Russia nih ram 2 cu gas supply a phih kanh cang hna!

Russia nih ram 2 cu gas supply a phih kanh cang hna!
=========
Russia nih ram 2 cu gas supply a phih kanh cang hna. Tuchun Wednesday ah Poland le Bulgaria cu gas pipeline in kan kuat tawn mi gas supply cu phih piak an si cang tiah Russian cozah ta asi mi engery company ngan Gazprom nih a thanh.

Poland nih ramdang in gas import a lak mi vialte 55 % hi Russian gas pipeline in kuat mi asi. Bulgaria nih gas import a lak mi dihlak chung in 75% hi Russian gas pipeline in asi ve. Gas supply an phih kanh hna nak a ruang cu Russian natural gas an cawknak kha Russian phaisa ruble in an pek duh lo caah asi ko.

Russia nih Europe ram ah gas export a tuah mi vialte hi euro phaisa in an cawk tawn, cucu hnatlaknak an tuah ning zong asi nain Putin nih Russian economy le an ram phaisa a man a tlak lo nak ding ah Russia sin in natural gas a caw mi vialte nih kan ram phaisa ruble in a man nan pek lai a rak ti hna. Russian ruble in a pe duh lo mi poah gas phih kanh nan si lai tiah a tlerhkhonh hna. Cucu a tu ah Poland le Bulgaria sin ah hmasa bik a van tuah taktak cang.

Poland PM nih cun natural gas kan hman ning 76% normal in a kal ko, chambau tuk in kan um lai lo, reserved gas tampi kan i chiah fawn ko i kan buai lai lo, Russian gas i bochan lo ding in um khawh nak lam kan kawl cuahmah lio asi a ti. Germany zong hi biatak tein Ukraine a bawm tu asi. Atu le bang cu raltuknak tank tthattha kuat hram a thok fawn cang i tlawmpal ah gas phih kanh a tong ve kho ve.

Thil umtuning a fak chin lengmang ko. Russian foreign minister Lavrov nih “Russia le Ukraine buainak nih vawlei ralpi pathumnak a chuah ter nak ding lam a neih ngai ko, a tu dirhnum hi ttihnung ngai asi ko, a sawhsawh in ruah ding asi lo” a ti.

Tulio Europe ram buainak rumro ttial peng zong hi mi a simh pah nain 1945 hnu ah vawlei ral ngan bik a thawh asi tik ah vawlei pi himnak (security) zong ai ning cang ti lo ti asi caah van ttial pah lengmang a hau ko.

Tulio Russia – Ukraine ral kong ah biahalnak le bialehnak; Russia – Ukraine war kong ah mipi nih theih an duh mi biahalnak an tuah lengmang. Bialehnak a tuah tu pawl hi university minthang le National Defense College tbk in anmah le field cio ah experts asi mi minung 50 renglo i fonh in biahalnak le bialehnak nifatin an tuah peng. Cu biahalnak le bialehnak pawl chung in siaherh deuh tete ka van ttial tawn lai (a rel huam mi caah).

Q 1. Zeiruang ah USA le nitlak lei ram pawl hi Ukraine kong ah hitin an cawl hnga? Cu hlan ah teh ram pakhat chung ralthawhnak ah tubantuk in an i thlak bal maw, i.e., 1980 hrawng ah Russia nih Afghanistan a tuk lio ah an i thlak ve maw?

Answer – Russia nih Afghanistan a tuk lio zong ah nitlak lei nih an bomh ve ko hna. Civil Society le State Authorities channel pahnih in an bomh ko hna. State Authorities sin ah military assistance (hriamnam bomhnak) an luh ter ning tu cu Pakistani Intelligence sin in Mujahedin rebel movement sin ah an luh ter. 1979 in Pakistani Intelligence channel in USA nih tangka le hriamnam a bomh mi cu $ 20 billion asi. 1986 in USA nih Stinger anti-aircraft missiles (vanlawng kahnak) a bomh hna i Russia an teinak ah bawmchan tu taktak a rak si. Tulio Ukraine an bomh ning ai dan nak tu cu; USA le nitlak ram nih Ukraine cozah sin ah direct in bomhnak an kuat.

Q 2. Russia nih Europe ah a kuat mi gas pipeline hi Ukraine ram chung in a kal mi asi i, ziah Ukraine nih pipeline cu an chah ko lo?

Answer – Russian gas pipeline hi Ukraine ram tan in Europe ah kuat mi asi caah Ukraine nih thlakhat ah USD 100 million income an hmuh ve. Thlakhat USD 100 million an hmuhnak asi caah an ram economy caah biapi tuk a rak si ve. Cupin ah Ukraine ram tan in gas pipeline a kal mi hngachat in a um mi nitlak lei Europe ram tamtuk an um, i.e., Czech Republic khi an ram energy supply 100% khi Russia gas pipeline ai hngat mi asi, Slovakia khi 86% hngatchan in a um mi asi, Germany khi 65% Russia gas pipeline hngatchan in a um ve. Cu hna he hawikomhnak ttha le pehtleihnak ttha ngeih peng kha Ukraine nih a duh. Europe ram he i pehtliahnak kha stable te um kha Ukriane nih a duh mi asi caah pipeline van chah ding cu thil har ngai asi.

Q 3. Russia – Ukraine war a dih tik ah Russia nih Ukraine sungh zatlaknak hi a liamh hna lai maw (compensation a pe hna lai maw?), nitlak ram pawl ah Russia ngeih mi chawva le thilri pawl hi Ukraine sersiamnak ah hman khawh asi lai maw?

Answer – Ral a dih tik ah Ukraine nih a sungh mi vialte liamh ding kha Russia rian bak asi ko. Asinain mah hi cawiliamhnak umtuning hi automatic in kal pi awk a ttha mi asi lo. Hmasa bik ah international baiceih zung nih Russia nih Ukraine sungh zatlak mi vialte a liamh lai tiin biachahnak an tuah hmasa hau. Cu hnu ah zeitindah cawiliamhnak an tuah lai ti kha kaphnih hnatlaknak um a hau. Cu kaphnih hnatlaknak ti mi zawn ah Russia nih biachahnak a zulh ding hi tulio thil umtuning zoh tik ah zumh a um lo. Russia nih a liam duh lo tik ah ramdang ah ai chiah mi thilri le chawva vialte chuh in Ukraine sersiamnak hman ding khi a lam um kho mi asi.

British PM Boris Johnson cu Ukraine bawmtu lak ah ram tthawng hruaitu pakhat asi i a mah pumpak in Kyiv khuapi ah Ukraine president he zong an i tong. Kan hnung zarh India a tlawn lio ah Russia-Ukraine war kong an hal. A chim mi cu; Russia hi fak piin i palhnak le sunghnak a tong ko nain ral teitu sikhawhnak dirhmun a ngei tthiam ko rih, zeicatiah ralkap thazaang tamtuk pei a neih rih cu a ti.

A bia a peh mi cu hi ral hi 2023 tiang a rau kho mi asi a ti (Business Insider). Cu lio ah Ukraine PM Denys Sjmyhal cu US ah President Biden le Secretary of State Antony Blinken he an i tong ve. A nih tu nih cun Boris Johnson bia ai hrawm lo. “Atu kan tlawn lio hna ahhin fiang tein ka chim ngam mi cu Russia ral hi a ra lio mi ni zeimawzat chung ah maw, a zarh chung ah maw, a thla chung ah dek kan tei hrimhrim lai” tiah US hruaitu pawl hmai ah a chim ve. Credit: Sangukceu Zinhlawng

Be the first to comment

Leave a Reply

Your email address will not be published.


*