Paungde Ah SAC Rallamsial Ralkap Cu Bomb An Puah Hnawh Hna I SAC Ralkap 6 An Thi, Yebyu Ah Pyu Saw Htee 4 Cu An Kah That Hna!
========
Bago ramthen, Pyay pengkomh, Paungde peng, Lepin khua chaklei ah SAC rallamsial ralkap cu bomb an puah hna i 6 an thi tiah theih a si. October 27 chun sml 12 hrawng ah Lepin khua chaklei ah thazaang 60 hrawng a si mi SAC rallamsial ralkap an rat lio ah Pyay pengkomh PDF batalion-3601 nih bomh an puah hnawh hna i 6 an thi tiah theih a si.
SAC rallamsial ralkap pawl cu RPG le 40 MM in kah an bawmh hna.Cu ti an kah ruang ah mipi an umnak khua pawng hrawng ah hriamngan a tlak caah khuami pawl cu an tli tiah Bago Region PDF phu nih cathanh an chuah.
Cun Tanintharyi ramthen, Yebyu peng Kya Khat Ta Pin Inn khua i Pyu Saw Htee 4 cu an kah that hna tiah theih a si.
October 23 zaan sml 1 hrawng ah Kya Khat Ta Pin Inn i Pyu Saw Htee phu a si mi U Win Thein le ဒေါ်အုန်းစန်း te nu/va le ဦးဖိုးခိုင် le ဒေါ်အေးမိုးဆွေ te nu/va cu an kah that hna tiah theih a si.
Cu Pyu Saw Htee 4 hna kong lam he peh tlaih in mipi lei in phunzainak tam a um tiah LLPDF nih an chim.LLPDF lei nih ralrinnak an pek ko hna nain an zul duh lo tiah LLPDF nih cathanh an chuah. Cu Pyu Saw Htee le စွန်ရဲ phu 4 cu an inn ah an um lio ah Launglon (ပကဖ) LLPDF, Dawei (ပကဖ) DGRF le T-PDF ralkap pawl nih an tuah mi a si tiah theih a si.
NUG Le BPLA Cu Ral Tuknak Le Ramkhel Kong Ah Hmunkhat Kal Ṭi Dingin Hnatlaknak An Ngei. National Unity Government(NUG) le Bamar People’s Liberation Army(BPLA) cu ral tuknak le ramkhel kong ah hmunkhat ah ṭangṭi in kan kal canglai tiah NUG runvennak lei vuanci zung nih cathanh an chuah.
Cu an cathanh cu October 27, zaanlei ah an thanh i, cu chungah NUG, runvennak lei vuanci, ramkomh vuanci U Yi Mon, U Naing Htoo Aung le BPLA in ṭuanvo ngeitu Maung Saung Khah, sakhan-hmu Yoe Ann Min hna October 26 ah ton biaruahnak an ngeihnak kong an langhter chih.
Ton biaruahnak a dih hnu ah Ministry of Defence (MOD), Tualchung hriamtlai phu (PDF) le Bamar People’s Liberation Army(BPLA) kar ah mah le hmunhma cio ah raltuknak lei ah hmunkhat te ah i funtom ding le ramkhel lei ah kaphnih in i upatnak ngeihding he hmunkhat ah ṭuanṭi dingin lungtlinnak an ngei tiah theih a si.
KNU Brigade 5 Hmunram Ni 5 Chung Kahdohnak Ah SAC Ralkap 8 An Thi! Karen ramkulh, Brigade 5 hmunram ah KNLA le SAC ralkap cu a luancia October 22 in 26 tiang ni 5 chung kahdohnak a chuak i SAC ralkap 8 an thi, 4 hliamhma an pu, tiah theih a si.
October 22 zing sml 2:00 ah KNLA le SAC ralkap kahdohnak a chuak i SAC ralkap 2 an thi. October 23 zing sml 10:45 ah Nukhawde(နိုခေါးဒေး) hmunram ah kahdohnak a chuak ṭhan i, SAC ralkap 1 a thi chap, 1 hliamhma a pu, tiah theih a si.
October 24 ah Kataingdi(ကတိုင်တိ) le Bawgyulay(ဘောကျို့လယ်) khua karah kahdohnak a chuak ṭhan i SAC ralkap 4 an thi, 3 hliamhma an pu. Cun October 25 ah KNLA le SAC ralkap kahdohnak voihnih a chuak ṭhan, tiah KNLA Brigade 5 nih cathanh an chuah.
October 26 ah Salawgyu(ဆာလော်ကျိုး) Brigade 5 um SAC ralkap sakhan cu KNLA Brigade 5 ralkap hna nih an kah ṭhan hna caah SAC ralkap 1 a thi. Dwelu peng Nyaungpin khua cu SAC ralkap nih zanlei sml 1:47 ah hriamngan in voi 11 an kah caah tualchung mi inn pakhat a rawk, tiah theih a si.
KNU Brigade 5 hmunram Mutraw pengkomh ah SAC ralkap le KNLA kahdohnak a zual ngaingai, tiah Mutraw News nih cathanh an chuah.
