Rev. Dr Ral Buai March 1,2022 Ni Ah Hospital In A Ttum Cang Check Up Thuah Tthan A Hauh Rih Caah Bangkok Ah Cun A Um Rih Ko Lai Damnak Tling A Hmuh Khawhnak Hnga Pathian Sin Ah Hal Piak Rih Hna Uh Sih

Rev. Dr Ral Buai Zawtnak Update”

Rev. Dr Ral Buai March 1,2022 ni ah Hospital in a ttum cang. Check up thuah tthan a hauh rih ca ah Bangkok ah cun a um rih ko lai.

Krih ah Zumtu le Dawtu hna nan thlacamnak thawng in a si ko. Kan Pu Buai damnak tling a hmuh khawhnak lai Zumtu Dawtu nan dih lak thlacamnak in kan bawm cio ko rih uh tiah kan sawm ko hna.

Credit: Lian Iap

Relchap : Isaiah 66:13; ” Nu nih a fa ahnemh bantukin Jerusalem khua chungah kan hnemh hna lai.”

Biahmaikal:Pathian dawtnak le nu le dawtnak; Pathian nih Isaiah 66:13 ah ” Nu nih a fa a hnemh bantuk in kan hnemh ve lai.” a ti. Pathian nih a mah hmur bakin kan cung i dawtnak a ngeihnak kha, nu le nih fa le an kan dawtnak he aa khatnak kong a chim. Zeidah a chimduhmi a si ti kha kan fiankhawhnak ding caah, Bible chungah kan hmuhkhawhmi NU tlawmpal kong vo zoh ta ka duh. Hi NU hna nun nih Pathian nih kan cungah a ngeihmi dawtnak kong kha tlawm te tal a kan theihter deuh theu lai tiah ka zumh.

I. Moses a Nu Jochebed: Kong hi Exodus 2 ah kan hmuh. Moses hrin asilio ahhin a u pa Aaron hi kumthum hrawng a si i a u nu Miriam hi kum 12 hrawng a si. Bible nih Jochebed cu fatam a ngeihnak a kan chimh. Moses hrin a hungsi deng ah, Pharaoh nih ” Israel chungin naungei dengmi an um ti kha a theih,” i Israel chungchuak i PA poahpoah cu Nile tiva chung i Tisartlam rawl ah nan hlawnh hna lai tiah nawl a pek.

Hi lio caanah fapa a ngei laimi NU thinlung ah zeidah a cang lai tihi kan van ruahkhawh cio theu lai ka ti. Moses NU ralram ah sal pakhat dirhmun in nau ngei ding a si, nawlngei tu Pharoah nih ” Fapa” poah thahding a ti. Egy ralkap pawl nih ttha tein an zoh hna, an fa le cu Nu maw a si Pa dah tikha; Pa a si sual ahcun a baan in zam i thlehdih, bauh dih i thah ding lawng kha a si.

Culio caan i fapa ngeiding nu dirhmun hi a har ko lai! Fa a hunngei i PA te a hung si. Bible nih a fa te cu, ” Thla thum chung a thuh,” a ti. Thilthar a ruahkhawhnak nih Pharoah nawlbia cu a dohkhawh i a fapa thihnak chung in aluat ter. A Fapa ttahaw an theih lai kha a phantuk caah, Tiva kam ah a ttum i phai kung kha a khiah i bawm a tah i ti lutkho lo ding in buance, a kuh. Cu bawmte a sermi cu tiva kam ah cun chia in Moses unu Miriam cu a hngah ter. Nu le nih fan le nan kan sian cio lo bantuk in,” Jochebed zongnih a hohmanh nih ka fa hi an that kho lo,” tikha aa tlaih ve. Cutincun Pharoah fanu aa khawlh tawnnak zawn tiva kam ahcun Moses cu bawmchung teah cun akal tak ko.

A ruahning bantuk i Pharoah fanun nih cun ahmuh i a fa i i cawmding ah a lak. Culioah Miriam cu a ra i, nau te zohpiak ding ah Hebrew Nu kawlpiak na duhmaw? tiah a hal. ” Ka duh” tiah a leh caah, Miriam nih a Nu, Moses NU, Jochebed cu Moses zohtu dingah cun a va auh. Cuticun Moses cu Egypt siangpahrang, a miphun pawl Egypt sal tannak chung in chuahkho tu dirhmun a sitiang a nu nih cun a zoh.

