Rev. Dr. Rual Uk: Pathian Min Kongah Trinity Hna Tlaunak nak in Oneness hna tlau ning a fak deuh!

PATHIAN MIN KONGAH TRINITY HNA TLAUNÂK NÂK IN ONENESS HNA TLAU NING A FAK DEUH
=========
Na Pathian min zeidah a si tiah Judahmi va hal hna law ruatnawl loin ka Pathian min cu Jehovah (YHWh) a si tiah an in leh cawlh lai. Cubangin Muslim pa na hal tik zongah i ruatnawl lo bak in ka Pathian min cu ALLAh a si tiah an in leh cawlh ve lai.

Cubangin Buda biaknâk a zultu na hal zong ah i ruatnawl lo bak in ka Pathian min cu GAUȚAMA a si tiah an in leh cawlh lai. Hindu pa na hal zongah i ruatnawl lo bak in ka Pathian min cu BARAMIN a si tiah an in leh cawlh ko lai.
Asinain Kristian (Khrihfa) pa khat khat kha hal law sau nawn a ruah hnu zong ah a Pathian min chim awk a hngal lomi tampi an um lai.

Zeicatiah kan Pathian min kongah kum sau pi kan rak tlau. Kan tlaunâk chan bik tu cu Judah mi nih an Pathian min “JEHOVAH” timi chim an rak ngamh lo ruangah a min Jehovah si loin lei le van ah Bawi a sinâk , “Adonai” timi in “BAWIPA” tiah an rak auh caah a si.

JEHOVAH timi aiawh ah ADONAI timi cu Mirâng nih LORD tiah an rak leh i Lai Baibal Thiang ah BAWIPA tiah an rak leh.
Hihi kan Pathian min JEHOVAH timi in tlau hram kan i thawknâk hram tak tak a si. A ngai ngai tiah Bawipa ti cu min a si lo ti cu kan fiang. Zeicatiah vawlei bawi vialte nih a dang tein min an ngei dih ti cu el awk țha loin a fiangmi a si.

Cucaah Trinity zûmtu tampi nih thumkomh Pathian min hngal loin kan tlau. Cucu Sehtan nih cân rem ah la in Oneness hna nih nan Pathian min hmanh nan hngal lo, kan nih cu fiang tein kan Pathian min kan hngalh, kan Pathian min cu Jesuh a si tiah an kan ti hnawh tawn. Cucu Trinity nâk in fak deuh in kan Pathian min kong ah an tlaunâk cu a si.
Pathian nih vancungmi Gabriel kha Josef le Mary sinah A min chim dingin a thlah lo.

Josef nih ai ham mi Ngaknu thiang Mary nih Thiang Thlarau thawngin nau a pawinâk kong le Fapa a hrin tik ah a min ah Jesuh tiah an ti lai nâk kong chim ding ah a thlah mi a si, Mathai 1:18-21.Luka 1:30-34; Tawifiangin chim ah cun
Pathian thlahmi Gabriel nih Josef le Mary sinah Pathian min a chim lo. Pathian thlahmi a Fapa min tu a chim.

Cucu Jesuh a si. Pathian nih Moses sinah a min chim a timh ah khan van cungmi a thlah lo. Amah Pathian hrimhrim kha Moses sin ah ai lang i a min cu ‘Jehovah’ a sinâk kong kha fiang tein a chimh. Chuahlanhnak (Exsodus) 6:2-3.
Jehovah ti cu zungzal caah ka min a si tiah Amah Pathian hrim hrim nih a ti. Chuahlanhnâk 3:15 Isaiah sin zong ah Amah Pathian hrim hrim nih ‘Jehovah ti hi ka min a si’ tiah a ti. Isaiah 42:8; Jeremiah sin zongah ‘Ka min hi Jehovah a si ti kha an hngalh lai’ tiah a ti.

Jeremiah 16:21; Jehovah Pathian nih misual Khamhtu ding ah a Fapa ngeihchun kha a thlah i a min ah Jesuh tiah vancungmi Gabriel nih Josef le Mary sinah a chim. Cucu Pathian min a si tiah Oneness hna nih an timi hi Trinity hna nâk in Pathian min kongah an tlauning a fah deuh nâk cu a si. Trinity tam deuh nih cun BAWIPA Pathian an ti lengmang mi an Pathian min Jehovah kha an rak hngal lo i Pathian min ah an tlau.

Oneness hna nih Pathian min a hngal ngaimi ah an i ruat i an hngalhmi Pathian min cu Pathian min si loin Pathian nih a thlahmi a Fapa ngeihchun Jesuh min tu a rak si. Cucaah Pathian min a hngal fiang lomi Trinity hna nâkin Pathian min a hngal fiang ngai mi ah ai ruatmi Oneness hna tlau ning a fak deuh. Zeicatiah Pathian min a hngal lomi nâk in Pathian min a silomi Pathian min ah ruah kha a fak deuh.

FA NIH PA A HRING BAL LO I PA NIH FA A HRIN TAWN! Naite ah fb ah an postmi ah Jehovah cu Adonai in a rami a si timi kha a fa nih a pa hrin tibantuk a si. Asinain Adonai nih Jehovah a chuahter lo i Jehovah tu nih Adonai hi a chuahter mi a si. Thil si ning tak tak cu hitihin a si. Pathian nih a min Jehovah timi hi Moses sinah a hngalhter. Chuahlanhnâk (Exodus) 6:3.

