Sagaing Ramțhen Ah SAC Ralkap Thah Mi Tualchung Mi Ruak 12 Char A Si!
=========
Sagaing ramțhen, Kanhbaloe le Khin Oo khua karlak khuate 2 ah SAC ralkap nih rallam an sial pah in inn an duah pin ah tualchung mi an thahnawn hna. Nihin, July 20 zing ah PDF nih hmunhma zohfelnak an tuah Tawaddy khuami 3 le GyiSuh khuami 9 (Azapi ruak 12) an char.
“Tawaddy khuami hna cu ralzaam pawl an va auh hna lio ah an rak tlaih hna i faktuk in an hrem hna hnu ah an ruak cu an phum i a thaizing ah ruah fak nawn in a sur caah an ruak alang i an hmuh hna, Gyisuh khua hi an khangh pin ah ruak hmuh khawh rih lomi zong an um tiah PDF ralkap pakhat nih a chim.
GyiSuh khuami tamdeuh cu vanlawng in khua an kah lio ah ertonh in tlaihmi an si hna, thih le nun hngalhlo a tlaumi an tam caah an kawl cuahmah hna. “Tu zong ah khua kam hna ah rallam 3 in kan i țhen i hmunhma thianhnak zong țha tein kan tuah kho rih lo” tiah PDF pakhat nih a chim chap.
Relchap, Zarhhnih chungah Chin hriamtlai phufonh le SAC ralkap karlak ah kahdohnak voi 10 a chuak, SAC ralkap 70 hrawng an thi, Chin National Front (CNF/CNA) aa telmi Chin hriamtlai phufonh le SAC ralkap cu July 6 thok in thlanglei Laitlang le chaklei Laitlang ah kahdohnak a chuak i SAC ralkap a thimi an tam tiah Chin National Front (CNF) nih a thanh.
July 6 ah CDF-Matupi le SAC ralkap karlak ah kahdohnak voihnih a chuak i SAC ralkap 5 an thi. July 7 ah CNA, CDF-Zotung le CDF-Matupi aa telmi Chin hriamtlai phufonh le SAC ralkap karkak ah kahdohnak a chuak i SAC ralkap 2 nak tlawm lo an thi i 6 an i hliam tiah a thanh. Falam-Hakha lamcung ah July 8-16 tiang Chin hriamtlai phufonh le SAC ralkap karlak ah kahdohnak voi 8 a chuak i SAC ralkap 60 nak tlawm lo an thi, a tlawmbik 17 an i hliam tiah CNF nih a thanh.
Kahdohnak hi Kalay-Falam-Hakha lamcung khuate a simi tlangrawn, Taal, Tlangzaar, Dokthek, Chuncung hna ah a cang i Kalay in ralkap mawṭaw 27 le ralkap 200 hrawng in an raa i Chin hriamtlai phufonh nih an kah hna hi a si.
Kahdohnak chungah Chin hriamtlai phufonh in 2 an nunnak a liam tiah a langhter.
SAC ralkap nih Valung khuami pakhat an thah lengah Taal khuate inn 29, Tlangzaar khua inn 6 le Chuncung khua inn 15 an khangh tak. Chin hriamtlai phufonh nih July 13 ah Hakha palik sakhaan le SAC ralkap gate an kah hna i SAC ralkap a thimi an tam tiah Chin National Front thawngthanhnak in theih a si.
Relchap, (photo Dang) Japan Hluttaw Palai 7 July Thla Dongh ah Taiwan An Tlawng Lai, Japan Hluttaw palai 7 cu tu thla(july) dongh ah Taiwan ah an ra lai, tiah Taiwan ramdang Minister zung nih cathanh an chuah. Japan Hluttaw 2 in palai 7 cu July thla dongh ah Taiwan an kal lai, tiah Japan-Taiwan ram aiawhtu Francis nih a thanhmi cu ramdang Minister zung nih July 12 ah fehternak an tuah.
Japan Prime Minister hlun Shinzo Abe a thih hnu in Taiwan ah Japan ram aiawhtu an tlawn ding cu sullam ngei ngaimi a si. Shinzo Abe a um ti lo zongah Taiwan cungah Japan Hluttaw 2 nih kan dirkamhnak a tlau hlei lo, tiah Francis nih a chim. Japan Palai cazin le Taiwan tlawn ding timh lamhnak cu caan rem a um tikah thanhnak kan tuah te lai ,Cun, Taiwan-Japan cu kum tampi chung hawikom kan rak si cang, tiah ramdang Minister zung nih an thanh.