Hi zawnah zoh ka duhmi cu; Bawmtu ngeilomi dirhmun ah dirlio caan i, Moses nu i a fa lohtlau lai a sian lo zia; a fa biapi tuk ah a chiah ning; a fa luatnak ca i khua a ruahning; le a fa kal taak lo i a zohkhenh ning hna hi an si. A fa kong ahcun a si kho lai lo ti hrim kha a cohlan lo zia hi a lang. A dawtnak ruang ah asi. Ka fa kham ding hi cu a si kho lo a ti bal lo. A thi kho lo mi a fa a dawtnak le a siaherhnak nih bawmtu a ngei lo mi a fate, Moses nunnak ca i lawmkawl kha a ngol bal lo.

NU le hna nan nunnak ah,” Bawm tu ka ngei rua lo tiah nan ruah caan a um ve tawn maw?” A si kho ti lo ding dirhmun bantuk ah nan dir bal maw? Moses a NU thinglung chung ah nan nunnak chiah ve ding hia bia pi ngai. A facung a dawtnak zing zaan in khua a ruah ter lam a kawl ter, ” Zeitin dah ka fa ka khamhkhawh lai ?” tiah lam a kawl peng. Lungdong in zaacang ko seh a ti lo i a fa luatnak lam a hmun hlan lo nunnak thihnak ri ah dir peng in nun kha a ngamh.

A caanah cun chuahkhawh ti lo ding ah nan ruahmi le lam a um ti lo tiin lungdong in khua nan ruah caan zong a um cio ve tawn ko lai, chuahnak ding ah inkaa aum ti lo nan ti caan zong a um ko lai!

Moses NU dirhmun in chim ka duhmi cu, hi caan ah, ” Nu nih fa a hnemh bantukin mi a hnem tu Pathian nih nang le kei hnemh ding ah bia a kan kamh.”

Vawlei NU a simi, Moses Nu hmanh nih a fa pa luatnak ding lam a hmuh hlan lo a fa a kal tak lo ahcun Pathian dawtnak chinchin cu zeitluk in dah a ngan ; a kan luat ter lai.” Lungrethei vansang au in kan um lio caan ah NU bantuk in a kan hnemtu Pathian nih hnemh i harnak chung in luatter ding ah a kan hngah ko.

II. Mary, Jesus NU; kong zoh ta u sih. John 19:25; ” Jesus vailam pawng teah khan a NU a dir,..” a ti. Hilio ah pa tthawngthawng, zultu tthattha hna cu, Jesus Khrifh Jerusalem khua i, a kut le a ke ah thir in an khenh; Lam cung ah an dawh chih i fung in an tuk cuahmah kokha ral ttha tein a zohtu, Jesu NU, Mary sinin an zam dih cang. A hohmanh nih Jesus an tuah to dan kha an zoh ngam lo lio Mary cu ralttha tein a dir i a fapa pawng teah a um zungzal.

A chungchuak fapa nih thlicung i a Vailam tung aa put lio ah a hram teah a dir. Jesu vailam ah an thai lio ah,” Nu le nih na fa hei si ve seh law ti na ruah ah, Mary nih a tuar ding mi hi na theihthiam ko lai.” Mary cu a ral a chia lo, a tthu fawn lo, a fa an thlainak kehram teah a dir ko. A ngai teah Jesus cung ah zeithil dah a cang tihi a hngal lo.

Jesus kum 12 a si lio ah, Mary le Joseph nih Biakinn ah an kal pi. An i hnawhnam tuk i inn lei kal an i timh lio ah, Jesus an sinah a um lo kha an theih. Cutikah an kir hnawh i biakinn ah Bible a rak chimh ko kha an hmuh. Mary nih, ” Hmunkip ah kan in kawl tiah a ti.” Jesus nih, ” Ka pa rian ka thok deng cang hi nan thei lo maw,” tiah a leh. Jeus bialehnak hi Mary a doh mi ko a lo. Ka Pa rian a ti tikah nan mah hi ka nu le ka pa nan si lo ti i hlawtmi a lo. Culio ah Mary a lung a fiang lo.

