Russia Nih Ai Uan Bikmi Satan-2 Intercontinental Nuclear Missile Hi Zeibantuk Ko Dah Asi Hnga?

Russia Nih Ai Uan Bikmi Satan-2 Intercontinental Nuclear Missile Hi Zeibantuk Ko Dah Asi Hnga?
========
Ukraine a luhhnawhmi sungh lawng a renh hnu in cun Western ram pawl cu nuclear in kah dingin Russia defence committee deputy chairman Aleksey Zhuravlyov nih a hrocer cang hna. Sweden le Finland NATO luh an i timhmi kong he pehtlaiin Russia TV nih interview an tuah i, “Hi ram pahnih le Putin nih saupi a remti lo mi US le UK hi Russia nih “Satan-2” tiin min an pekmi a RS-28 Sarmat intercontinental ballistic missile (ICBM) in a kah te khawhmi a si” tiin Zhuravlyov nih a chim.

“Finland nih NATO luh a duh ah cun, kan i tinhmi hi phungning te a si ko – An ram a himnak kong hi ruahphu a si hnga. Hihi ruah phu a si,” tiin Zhuravlyov nih a chim. “US nih a kan hrocer ah cun, a tha ko e. Khah, nan caah Sarmat a um ko hi aw. Russia hi um ti lo dingin na timhpiak a si ah cun, nu sinin nuclear vutcaam a ra te ko lai. USA he nan i tong ko lai, tiin Finland nih a chim. Si e, vun i tel ve ngat” tiin a hro hna.

Finland ramri ah Russia nih a nuclear base dirh a timhmi nan hnonpiak ruangah mah bantuk hin donghnak nan phan te ko lai. Siberia in Sarmat in kan in kahphak khawh hna, UK zong kan phak khawh. Kaliningrad in kan kah a si ah cun – hypersonic hmangin second 200 chungah kan in phak hna lai.. cucah, leu pawl, vun pah ko hnih tuah u, tiin a hro hna.

Finland ramri ah hin cun second 10 in 20 chungah Finland a kapphan ding Kinzhal bomb dah ti lo hriamnaam tha ngaingai kan chia lai lo, tiin a chim. Sarmat ICBM hi pee 116 hrawng a sau i, ton 220 hrawng a ritmi mawtaw a si i, voikhat phurh ah nuclear warheads 15 a phurh khawh. Cun, Multiple Independently Targetable Re-Entery Vehicles (MIRVs) zong ai ngeih, asullam cu, tarket tampi hi voikhat te ah a kah khawh, tinak a si.

“Satan” ICBM asiloah R-36 or Voevada, tiin rak ser hmasabikmi hriamnaam a chongtu a si. R-36 hi Soviet chan ta a si i, warheads 10 lawng a phur kho i, meng 6,340 in 9,940 hrawng tiang lawng a kap khomi hriamnaam an si. Satan-2 belte hi cu meng 6,200 in 11,180 tiang a kap kho mi an si, tiah US Center for Strategic and International Studies data nih a chim.

April 20 ah khan Putin cozah nih Satan-2 cu test a tuah i, Plesetsk Cosmodrome in a kah i, Kamchatka Peninsula i Kura Missile Test Range tiang thatein a phan kho, tiin tlang an tlir.

Ukraine ram Khuapi pakhat cu Russia kut chungah a tla cang lai! Ukraine ram, Mariupol khua a khammi Ukraine ralkap a zaa leng nih ṭha tein ceihhmainak an ngeih hnu ah Russia ralkap sin ah a sungh pek in hmunhma an khuarnak sehzung cu thlah ding in timhtuahnak an ngeih caah Mariupol khua ning in Russia kut chungah a tla deng cang.

Raltuknak a chuah hlan ah, minung 430,000 hrawng an umnak Azov rili kam ah a ummi Mariupol khua cu Russia nih thla thum deng a doh i Ukraine kahdohnak chungah a nganbik teinak zong a si kho men. Asinain, Russia nih nichuah lei Ukraine ram lak khawhnak ding, Ukraine President Volodymyr Zelenskyy cozah thlak ding le Ukraine khuapi Kyiv lak khawhnak ding cu aa harh ko lai.

Russia nih hriamngan in a kah lengmang ruangah a rawk dih deng cangmi Mariupol khua ah mipi 20,000 hrawng an thi cang lai tiah Ukraine cozah nih a ruahdamh. 2014 ah Russia nih Ukraine sin in a chuhmi Crimean Peninsula le Russia khuapi karlak ah Mariupol khua hi a ummi a si.

Fak tuk in hliamhma a tuarmi telh in Ukraine ralkap 260 nih May 16 ah Azovstal sehzung in an chuak i Russia ralkap sin ah a sungh an rak pek cang. Sehzung chungah a tapmi Ukraine ralkap pawl ṭhialkamnak caah kan tawlrel cuahmah liopi a si tiah Ukraine cozah nih a chim ko nain pazeizah dah an tang rih timi tu cu a fiang in a chim lo. A bubu in sungh an peknak nak puai tiah Russia nih a chim.

Ukraine lei nih cun khuakam hngaktu ralkap pawl cu an rian an tlamtlinh tiah a chim ve. Ukraine ralkap pawl sehzung chung in an chuak cang tiah Ukraine President Volodymyr Zalenskyy nih a thanh lioah an nih pawl cu pasal ṭha an si caah an nun a herh tiah a chim.

Be the first to comment

Leave a Reply

Your email address will not be published.


*