Russia Kut chungin Kherson Khuate pawl Ukraine nih an Lak Than Cang!

Russia Kut chungin Kherson Khuate pawl Ukraine nih an Lak Than Cang!
======
Kherson pengkulh chungum a biapi ngaimi khuate pakhat Ukraine nih an lak khawh than cang. Russia ralkap pawl nih khua cu an chuahtak. Davydiv Brid ah 35th marine brigade nih Ukraine flag an tar lio video in an langhter. Cun a dang kiangkap khuate tampi an laknak zong an langhter.

Ukraine in north-east lei ah Russia pawl sungh lawng te an rian ko cang. Thlanglei zongah Ukraine nih an nawr cuahmah hna. Tutan i Ukraine pengkulh 4 Russia nih a ram si dingin a thanhmi hi International Law he ai kalh. Cucaah US zong nih a cohlanpiak hrimhrim lo, tiin Zelensky nih Tuesday ah khan a chim. MIMARS hriamnam telhchih in a dang US bomhnak $625 million zong tlung chom ding a si.

Kherson khuapi belte cu Russia nih a uk ko rih. Asinain, Dnieper River tiva kuang hrawh, a hriangkawng hrawnghrang belte Ukraine nih a netcutmat cang, tiah theih a si. A liamcia suimilam 48 chungah khan mah tiva in nitlaklei tiang Ukraine ralkap pawl hmai an nawr khawh cang i, Kherson pengkulh in thlanglei sakhaan zong Russia nih an thluahmah cuahmah cang hna.

Tutan zarh chungah hin Ukraine in chaklei ah kan Ukraine ralkap pawl an thawngtha, an khul a rang ngai hna i, sakhan le khuate tampi zong an lak khawh hna, tiin Zelensky nih a chim. Dvaydiv Brid khua ah kan Ukraine flag ai zamlen than cang, tiin Ukraine defense ministry nih a chim. Ukraine ralkap pawl khuatlang hrawn in an kal lio zong khuami hna nih video in an zeih hna.

Lyubymivka, Khreshchenivka, Zolota Balka, Bilyaivka, Ukrainka, Velyka Oleksandrivka le Mala Oleksandrivka khuate pawl hi an lak khawh than cang. Asinain lak kan i tinhmi a zat cu a phan nai sai rih lo. Aningpi in lak kan i tinh caah.., tiin Zelensky nih a chim. Russia nih Ukraine sinin an lakmi khua hi 50 a si i, Kherson i an thlah thanmi hna Ukraine mipi hi 3,500 hrawng an si, tiin Ukraine deputy interior minister Yevhen Enin nih a chim.

Russia ralkap pawl an lung a dongh cang caah, a tu hi Ukraine ralkap pawl kham dingin hlei paohpaoh chah viar an i tim, tiin Ukraine defense ministry nih a chim. “Thinphannak ding a ruang a um lo. Davydiv Brid hi Ukraine kut a phan than cang, timi tehte a um lo. Cun Russia ralkap lei zong nih mah ka khua i sunghnak kong zong a chim rih fawn lo,” tiin Russia nih Kherson ah an chiahmi bawi Kirill Stremousov nih khuami a chimh hna.

Asinain, map zoh tikah, Arkhanhelske le Velyka Oleksandrivka khua, cun Dnieper tiva kap a ummi Dudchany zong Russia kut ah an um ti lo a lang. Kan ralkap pawl hi Ukraine nih an kulh sual hna lai, ti kan phan caah hnung an tolhter hna. Zeitik i an i ton lai, ti chimh khawh a si lo, tiin Russia lei nih an chim. “Sang tampi cu vutcam ah an cang dih. A cheu le bang cu inn ai rawk lo mi hrim an um lo,” tiin Russi anih an tlaihmi Ukraine Kherson deputy Mayor Roman Holovnia nih a chim.

Ukraine ralkap pawl an thawng chinchin cang, timi thawngpang an theih hnu cun Kherson khuami hna nih nika conh in an conh hna, tiin a chim. Ral thawh hlan ah khan minung 320,000 an si i, ral thawh hnu in 100,000 lawng an tang cang. Kherson i Russia pawl tirawl, minung, hriamnam an i chanhnak hmunhma ko hi Ukraine nih chahpiak dih dingin ai hmaithlak hna. Hlei an hrawhmi zong um el cang. Chaklei belte ah an hlawhtlinnak a nuar ngai rih.

Donetsk in north-east ah a ummi Kharkiv tu ah hin cun Ukraine pawl an hlawhtlin a rang ngaingai. Lyman ah hin mipi tlawmte an tang ko rih. Khua lenglei ah khin Russia ralkap pawl an ruak cu an uniform pi he an ril lulh ko hna, tiin BBC Orla Guerin nih Lyman khua in thawng a thanh. Lyman pawngah Russia tanhtu hriamtlai pawl cu Ukraine nih an kulh hna nain, a luat mi cheukhat an um, tiah Russia kong a tialtu nih an chim.

“Lyman in kan chuak kho, asinain kan tak lawng bakin a si ve. Meithal zeihmanh kan i ken kho lo. Zeizong te an kang dih. Kan hawilei le kan ralkapbawi hna an ruak cu kan kaltak hna,” tiin Mikhei an ti mi a luatmi pakhat nih a chim.
Putin nih ralkap khomhsuat dingin tlang a au hnu in a tutiang i an khomhsuat khawhmi hi 200,000 an sic ang, tiah Russia defense minister Sergie nih a chim. A hmasa i an i tinhmi zat cu 300,000 a si na in, a zammi asiloah hriamnam ai deih lo mi zaza an um, tiah theih a si. A liamcia zarh hnih in khan cu 200,000 hna cu Russia ramri an lonh cang hna, tiah Kazakhstan lawng nih a thanh. Credit: Chelsea Bawi