinhlawng

Be the first to comment

Leave a Reply

Your email address will not be published.


*