Ralhrang Mindat Khuapi Chung Kahdohnak Ah A Thi Mi Hna Cazin A Van Tial

Mindat Kahdohnak Ah Ralhrang Thi mi Min Cazin A Chuak+Sagaing Ah Ralhrang Minung 2 Fimtawl An Si

Chin ralkulh, Mindat khua chuah i a um mi Golf Ground ah a luancia 2021, May thla chung kahdohnak ah ralhrang a thi mi min cazin a chuak, tiah theih a si. Ralhrang nih a thli thup in an chuah mi, mithi min cazin chung ah Officer pakhat, Sergeant pahnih le ralhrang member 8 an thi, tiah theih a si. Hliamhma a pu mi cazin ah Officer 4 le ralhrang member 32 hliamhma an um, tiah an ṭial. “Atu a chuak mi min cazin hi ralram ah a thi mi zat he aa thlau tuk. Ralram ah hinak tam deuh an thi. An motor paruk mei in kan khanghpiak hna i ralhrang 50 nak tlawm lo an thi,” tiah kahdohnak ah a rak i tel mi Mindat-CDF pakhat nih a chim. May thla chung kahdohnak hi CDF-Mindat nih a voikhatnak kahdohnak an rak ton a si i, lai meithal in ralhrang cu an rak kah hna, tiah theih a si.

RAMCHUNG THAWNG: Sagaing Peng Ah Ralhrang Minung Pahnih Fimtawl An Si; Sagaing peng, Nyaungpinshi khua ah a um mi ralhrang rianṭuanpi  Pyo-Saw-Tti hruaitu Zaw Win cu People’s Army to Fight Dictatorship(PAFD) nih nihin February 3 zingka ah Tharzin khua le Aidaamah(အိုင်းဓမ္မ) khua karlak ah meithal in voithum an kah i, kah a tonnak hmun ah a thi colh, tiah theih a si. Pyo-Saw-Tti hruaitu Zaw Win cu ralhrang sin thawngpetu lawng siloin Pyo-Saw-Tti phu minung an karh khawh nakhnga mipi lemtu a si caah PAFD phu nih kan fimtawl, tiah cathanh an chuah.

Cu bantuk in Ayeyarwaddy ramṭhen, Kyaiklatt peng, Nyaungpinsuh khua ah a um mi ralhrang sin thawngpetu; United Democratic Party(UDP) member hlun U Hla Taung cu nizan February 2, zaan suimilam 7:10 hrawng ah Ayeyarwaddy Dolfin phu le Ayeyar Lotus phu nih an fimtawl, tiah theih a si. UDP member hlun U Hla Taung nih khuachung mino cheukhat hna cu PDF an si, tiah ralhrang sin ah thawng a pek hna i mino pawl cu an velh hna hnu ah an tlaih tawn hna caah kan fimtawl, tiah Ayeyar Lotus phu nih cathanh an chuah.

Credit ..The Chin Post