July 8 lioah ah Abe cu Nara khua ah bia a chim lioah kah thah a rak tong. Tetsuya Yamagami(kum41) nih Abe cu a hnu meter 10 hlatnak in meithal zun hnih in a rak kah thah. Japan cozah nih Shinzo Abe cu a sang bik upatnak pek ding in an fehter i, Chrysanthemum minṭhatnak a co lai, tiah Kyodo News nih a langhter. Japan ram Prime Minister rian sau bik a ṭuanmi Abe cu phung ning tein ral a dih kum thawk in minṭhatnak a comi a 4 nak Prime Minister a si lai.
Dawei Ah SAC Ralkap Nih Nu 8 An Tlaih Hna, Tanintharyi ramțhen, Dawei khuapi chung ah SAC ralkap nih Nu 8 cu an inn ah an luhhnawh hna i an tlaih hna tiah khuami hna sin in theih a si. July 15 le 19 ah Dawei peng, WaiKyun veng ah a ummi Nu 3 le Kyats Sa Pin, DaungNgu, BomMaw veng, hna ah Nu 5, an zapi 8 cu SAC ralkap nih an tlaih hna.
Cu tlaih a tongmi Nu cheukhat cu SAC ralkap nih nawlngeihnak a lak hnu ah sianginn pehzulh in an kai lo i an mah an inn te ah a um mi Sianghleirun siang ngakchia hna an i tel tiah chungkhar hna he a neihniam mi hna sin in theih a si.
Dawei khuami pakhat nih” tlaih a tongmi hna hi Nu lawngte an si. An nih hi ram khellei ah zeihmanh a tuahmi an si lo. A tu bantuk in zei hmanh theih lo in an tlaihmi zong hi an um len kho rih ” tiah a chim. Dawei khuapi chungah tu kar hrawng cu CDM siangcachim hna cu tlaih ding in SAC ralkap ralbawi pakhat nih nawl a chuah i cu hnu ah tu bantuk in tlaikhih a tam chin tiah theih a si.
Myaing Peng Ah NUG Cozah Ministry of Education Hruainak In Martyes’s Day Ah Lentecelh Zuamnak An Tuwh, Magwe ramțhen, Myiang peng khuate pakhat ah NUG Cozah Ministry of Education hruainak in nizan July 19 ah A Voi 75 nak Martyr ‘s Day ah lengtecelh zuamnak an tuah. Cu Lentecelh zuamnak cu phun 5 in an tuah i NUG Cozah Ministry of Education on mi sianginn ah ca a cawngmi siang ngakchia 50 leng an i zuam.
KNU Brigade 5 Sin Ah SAC Ralkap 2 Hriamnam Zuun 3 He CDM An Tuah, KNU Brigade 5 hmunhma chung ah ralhranh in umhmun a khuarmi SAC ralkap chungin ralkap 2 cu hriamnam he CDM an tuah tiah KNU Moetraw nih thanh. SAC ralkap pakhat cu Regional command headquarters Loikaw kuttang Khah- Lah- Yah – 54 battalion in a si i hriamnam 2 he July 10 ah KNU sin in CDM a tuah tiah an langhter.
A dang SAC ralkap pakhat cu Phapon hmunhma um Khah- Mah- Yah – 341 battalion in a si i Karen ramkulh in Karenni ramri um NatTaung SAC ralkap sakhan ah a um mi a si i July 6 ah hriamnam he a rak zam i KNU sin ah CDM a tuah tiah theih a si.
Kawlram Mi Pakhat Le Mizoram Mi Pakhat Sin In Rupee Sing 120 Leng Man Bing An Tlaih, India ram, Mizoram ramkulh, Aizawl khuapi lei a kal ding motor pakhat cu Khawzawl chek gate ah Mizoram palik nih nizan July 19 ah 252.64 Gram a ritmi Bing kan tlaih, tiah Mizoram palik phu nih cathanh an chuah.
Bing a phortu hna cu Tamu peng Khampat, Michael Tawk Lian Mung(kum30) le Mizoram Zokhawthar khuami Lalchhandama(kum31) an si i, chek gate ah palik nih an tlaih hna. An tlaihmi Bing cu India tangka sing 126, kawlram tangka in sing 3150 man a si, tiah theih a si.
