Russia Defense Minister Nih US cu a Chawnh Ruangmang!

Russia Defense Minister Nih US cu a Chawnh Ruangmang
======
A ral Americanpa he chawn duh lo in thla tampi a um hnu ah Friday ah khan Russian Minister of Defense Sergei Shoigu nih US Defense Secretary Lloyd Austin cu a chonh. Asinain, an i chonhmi nih hin Moscow nih Ukraine a tukmi a khupthal leh le lehlo kongah zei neh le nang hmanh a um lo, tiah officials nih an chim.

Kan i chonhmi nih hin Ukraine ral kongah zeihmanh thil a chuahpi theng lo nain, suimilam pakhat chung phone kan i chonhmi hi khat le khat kan i chonhbiaknak nunternak caah a biapi ngai mi a si, a ti. Hi phone call kongkau a thoktu hi Austin a si, February i ral a thawh hnu in American bawi ngan pakhat nih Russia official a chonh hmasabik a si. Thla tampi chung cu Russia hruaitu pawl nih Austin le Army Gen Mark Milley, chairman of the Joint Chiefts of Staff, i an phone an tlai duh lo, tiah Pentagon officials nih an chim.

Ukraine ral an thok zarhkhat hlan hmu in khan a tutan hi avoikhatnak an i chonh a si. Russian chief of the general staff a si mi Gen. Valery Gerasimov zong Milley nih chonh khawh te lai ai ruahchan. Ukraine nan kahmi hi a rannak in hngol cang u, cun phone in kan i pehtlaihnak lines nunter zong hi a biapi, tiin Austin nih a ti, tiah Pentagon nih a chim.

Tutan phone an i chonhmi hi a thalei a si ko, tiah officials tampi nih an ti ko nain, Friday i Russia lei nih US an chonh hmasatnak a ruang belte theih a si kho rih lo, ti a si. US nih hin hmailei ah Russia he i chonhbiak um kho seh, ti a duh i, tutan i Austin nih hmailei khat le khat i chonhbiaknak um dingin a duhnak a langhter hi thatein Russia lei nih an theih cang ko. Tutan an i chonhbaimi hi thil pical ngai a si, tiah official nih a chim.

US le Russia an defense le military hruaitu direct in an i chonhnak a ruangbik cu khat le khat an karlak ah i theihthiamlonak asiloah aamahkhan awk a tha lo mi buainak hrial an duh veve caah a si theu lai, tiah ruah a si. Cun US le Russia nih buainak tlunter lo nak ding hmunhma an halh cang. Ukraine pawngkam ah a ummi NATO ramhawi pawl fahnak asiloah a hnuarsuang kho dirhmun ah an ruahmi thil pawl an ralkap nih (US, asiloah Russia) hman khawhmi hmunhma an halh cang. Cu an halhmi hmunhma cu nihin tiang cu hman a si rih lo, asinain, cu ti hmunhma halh a si mi cu nihin tiangah cun zulh le upat a si ko, tiah Phone chungin Russia lei nih lehnak an tuah.

Russia nih Ukraine a luhhnawh i, Donbas pengkulh lak ai tinh ningnak in zarh 2 hrawng a tlai deuh, tiah US le Western officials nih an chim. Pehzulh in hlawhtlinnak a ngei kho lo, tiah an chim. Friday ah khan Ukraine nih ceilak in Russia an den than hna i, nichuah lei ah a ummi tiva tannak ah an hmanmi hlei cu Ukraine nih a hrawhpiak. Cu sunghnak nih cun belmang ai neih cangmi ralpi Russia nih a hmaimilh a timhmi a hlawhcham than, tiah US le British officials nih an chim.

Siversky Donets River ah ai khangmi Russia sermi hlei an hrawhmi cu Ukraine airbone command nih hmanthlak le video in a langhter. Hlei pawng i tawr le cheng in ai rawkmi Russia raltuknak mawtaw pawl zong an lang ve. Luhhnawhtu Russia tampi tiva tawne ah kan thlak hna, tiah Ukraine nih an chim. Russia nih Kyiv lak an i timhmi an tlolh in cun, Donbas tu hi a nichiar ti awk in kah le doh a tong cang.

Russia Ralkap Thimi le Hriamnam Sunghmi; Ralkap 27200 an thi cang, Tanks 1218 an hrawh cang, Conbat Armoured Vehicles 2934, Miakpi 551 an hrawh cang, Rockets kahnak motor 195, Vanlawng kahnak motors 88, Vanlawng 200, Helicopters 163, Drones (UAV) 411, Cruise Missiles 95, Tilawng 13, Ralkap motors 2059, Special equipment 42. Credit: Chelsea Bawi

Be the first to comment

Leave a Reply

Your email address will not be published.


*