Jesus kum 30 a si in, an in in a chuak. Hi lio ah Joseph a thi tikah, Jesus cu a chungkhar ttha tein a zoh. Riantlawmpal a ttuan hnu ah Jesus cu an in ah a kir tthan i, mipi nih, ” Lettama pa fapa kha a si lo maw?” tiah an ti. Jesus cu a thuuk mi a rian kha peh awk ah, khuachung in an dawi. ( Zeiruahnak he si cu theih a si lo.) Jesus cu rianttuan nak hmun ah kal ding in dawi a si tikah, Mary nih Jesus unau pawl cu a pumh hna i Jesus sinah cun akal pi hna. Minih ” Na nu le na unau pawl an ra,” tiah an ti tik ah, Jeus nih,” Ho dah ka NU cu a si?” tiah a leh hna tikah, a Nu mary hi, Jesus biahalnak ruangha, ” A lungzor a tur dih men lai i a lung akuat tuk lai ka ti.” Jesus nih zeiah a ka rel lo tiah, ruat in a thinlung ngaih a chia ngai men lai.

Hi lio ah Mary thinglung chung dirhmun hi kan hmuh kho cio maw? A fapa nih zeirel theng lo in a hlawt mi ko a lawh kha a hmuh. A donghnak ah a fapa lila cu zultu ttha pawl hmanh nih an hlawt kha a hmuhtthan i ningzah awk tlak thihnak in a thih kha a hmuhchap. Sihmanhseh, zeithil sining hmanh nih Mary cu a fa sin khan a dawi kho lo i a kal ter kho lo. “A fapa Vailam pawng teah a dir ko.”

Nu le hna,” Zeirel lo hna nan tong bal maw? A ho hmanh nih theihkhawh lomi thil har hna nan tong bal maw?” Mary zong thil a cangmi hi a thei bak lo. Jesus kong ah Simeon nih a rakchimchungbia, ” Hriannam kha na thlarau chungah sawh a si lai,” tizong kha a lung a fiang lo nain, ” A fapa pawng ah a dir peng.” Hinihhin, ” A fek, a hmun i, a zawr ballomi nu dawtnak,” a langhter.

Hringtu NU le kan siah, a ho kan mah poah nih, ” Hi biatak hi kan herh.” Pathian nih kan thilrit, kan buaibainak ( Problem) hi a hngalhdih i zeithil chungpoah hin, ” NU nih fa a hnemh bang a kan hnemh ko.”

III. Rizpah hi II Samuel 21 chungah kan hmuh. A mah cu Saul fapa pahnih hna i an NU a si. Saul NUPI cu a si bal lo nain a nupi chun a rak si. Saul cu Israel siangpahrang hmasabik a si. Pathian bochan bu in nunnak a hmang i a hung liannganmi a si nain, a hnuah Pathian nih bia a chimh vialte kha a philh i a donghnak ah, ” Hruhthil tampi ka tuah,” tiah aa ngaihchihnak kha a phuan. Pathian duhning ina nung lo. Pathian sin ah bia a rak i kam mi lam kha a philh.

Hi caan ah Pathian sinah bia a rak i kam mi cu, ” Zeitikhmanhah, Gibeon miphun hi ka that hna lai lo,” tikha a si. Pathian min in mitthut biakam nak a tuah. Siseh a biakam nak a philh i, Gibeon pawl thahdih ding ah a kal. Cutikah ral a sung i a mah le a mah aa that. Cun Daivd kha Israel siangpahrang ah a hung cang, zeicatiah, Saul nih a biakam a philh i, Pathian hmai ah aa kam mi bia upat ding kha a tlolh caah a si. Isreal lak ah mangttam a tlung. Cutikah, Davih nih Israel mivialte aiawh in; Gideon mipawl cu zeidah kan tuah piak hna lai a ti. Kha lio thil sining le an tuah duhnak a sullam cu kan theih cio lo nain, mipi nih,” saul fale pa 7 kha Bibeah tlang cung ah thlai ding ah an hal.” Cuhmun cu ral an rak i dohnak hmun cu a si. Hi hna lak ah pahnih cu, Rispah a fa le an si. David nih cutincuna tuah. Saul fale pawl cu rawlttuan lio caan ah thah an si tiah,II samuel 21 ah kan hmuh. ( April hrawng dawh hi a si tiah Bible thiam pawl nih anti ) Rispah cu afa le an thlai hna nak tlang cung ah cun a kal i, Bible chimning ah, ” Rizpah nih buri puan a lak hna i rawl ttuan domh ka in ruahpi nih van in a run surh hna tiang lung cungah khan aa zarh hna i an cung ah cun van i a zuangmi va si hna seh, zaan ah ramlak saram si hnaseh, a rat ter hna lo.” ati. Cuhmunah cun a thihtiang thlasarih chung a um. Cuthil a tuah ruangah; David nih cucu a theih i upatnak apek i, a fa le ruh le a vapa Saul ruh kha upatpek bu tein a pumh tthan.

