Ralhrang Captain Pakhat Cu Amah Tein aa that timi thawngpang Hi!

Council ralhraang a tlawm bik 40 an thihnak Ngape raltuknak ah ralhraang captain pakhat amah tein aa that
=========
Magwe ramthen, Nitlak lei Ngape le Sadohtaya peng ah Council ralhraang le tualchung PDF hna cu ni 10 deng an i kap cang i, Council ralhraang lei a tlawm bik 40 an thi tiah PRA Magwe sin in theih a si. Council ralhraang 40 tluk an thi cang, Cu nak hmanh in a thi mi an tam lai. Ralhraang pawl an ruak cu a pon in vui hau tiang in an thi tiah PRA Magway ralbawi Hercules nih a chim.

“Porter an phurhter mi pakhat a zaam i himnak hmun a phanh in an kan chawnh. Officer pakhat le a kuttang pakhat anmah tein an i that. Cun Sitcaunghmu kan ti lai maw, Captian kan ti lai maw, pahnih hna zong meithal he an zaam” tiah a chim.

A luan cia April 6 thawk in Ngape le Sadohtaya khua hna ah council ralhraang 600 in 800 tiang nih hmun hnih in kahdohnak an tuah nain atu tiang ah a thi mi le hliamtuar cu anmah an si tiah PRA Magway ralbawi nih a chim.
“Kahdohnak a chuah lo nak hi nizaan le nihin, ni hnih a si cang. Thi le hmapu an tam caah hnu an kir a si kho men.

Thazaang an chap khawh in an rat than kan zumh. Kanmah lei hliam tuar 3 an um. A thi mi cu an um lo. Pakhat bel a hma a fak nain a nunnak ca ah tihnung cu a si lo” tiah a chim. Atu raltuknak a chuahnak Magway Nitlak lei hmun ah PRA Magway le Asho Chin- ACDF tangti phukomh nih Council ralhraang pawl cu an chei deuh hna hi a si.

Kahdohnak hmun kiangkap i khuami hna cu council ralhraang nih porter an phurhter hna, inn zuat vok le ar thah in an ei hna tiah kan theih. Council ralhraang lei in Tatmah-88, 44 le LIB-102 leng ah uniform lo in a um mi phu zong kahdohnak ah kan hmuh hna i Miakpi phu le ကပစ phu hna zong an tangti tiah theih a si.

A rauh hlan ah himnak hmun kan ser khawh cang lai tiah NUG caan karlak President nih a chim. People Defennse Force le tlangcung hriamtlai hriamtlai phu hna nih khuate tampi cu an tlaih khawh cang i a ruah hlan ah himnak hmunhma pawl kan ser khawh cang lai tiah NUG caan karlak President Duwa Lashi La nih a chim.

Caan karlak President nih April 16 zinglei ah biachimmnak a ngeih i cu chungah cun, NUG cozah nih himnak hmumhma pawl ah uknak le biaceihnak hna kan dirh chih lai tiah a chim. A hlan ah kan rak thanh cang bantuk in Democracy phung a si lomi 2008 phunghram ah kir than a si ti lai lo i Democracy charter ning tein kan kal lai tiah a chim.

SAC cu ramdang nih theihpinak le hnatlaknak a tlawm chin lengmang i NUG cu phungning tein cohlannak a karh chin lengmang tiah a chim. Cun, kan pawngkam ram hna nih, Myanmar ram mipi hna duhnak kha upat le thapek in ramri hna ah buainak tampi a chuahter tu SAC cu hnatlakpi loding ah caan karlak President nih a forhfial hna.

Cun, Russia nih Ukriane a tukmi cu ka tangthlak i Ukraine cozah hnatlakpinak a ngeimi UN General Coference biakhiahnak cu ka dirkamh. Hramhram uknak hrawh khawhnak ding caaah bawmhnak kan pe rih ko uh tiah a nawlnak zong a chim chih.

President zung biachimnak nawl a ngeitu pakhat NUG nih rian a khinh. President zung biachimnak nawl a ngeitu siding ah U Kyaw Ze cu riankhinh a si cang tiah NUG President zung nih April 16 ah a thanh.

NUG President zung nih mipi, ramdang hna he tha deuh in pehtlaihnak a ngeih khawh nak le caankhel tein thawngpang a thanh khawhnak hnga caah tiin U kyaw Ze hi rian khinh a si tiah NUG caan karlak President Duwa Lashi La nih a thanh.

NUG cozah dirh kumkhat a tlin hnu ah a tu bantuk in President zung biachimnak nawl a ngeitu riankhinh a si hi a si.
NUG cozah nih mipi he tha deuh in pehtlaihnak a um khawhnak hnga caah le bawmhchannak fek deuh in rian a tuan khawhnak hnga caah tiin Media phu dirhding in kan i timhtuah cuahmah lio a si tiah NUG Minister U Htin Lin Aung nih American um Myanmar rammi hna tonnak puai ah a rak chim.

Myanmar ram pumpi in khanghpiak a tongmi inn 9,187 a phan. Kawl ralkap nih hramhram in uknak a lak hnu ah Kawlram pumpi in khanghpiak a tongmi inn 9,187 a phan cang tiah Data for Myanmar ni April 14 ah a thanh. A tu cazin hi SAC ni hraamhram in uknak a lakhnu 2021 February 1 in 2022 April 13 tiang khawmhsuat khawhmi a si tiah theih a si.

Cu chungah, Sagaing ramthen hi inn 5,617 in a tambik khanghpiak a tongmi an si. Magway ramthen ah inn 1,814 le Chinram ah 1,132 in pahnihnak le pathumnak ah an dir. Khanghpiak a sinak hi rampumpi hmunhma 254 ah a cang tiah Data For Myanmar cazin in theih a si.

SAC in biachimnak nawl a ngeitu Major-General Zaw Min Htun nih cun inn a khangmi hi SAC ralkap si loin PDF pawl an si tiah a rak chim. Data For Myanmar cazinning ahcun, March 31 tiang inn 7,973 khanghpiak a si i April 13 cun inn 9,187 tiang a phanh caah zarhnih chungah inn 1,214 khiangpiak a si tiah a langhter.

HTPHC nih innkhangh a tongmi Tinam khuami hna le Ralzaam khua 14 bawmhnak an pek hna. Hakha Township Public Healthcare & IDPs Management Committee nih Tinam khua ah SAC ralkap nih an inn an khanghpiakmi hna le Ralzaam khua 14 hna sin ah bawmhnak tete an pek hna tiah theih a si.

Eidin le a dangdang an bawmh khawhmi hna hi Facang tun 207, chiti cuai 214, cite thuk 1449, pe cuai 321, nga dur 214, Calcium thuk 1o7 le innkangmi hna caah phaisa tlawmpal te an si tiah theih a si. Hakha Township Public Healthcare & IDPs Management Committee cu 2021 June 21 ah HCMF le HBA thluachuah peknak in Covid-19 zohkhenhnak, mipi ngamdamnak le Hakha pengchung ralzaam pawl zohfelnak caah rak dirh a si. Credit:, The Hakha Post, The Chinland Post

Be the first to comment

Leave a Reply

Your email address will not be published.


*