Myanmar Hrambunh Joom Application Software Deu Hmang In Tangka Kyats Sing Thong Tam Tuk An Hlen Cang Hna! Vawleicung minthang Online Companny pakhat a simi Joom Companny min le Logo hmang in website deu, software deu le application deu hmang in MLM phun in tangka an rawnter hna i, mi an kawl hna caah kyats sing thong tam tuk an hlen cang hna, tiah hlen a tong mi hna nih Khit Thit Media ah an chim.
Myanmar ram chungah Joom Companny le Logo deu hmang in minung 19,000 leng hlen an tong cang hna, tiah theih a si.
“Joom Software in hlen a tongmi an tam tuk cang. Cheukhat cu harsat tuk ruangah do an cawi i a lutmi zong an um. Cheukhat cu rian an hmuh lo caah a lutmi zong an um. Joom Software ah tangka chuah kan duh kan ti len zong ah a ngah rih lo an kan ti lengmang,” tiah hlen a tong vemi pakhat nih a chim.
Joom Software ah chungtel pakhat in luh ahcun $ fang 3 nan co lai i mithar nan hmuh chap khawh hna ahcun nan rian a kai lai, tiin an hlen hna. Chungtel sinak in luh duh ahcun $70 pek a si. Thilri zong order deu in ṭin ahcun ni fatin tangka a lut lai tiah an rak hlen hna i, Kpay in tangka cu chuah a ngah lai an rak ti hna i, nihin tiang minung tam tuk an hlen cang hna, tiah theih a si.
Myanmar hrambunh Joom Software deu cu a luancia September thla lioah ngiathlaitu hna nih ralrin peknak ca an rak ṭialhnawh cang hna. Vawleicung minthang online company Joom cu thil dik thil hman tein thil a zuartu a si.
Joom Software min deu hmang in minung 19,000 leng a hlengtu hna phone number cu a tanglei langhtermi hna hi an si.
09- 670048290 ၊ 09 686547123 ၊ 09 686074205 ၊ 09 674089529 ၊ 09 665758024 ၊ 09 699323483 ၊ 09 670623721 ၊ 09 683063206 ၊ 09 689495943 ၊ 09 691939818 ၊ 09 675892933 ၊ 09 686334027 ၊ 09 691752239 ၊ 09 774691325 ၊ 09 965077891 hna an si.
Gyainsaitkyi Peng SAC Ralkap Sakhan Pakhat KNLA Phufonh Nih An Lak, Ralkap 17 Nih An Hriam An Chiah. Kayin ramkulh, Gyainsaitkyi peng Kyaitdune(ကျိုက်ဒုံ) peng SAC ralkap khah-mah-yiah 339 hrambunh sakhan pakhat cu October 26, zinglei ah KNLA phufonh nih kahdoh ah tuah hnuah an lak khawh tiah KNLA brigade 6 in tat-hmu-kyi pakhat nih a chim.
SAC ralkap hna tat-mah pakhat si mi no.13 Operations Command Headquaters kuttang um khah-mah-yiah 339 hrambunh Kuilungtai(ကွီးလုံးတိုင်) sakhan cu kahdoh in an lak khawh, SAC ralkap 17 nih an hriam an chiah i, meithal 43 le hriamnam thil tampi zong an lak khawh tiah theih a si.
SAC ralkap sakhan laknak ah SAC lei nih hriamngan le helicopter hmang in bawmhnak an pek leng ah van lei kahdohnak zong an tuah nain SAC ralkap sakhan cu hlawh tlinnak he kan lakkhawh tiah KNLA nih an chim.
Rallam Sialtu SAC Ralkap Dohnak A Tuahtu PDF Chungtel Pakhat A Nunnak Liam. Sagaing ramthgen, Myinmu peng ni chuahkei ah kee in rallam sialtu SAC ralkap minung thazaang 150 leng cu bomb puahhnawh ding in a bawhtu MNRF phu cu kah an ton caah kum 19 simo PDF chungtel tlangval tat-suh-hmu a nunnak a liam tiah theih a si.
A luancia October 24, zinglei ah Moe Nyo Revolution Force (M.N.R.F) phu in tat-suh-hmu le ralkap 4 cu bomb hmanhnak an tuah hnu in SAC ralkap an bawh hna lio ah SAC ralkap nih an kulh hna, cu lioah tat-suh-hmu nih a ralkap PDF ralkap 4 cu a zaam ter hna i an zaamnak lam venpiak dingin kut ser meithal he SAC ralkap dohnak a tuahtu kum 19 tat-suh-hmu cu kah a ton caah a nunnak a liam tiah MNRF phu in tuanvo ngeitu Ko Taezah nih a chim.
A nunnak liammi kum 19 tlangval PDF tat-suh-hmu cu tanghra camipuai ah distintion 2 in teinak a hmutu a si i, October 24 zinglei ah SAC ralkap nih an kah caah a nunnak a liam, October 25 ah a ruak vuinak an tuah tiah theih a si.
“Kanmah nih hin hriam tha deuh ngeikho uh sih law, a nunnak hi a liam hngalo, kan ralkap tat-suh-hmu nih kutser meithal he a ralkap vennak tuah in a nunnak a pek” tiah MNRF phu in tuanvo ngeitu Ko Taezah nih a chim.