Hitluk ttih anungmi dirhmun hin NU pakhat i a dirhmun hmathlak hi zohtthan ding ka duh. A fele hi dawttlak lo ah an i tuah. A NU va dawtding men le thingphannak chuah pitu ah an cang. Thuutnak le rop nak ah an phan. An rim thuu-theeng in cu hmun cu a khat. A fa le cu mivialte caah huattlai mi misual, dawttlak lo dirhmun in an dir ko nain; ” cu an sining nih, a fa le a dawthna nak kha a zawr ter hlei lo.”

Chiatserh in harnak a tongmi, uico ca hmanh ah fih a nungmi, vui awk a tlak lomi ah ruah an si nain, an NU Rizpah nih cun a thinlung chung in hlawn in, a chuah kho hna lo. An mah cu NU lawnglawng nih dawtkhawhmi dirhmun an phan. An NU dah ti loah Vawlei ah dawtu an ngei ti lo. Mivialte nih an hrial hna nain, an NU cu an sin in azaam kho lo i a fa le cu a liam ter kho hna lo. Midang nih cun lungfaak ngain an huat hna i an lung a awi ngai lio ah, an NU Rizpah cu an cungah zaangfahnak le dawtnak a ngei peng. Pathian nih, ” Nu nih fa a hnemh bang, kan hnemh hna lai a ti.”

1. Jochebed, Moses NU; NU a fa luatnak le nunnak ding caah zeitik hmanh ah lungdong in a kal tak lo bantuk in kan Paa Pathian zong nih kan sualnak le thihnak chungin kan luat khawhnak hnga ding caah lungdong in aum bal lo i a kan caah luatnak lam a kawl zungzal.

2. Mary, nih a langhter mi cu, fale nih NU dawtnak hi zeirel lo bantuk in kan um lio caan le mivial tenih kal tak in zeirel lomi kan si lio caan zong ah, NU dawtnak cu ruahchannak um lo in kan sin ah a dir zungzal. Kan tonmi harnak le kan tuarmi fahnak kha theihpiak in kan pawng te ah a dir zung mi dawtnak kha a langhter. Pathian dawtnak cu zeirel lo in kan um i, mi vialte hmaizong ah zeirel lomi dirhmun, a tlaumi, harnak chungah thiding in kan um cuahmah lio zong ah, Mary nih Jesus pawng teah a dir zungzal bantuk in Pathian cu dawtnak he kan kam teah a dir zungzal ko.

3. Rizpah nih, NU le dawtnak, dawttlak lomi fa le cung zong ah dawtnak an ngeihnak kong a langhter. Mithat lainawng, mi vialte nih mawhchiat mi, thlanhmanh ah vui duh lo in thlaisawhsawh dingmen in chiatset i thath ding men ah an kan hmuh lio zong ah kan NU le dawtnak cu kan rimthu lak te ah, kan ruak te hmanh khah va le sahrang nih ei lai siang lo in nunnakdongh tiang kan pawng ah a um zungzal mi a si zia kha a kan hmuhsak.

Biafun;

Pathian nih ” Nu nih fa a hnemh ban kan hnemh hna lai.” a ti. Minung cu a harmi nunnak chung ah kan nung i kan tthang. Kan sin ah dawtnak a um ti lo tik caan ah, Jesus kha a dawtnak hmuhsak nakding ah hal kan hau. Bawipa na dawtnak rak ka hmuhsak ko kan ti ahau. Bawm tu ngei lo le, minih zei rel ti lo mi hna caah ruahchannak thar an ngeih i, Pathian dawtnak hi zeibantuk dah a si ti an theihkhawhnakhnga thla kan i campiak a hau. Pathian nih NU le hmang in a dawtnak a kan hmuhsak ruangah le a dawtnak hmukho ding ah mit a kan pek i, a dawtnak lehrul tthan kho veding ah thinlung akan pek ruangah, Pathian sinah lawmhnak bia chim kan herh.

Pathian nih a kan kamhmi a biakam,” Nu nih fa a hnemh bang kan hnemh hna lai a timi,” kha kan hal i kan laak a hau. ( Kan claim a hau.) Pathian kha kan NU ah kan ser a hau.

Be the first to comment

Leave a Reply

Your email address will not be published.


*