Ruah awk; CDF Pawl Mindat, Kanpalet, Daai, Paletwa, Asho-Chin Le Mara Buu pawl cu AA He

Ruah awk; CDF Pawl Mindat, Kanpalet, Daai, Paletwa, Asho-Chin Le Mara Buu pawl cu AA He
========
Thlanglei laitlang CDF pawl: Mindat, Kanpalett, Daai, Paletwa, Asho-Chin, Mara DF buu pawl in Yaw tiang hi AA he an ipehtlaihnak a tha, an i hawikomhnak a tha ngai ti cu on the ground level tiang tha tein a hlethlaimi nih cun theih cio asi. Theihnak lengin an ipehtlaihnak a thuk kho rih.

Mindat-CDF hruaitu pakhat asimi Naing Tam nih “Paletwa kong cu Paletwa um pawl nih bia an khiah te ko lai” tiin nai ah a facebook ah a tial. Mah a bia hi Paletwa issue kongah ruah awk pakhat in ka hmuh. Paletwa issue solution caah realistic le practical pakhat asi ve ko lo maw?

Cun, Paletwa hi Chin ramchung ah rilipi chuahluh khawh nak khua pakhat te lawng kan ngeihmi asi tiin chim le rel a tam ngai. Nain ahohmanh nih an chim chih tawn lomi cu rilipi luhchuah khawh nak caah Rakhine ramchung meng tampi kal/tan hnu lawngah rilipi lei kal khawh asi timi hi asi.

Chim duhnak cu a takin chim ko ahcun kan ram le an ram kan ipehtlaih ning hi then duh zongah then awk a tha lomi kan si. Mirang holh in cun- thanchonak siseh, umkalnak siseh, hriamnam dohthlennak ah siseh- interdependent taktak kan si.

Nizan thawngpang a lengmi helicopter a tum lio ah AA nih an kahnak Paletwa peng Tantaung ralkap sakhan hi Pu Henry Van Thio nih ruahnak peknak in Kawl ralkap nih sakhan an rak chiahmi asi tiin Pu Nay J (Daai) upa nih a ka chimh. A hman tak le tak lo cu ka thei lo nain Pu Nay J hi Daai le Paletwa ramri kong hrawngah thil a cangmi a ka chimhmi pawl cu tu tiangah a palhmi ka hmuh rih lo caah zumh awktlak pakhat in ka ruahmi minung asi.

Atu cu mah sakhan hi Rakhine ram le thlanglei laitlang ipehtlaihnak lam cungah a um caah rawl le eidin, thilri phorh te pawl tikah kazawn a thumi ralkap le palik nih an lungtluang le tluang ning kalpi khawh asi, an lungtluang lo ahcun duh poah in an kham hna ti asi.

Pu Henry Van Thio hna nih atu thil sining hei thei sehlaw zeitin dek mah Tantaung sakhan kongah a lungthin a um hnga.

Hi ca a tialtu hi Kawl ralkap bo 3 a rak si i CDM a tuahmi asi. Mindat-CDF nih an i bochan ngaimi tintan saya pakhat asi. A tialmi cu” A harmi cu kan mah lei kam ralkap (Chin) an thih tik hmanh ah zeibantuk thazang dernak dah kan ngeih hnga tiin raltuknak lei kam zohin kan tuaktan khawh lomi hi asi. Cucaah tintan biatak tein pe ka zuam peng nak asi”.

Mindat-CDF nih Kawl ralkap mawtawka bom in an puah hnawh i a rawk mi asi. Mindat-CDF hi Laitlang ahcun Kawl ralkap a thua kho bik an si ko. Tehte (evidence) tha tein an langhter khawh chih lengmang mi hrim hi lawmh a um tuk. Cheukhat phu pawl cu cu zat, kha zat kan thah hna, kan hna tiin thawngpang cu an chuah cio nain zeihmanh tehte an langhter chih khawh tawn lo caah zumh an har pah theu.

Wa State; Rakhine people government ti tiangin an auh hna hmanh ah an lungthin a thlen colh ding cu an si rua lo. Nain cheukhat tlangcung miphun pawl tu cu kan thilthuam te hmanh nikhat chung a kan hruk piak hmanh ah kan ilungsi tuk cang. Kan ri khim cang. Naingngaizi ah a mature le mature lo cu kan rak idang hrim ko.

Mah le ruahning cio; Ramdang pawl sinah bawmhnak hmuhnak ding le advocate kan tuah tluk i 10% hrawng telin kiangkam hriamnam tlai pawl he remhnak le ihawikomhnak tuah khawh izuam usihlaw caan le phaisa a dihmi hi miphunpi caah hlawhtlinnak a tam deuh lai tiin ka ruah tawn.

A hmun taktak ah a cawlcangmi (on the ground) le kan kiangkam hriamtlai pawl he ihawikomh khawhnak lam hawl hi ramdang ah va au leng nakin a lehin a tak ah hma a kal deuh tuk ding asi. Nain rem lonak hmape tam tuk a rak ngei cia mi pawl nih cun remnak le ikomhnak cu an kan serpi khawh ding cu a har men lai. Cucaah mithmai thar, thanthar mino le a thi a linmi hruaitu pawl nih hmai ah a kan norpi lawnglawngah hma a kal lai.

Nunnak le thihnak he tuahmi dohthlennak ah kan mah le kan mah abiapi bik asi.Pahnihnak ah innpa hriamtlai pawl he ihawikomh thiam hi asi timi hi 100% ah 100% ka zumhmi asi. A dang pawl kong khi cu tuah khawh le tuah, tuah khawh lo zongah a poi tuk ah chiah dingin ka ruah lem lo. Credit: Salai Z T Lian

Be the first to comment

Leave a Reply

Your email address will not be published.


*