Loikaw Ah Hriamngan Hliamhnak In Ngakchia Pakhat A Nunak Liam, 7 Hliamh An Tuar. Karenni ramkulh Loikaw peng Warikawkhu( ဝါရီကော်ခူ) khuachung ah SAC ralkap hriamngan kahmi a tlak caah ngakchia pakhat a nunnak liam i minung 7 nih hliamhma an tuar tiah tualchung mi nih an chim.
SAC ralkap hna nih Warikawkhu( ဝါရီကော်ခူ) khuachung ah October 26, zinglei suimilam 4:00 le chun suimilam 12:00 ah hriamngan an kah hi a si. SAC ralkap hriamngan kahnak ruang ah ngakchia pakhat a nunnak a liam i, ngakchia telh in minung 7 nih hliamhma an tuar tiah Karenni nuhrin covo lei riantuantu phu nih an langhter.
Wetlet Ah PDF Ralkap 2 Cu Bomb Nih A Puahhnawh Hna Caah An Nunnak A Liam. Sagaing ramṭhen, Wetlet peng ah PDF ralkap 2 cu bomb an sersiam lioah a puah caah an nunnak a liam, tiah theih a si. October 24 zing sml 11:30 ah rallam a sialmi SAC ralkap va doh ding in an kal lioah bomb ihliam sualnak in BLACK WOLF – ARMY phu in ralkap Saw Kyaw Zaw Shing le ralkap Ṭi Kaung cu an nunnak a liam, tiah theih a si.
Ralkap Ṭi Kaung cu bomb a puah hnu October 24 zing sml 11:30 ah a nunnak a liam i, Saw Kyaw Zaw Shing cu a hliamhma he zan sml 7:00 ah a nunnak a liam ve, tiah BLACK WOLF – ARMY nih an langhter.
Monywa-Ayartaw Lampi Ah SAC Ralkap Motor Bomb Puahhnawh An Tong I, Ralkap 3 An Thi. Sagaing ramṭhen, Monywa-Ayartaw motor lampi cungah SAC ralkap phurtu thir in khammi motor pakhat cu, PDF nih nizan October 25 zinglei ah bomb in an puahhnawh caah SAC ralkap 3 an thi, tiah theih a si.
Monywa in a chuakmi SAC ralkap motor cu Black Dragon Special Task Force nih bomb lung 6 in an puahhnawh caah ralkap 3 an thi, hliamhma pumi zong an um. Bomb puahhnawh nak tlamtling tein an lim hnu ah hnu an tolh kho, a thimi le aa hliammi um lo tiah theih a si.
Yangon – Mandalay Lampi Ah Motor Accident A Can Caah Minung 3 An Thi, Hliamtuar An Tam. October 26, zinglei suimilam 6:30 hrawng ah Yangon- Mandalay lampi mengtung 228 pawng ah khualtlawng mi motor aa leh caah motor chung cuang khualtlawng mi minung 3 an nunnak a liam, minung 14 nih hliamhma an tuar tiah theih a si.
Cu motor chung ah cun khualtlawng mi minung 17 an cuang i cu chung ah cun pa minung 3 an nunnak a liam. Minung 14 nih hliamhma an tuar, hliamhma tuarmi hna cu pa 10 le nu 4 an si tiah theih a si. Hliamhma tuarmi hna cu mi bawmchantu phu hna motor in Nay Pyi Daw ihkhun 1000 a umnak sizung ah kalpi an si i, an hliamhma kong ah thinphan ding a umlo tiah theih a si.
Indonesia Nichuah Lei Rili Ah Tilawng A Kang, A Nunnak Liammi 17 Tiang An Phan. Indonesia ram nichuah lei rili ah tilawng mei kanghnak a chuakmi ruang ah a thi mi hi minung 17 tiang an phan tiah cozah lei in ṭuanvo ngeitu hna nih October 25 ah an chim tiah theih a si.
KM Express Cantika 77 tilawng cu East Nusa Tenggara ramkulh Timor a lonh ah October 24 ah tilawng cu mei kanghnak a chuak i, tilawng chung cuangmi hna cu lautuk in an um caah tichung ah cun an zuang hna tiah theih a si.
Cu tilawng cu Kupang in Alor, Kalabahi lei an kal ah mei kanghnak a chuah hi a si. Rili chung ah cun mi ruak kawlnak an tuah i, tilawng mei kanghnak a chuah ruang ah a thimi ruak 17 tiang hmuh an si cang tiah mi bawmhchanhnak a tuahtu phu in Putu Sundayana nih a chim.
Rili chung ah tilawng mei kanghnak a chuah ruang ah nun bu in an chanhchuh mi hna hi minung 312 an si tiah theih a si. Tilawng a kanghnak kong ah zei ruang ah a kangh theih fian a si rih lo. A luancia 2018 lio ah Sumatara tiva a thuhbiknak hmun ah tilawng pakhat a rak pil bal i, culio ah cun minung 150 leng an rak thi. Credit: The Chin Post
Leave a Reply