KPDF Nih SAC Ralkap Tilawng An Kah, Hriamnam Cheukhat An Laak, Chindwin tiva thluan in facang phurmi SAC ralkap tilawng cu nizan July 19 chun hnu sml 1:00 hrawng ah KPDF nih an kah. Hriamnam cheukhat zong an lak tiah theih a si. Monywa peng Alung MinDaung tilawng dinhnak hmun in a chuakmi SAC ralkap tilawng 13 hrawng cu KPDF nih kan kah caah tilawng cu pakhat a rawk, tiah KPDF in ṭuanvo ngeitu Bo Hna Khan Hmuai(နှုတ်ခမ်းမွေး) nih a chim.
“SAC ralkap tilawng hna cu kutser hriamngan in kan kah hna caah tilawng cheukhat cu an pem i, ti a luh caah ti ah an vuanmi thilri hna cu kan laak. Ralkap a thimi zong an tam,” tiah a chimchap. Suimilam cheu chung hrawng an i kap i, SAC ralkap a thimi le aa hliammi zat cu fiang in an thei kho rih lo, tiah theih a si.
Hriamnam an chuhmi hna cu, 60mm bomb lung 2, ralkap sii-ai, min hngalh lomi Tank(Ṭengki pung)5, (76th Anniversary Fire-Services Department) min aa ṭialmi ruahkham angki zun 150 hrawng, Tatma 55 aa benhmi ralkap angki, ralkap kedan, riahcaw le a dang thilri hna kan tlaih, tiah KPDF nih July 19 ah cathanh an chuah.
Chindwin tiva ah a vuanmi SAC ralkap ruak pakhat cu nihin July 20 ah Yinmarpin peng ah an hmuh, tiah PDF nih social media ah an langhter. Sagaing ramṭhen, Kani peng Taze Chaung khua ah June 2 lioah SAC ralkap le PDF kahdohnak a rak chuak i, SAC ralkap 3 an rak thi.
KyaukHtu In Mindat Lei Ah SAC Ralkap Motor An Kai, Cacawnnak Thilri An Phorh, SAC ralkap motor hna cu nihin July 20 zinglei ah KyaukkHtu in Mindat lei ah an kai, tiah tualchung mi hna nih an chim. Kyauk tlang lamṭhen ah a ummi SAC ralkap nih meithal duh paoh in an kah pinah hriamngan zong an kah thluahmah, tiah tiah theiih a si.
Motor chungah KyaukHtu No.1 sianginn chungin caṭialnak cabuai le Whiteboard hna an hmuh. Cu ca cawnnak thilri hna cu SAC ralkap an fale cachimhnak ca ah an hman lai, tiah an zumh. SAC ralkap motor 105 cu Magway ramṭhen, Pakokko khua in Chin ramkulh Mindat-Matupi lei ah July 17 zing sml 9:00 hrawng in an chuak, tiah theih a si.
Chin National Front Nih Kahdohnak Cathanh An Chuah, Chin ramkulh chungah July 6 -16 tiang kahdohnak cu July 19 ah Chin National Front(CNF) nih cathanh an chuah. Hi cathanh chungah SAC ralkap le CNA, CDF-Matupi le CDF-Zotung hna cu July 7 ah Amlaik khua ah kan i kap i, SAC ralkap 2 nak tlawm lo an thi 6 hliamhma an tuar. July 6 ah SAC ralkap le CDF-Matupi kahdohnak voi hnih a chuak i, SAC ralkap 5 an th, tiah an langhter.
July 13 ah Hakha pengkomh palik camp le Hakha khua chung, SAC ralkap gate pawng ah CNA le ṭangṭi phu nih kan kahdoh hna i, ralkap tam ngai an thi kho. July 8-16 tiang Falam le Hakha karah ah SAC ralkap 200 hrawng, motor 27 cu CNA le ṭangṭi phu a simi CDF-Hakha, CDF-Thantlang, CJDC le CNDF hna i bawm in kan kah hna caah ralkap a tlawm bik 60 an thi i, a tlawmbik 17 hliamhma an pu,
Miphun hriamtlai lei in ralkap 2 nih an nunnak an pek ve, tiah an langhter. SAC ralkap nih Valung khuami pakhat cu zohchia tuk in an thah pinah Ṭaal khua inn 29, Tlangzar khua inn 6 le Chuncung khua inn 15 an khangh, tiah CNF nih cathanh an chuah.
Leave a Reply