Asinain Pathian miphun Judah mi nih an Pathian min Jehovah (YHWH) timi chim hi an rak ngamh lo. Zeicatiah Nawlpek pahra chungah pathumnâk ah, “Jehovah na Pathian min cu a sawhsawh in hmang (chim) hlah, zeitintiah a saw sawh in a min a hmangtu (chim) cu sualphawt lo in an um bal lo,” tiah a ti. Chuahlanhnâk (Exo) 20:7; Cucaah Judah mi hna nih Pathian nih sual a phawtmi silai an phân tuk ruangah Pathian min Jehovah timi chim hi an ngamh ti lo.

Cuticun Pathian min Jehovah timi can ah lei le van ah bawibik a sinâk Adonai timi tu in an Pathian Jehovah kha an rak kawh. Adonai cu Bawipa or ka bawipa tinâk a si. Cucu Mirâng nih LORD tiah an leh i Lai Baibal Thiang ah BAWIPA tiah an lehmi hi a si.

Cucaah Pathian khi ADONAI (BAWIPA) tiah Judahmi nih an rak ti mi kha JEHOVAH (YHWH) timi Pathian min chim an ngamh lo ruang ah a si tihi thil sining tak tak a si. Cucaah Biakam Hlun ah cafang ngan in BAWIPA tiah timi vialte khi a hrampi Hebru Baibal ah cun YHWH (JEHOVAH) ti a si dih.

Cucaah ka lehmi Baibal Cathiang timi le Dr. Timothy Sui Lian Mang lehmi Bible Thianghlim ( Chin Standard Bible) timi le Saya Hoi Cung Tum nih a leh lio mi Hakha Baibal Thiang timi ah Biakam hlun le Biakam thar zong ah cafang ngan in BAWIPA tiah timi vialte khi JEHOVAH tiah kan ti dih.

Zeicatiah Jehovah ti kha Baibal hmasa bik Hebru nih a hman mi a si. Carson le Laurah hmangin zûmtu a rak si mi kan pipu hna le a ka hringtu ka pa le tiangin thla an cam ah Jehovah Pathian tiah an rak ti. Lai Baibal Thiang a chuah hnu ah JEHOVAH timi kha BAWIPA tiah a ti caah Jehovah Pathian tiah pupa hna nih an rak timi kha Bawipa Pathian tiah kan thlen mi a si. Pathian khi Bawipa (Adonai) tiah kan ti tikah kan palh hrimhrim lo.

Zeicatiah Pathian cu lei le van ah Bawibik a si. Asinain Bawipa timi (Adonai) hi Pathian min a si lo ti hi kan hngalh fian a herh. Amah Pathian nih voi li kheng te ka min cu Jehovah a si tiah a timi ( Chuahlanhnâk (Exodus) 3:15. 6:3. Isaiah 42:8. Jeremiah 16:21) kha Judah mi nih a chim an ngamh lo ruangah Jehovah timi can ah Adonai tiah an rak thlen mi a si ti hi kan philh hrim hrim lo ding mi thil sining tak tak cu a si. Cucaah fa a simi Adonai nih pa a si mi Jehovah a hring lo i pa a simi Jehovah tu nih fa a si mi Adonai hi a hrin ti hi thil sining tak tak cu a si.

ONENESS HNA HI CU LIHCHIM, BIAMERH LE ZAWNDAMH BIACHIM CU AN RAK HMANG DEUH KO. Zeicatiah Baibal ka lehmi le Study Baibal ka chuahmi hi Dr. PC Biaksiama chuahmi Parallel Baibal kha ai zohchunh i a copy mi a si ti hi comment nâk ah voi thum hrawng ka hmuh cang. Hi hi lih fangfak le zawndamh in chimmi bia a si. Zeicatiah Baibal ka lehmi a chuah hnu ah Dr. PC Biaksiama hi Hakha ah a rak tlawng i a tlunnâk Dawrhlun ah ka va leng i Mizo English Parallel Baibal a chuahmi kha laksawng ah a rak ka pek.

Cucu fb ah a hmânthlak zong an langhter tawnmi kha a si Baibal ka leh ah hin Dr. PC Biaksiama chuahmi Parallel Baibal hi a chuak rih lo i ngeih zong ka ngei rih lo i a hmuh zong ka hmu rih lo. A ngeih zong ka ngei rih lo i a hmuh zong ka hmuh rih lomi kha Oneness hna nih ai zoh chunh ai copy tiah fb ah an ti tawnmi hi an zia le an sining, biamerh le lihchim le zawndamh biachim a hmang mi an sinâk anmah tein an i langhter mi a si ti hi fb hawi dawt hna nih kan hngalh fian a herh.

Thil sining Baibal hmangin ka langhter tawnmi hi an duh le Baibal lila hmangin el hna seh. Cucu thil kalning a si.
Cu ti si țung loin kan ti khawh tawk in Bawipa ram caah kan cawlcanghnâk le tuahsernâk kong lih le zawndamh bak in chim lengmang hi oneness ziaza ah mi nih an ruah thai sual lai ti zong hi ruat pah hna seh. FB a si ai pat tiah hngalhfian hua ha lomi lih le zawndamh i chim hi Pathian nih a kan hmuh i a kan hngalh ko ti hna hi oneness hna nih hin an ruat hnga lo maw?

Be the first to comment

Leave a Reply

Your email address will not be published.


*