Pyu Saw Htee nih PDF cu Ralhrang ah an ruah hna i ngaihthiam an hal hna!

Pyu Saw Htee nih PDF cu Ralhrang ah an ruah hna i ngaihthiam an hal hna!
=========
Mandalay ramtthen Mingyan peng ah ralhrang kuttang um Pyu Saw Htee hna nih PDF pawl cu khua luhnak hauka in an rak bawh hna i an karlak kahdohnak a chuak.

A liamcia Pur 16 lio ah khan khuate pakhat i Pyu Saw Htee hruaitu pa va kah awk i an kal lio ah khua luhnak hauka in Pyu Saw Htee nih cun an rak kah hna caah kah karlak kahdohnak a chuak i Pyu Saw Htee minung 6 an thi tiah MRA nih an langhter.

Cu kahdohnak ahcun uniform ai hruh dih mi PDF nih cun nan khua kan rat ah hi ti hin maw nan kan don lai tiah an van ti hna i, Pyu Saw Htee nih cun an pu le SAC ralkap ah an ruah hna caah “aw,,,nanmah nan si kan thei lo le a si, kan ngai thiam hram u…” tiah an ti hna.

Mizapi ralkap MRA nih cu SAC ralkap ah an ruah hna i ngaihthiam an hal hna hnu ah PDF nih cun an kah hna i Pyu Saw Htee hruaitu pa le ralhrang khua bawi pa telh in minung 6 an thi i, tam nawn hliam an tuar tiah an langhter.

Tamu ah Pyu Saw Htee nih mi sawhsawh pakhat meithal in an kah thah. SAC ralkap kuttang um Pyu Saw Htee nih nizaan zing ah khan Tamu khuapi chung i Kethum ngei a khaltu pa cu meithal in an kah i a nunnak a liam tiah theih a si.

Nizaan Pur 19 zingah Tamu khuapi Pyu Saw Htee an umnak sang pakhat ah Kethum ngei mawtaw a khaktu pa cu meithal in zuun 19 bak in an kah caah a nunnak liam. “Pyu Saw Htee nih an congh mi gate ah a dir duh lo caah meithal in an kah nak a si. Hi sang ahhin Pyu Saw Htee lawng te an umnak a si” tiah khuami pakhat nih a chim.

An thah mi pa hi Tamu khuapi um mi Pu Wine Tyint a si i kethum ngei khalh in ai cawm mi a si. Tamu hrawng ahhin SAC le Pyu Saw Htee nih Motorcycle man siseh mawtaw man tiang an khawlh hna tiah theih a si.

Zuu a ding mi SAC palik cu AA nih an va tlaih hna. Rakhine ram Kyauktaw khuapi SAC palik camp in Palik 3 cu Beer an din lio ah AA nih cun an va tlaih hna tiah theih a si.

“Tuchun Pur 20 zaanlei sml 6:00pm hrawng ah Kyauktaw khuapi SAC palik camp in palik bawi tel in SAC palik minung 3 cu beer an din lio ah Arakan Army (AA) nih an tlaih hna i an kal pi hna tiah mit in a hmutu nih Western News ah an chim. Asinain an tlaih mi SAC palik minung 3 hna i an min le an sining cu Western News nih langhter mi zei a ngei lo.

Mizoram ah NUG bawmhnak India phaisa Sing 90 a tlau tiah chim. Vawlei cung hmunkip in NUG sin ah rak thawh mi phaisa Sing 90 rupees cu Mizoram ah a tlau tiah MP hlun Pu Aung Thang nih a chim. Ram buai ruangah harsatnak a tong mi Myanmar mizapi ttanpi nak ding phaisa cu Bank account ngeitu kut in a tlau tiah MP hlun Pu Aung Thang nih cun nizaan ah Aizawl Press Club sin ah a chim tii newspaper pakhat nih a langhter.

“NUG sin in bawmhnak hmuh mi India phaisa Sing 90 cu Myanmar ah bank ah chiah awk a ttha lo, Mizoram ah le ramri sinak ka ngeih lo tikah bank account tuah a ngah fawn lo. Cucaah NUG bawmhnak phaisa ka sin a phak khawh nakhnga mi bank account ka hmang. Cu nak cun a tlau”tiah Pu Aung Thang nih cun a chim.

“Kan mi theih, Aizawl khua Ramhlun LRM hospital kam i a um mi Mang Lian bank account ah cun kan chiah i, cu India phaisa Sing 90 cu Mang Lian bank account cun a tlau. Tu ahcun amah Mang Lian zong a um nak theih lo a si i, heh tiah kan kawl cuahmah lio”tiah a chim chap.

Philippine president hlun Duterte fanu Sara Duterte cu rampi Vice President biakamnak a tuah cang. Philippine President hlun Rodrigo Duterte i a fanu Sara Duterte cu rampi vice president si ding in biakamnak a tuah cang, cu pah ahcun rithaisi ka dohlai tiah a chim.

Nizaan Pur 19 ni ah khan Philippine ram Vice President caah thim mi Sara Duterte nih cun baibal he biakamnak a tuah. Cu lio ahcun a pa nih an rak doh taktak mi phunglut lo rithaisi cu fak piin ka doh lai tiah a chim.

Tutan thimnak ah a tling mi Philippines President thar ding cu Ferdinand “Bongbong” Marcos Jr. timi pa a si. Ferdinand i a pa hi Philippines ram ralkap uknak in a rak uk tu pa a si. Marcos ti zong ah timi President thar cu a ralai mi Pur 30 ni ah khin office ah a tthu cang lai tiah theih a si.

Sara Duterte nih cun rithaisi ruangah kan ram ngakchia hna an hmailei nun a hnawkter tiah a chim. Sara i a pa Rodrigo Duterte cu an ram chungah rithaisi a tong mi pawl cu kah khawhnak nawl a pek hna ruangah nuhrincovo a dirpi tu hna nih heh tiah taza an cuai mi pa a si. Credit: Suimilam Media

Be the first to comment

Leave a Reply

Your email address will not be published.


*