Russia Ralkap A Thimi An Kar Chin Langmang!

Russia Ralkap A Thimi An Kar Chin Langmang!
==========
Russia Ralkap Thimi le Hriamnam Sunghmi; Minung 17800 an thi cang, Tanks 631 an hrawh cang, Combat armored vehicles (APV) 1776, Miakpi (artillery systems) 317, Rockets kahnak motor (RSZV, MLRS) 100, Vanlawng kahnak (Anti-aircraft warfare) 4, Vanlawng (planes/ aircraft) 143, Helicopters 134.

Ralkap motors (car equipment vehicles) 1236, Tilawng (ships, boats, cutters) 7, Datsi phur motor(tank with PMM, fuel tanks) 76, Drones (UAV operational tactical level) 87. Special equipment, special equipment – 24. Luscious installations OTRK, TRK, SRBM 4.

Russian helicopter an i uan tukmi cu Holubivka khua pawng, west of Luhansk, ah UK nih vanlawng kahnak a siammi Ukraine a pekmi starstreak system in a mei kiak lakin an kah piak i a tla vuaimai ko hi.

Nihin Russia dirhmun le Chernobhyl nuclear plant a chuahtaknak; Faktuk in ai rawkmi Chernobhyl nuclear plant pi cu Russia nih kanmah Ukraine kut an kan up than hnu ah, cu hmun cu an chuahtak colh. Cuka i khua a sami hna nih Russia pawl kahdohnak cu an rak dironh khawh hna i, kham cangmi tirawl le a dang bomhnak zong an orh lio pi a si” tiah Ukraine lei nawlngeitu nih an chim.

“Cu ti nuclear hmunhma an chuahtaknak a ruang cu, a pawngkam ramtang ah Russia ralkap nih i vennak tencikhur an i cawh sek len ko nain, nuclear khuvai an i ham caah a si,” tiah Ukraine state power company Energoatom nih a chim.
Cu ti Ukraine lei nih an chimmi cu International Atomic Energy Agency nih biafiang asi maw si lo timi cu fianternak an tuah rih hna lo.

A va si taktak ko ah cun, Friday zinglei ah khan Ukraine helicopter nih an ramri ah a ummi zinaan khonnak a kan kahpiak, tiah Russia Belgorod governor nih a chim. Cu zinaan khonnak cu Russia energy Roseneft nih ai ngeihmi a si i, Russia le Ukraine ramri in meng 21 ai hlatnak ah a um. Ukraine Helicopter nih cun an innpi cu kang lakin a kah i, minung 2 hliam an pu, tiah Belgorod governor Vyacheslav Gladkov nih Telegram ah a tar.

“Ukraine helicopters pahnih cu Russia ram chungah niamtein an hung lut riangmang i, a tu bantukin kan zinaan khonnak inn cu an vun kah ko,” tiah governor nih a chim. Social media ah an thlah tungmi hmanthlak le video pawl hi media pical cheukhat nih cun an fehter colh ve rih lo. Russia nih an lakmi Chernihiv in chaklei ah a umi Sloboda le Lukashivka i khuate pawl cu Ukraine nih an lak khawh than cang hna i, a tu hi Kyiv le Chernihiv an i hlatnakbik lampi cungah Ukraine pawl hmunhma an khuar cang, tiah Britain Defense Ministry nih a chim.

Kyiv in nichuahlei le northeast lei ah duhsahtein Ukraine pawl hlawhtlin lei an panh ciahmah. “Kyiv le a velcheh ah cun cawlcanghnak tam in kan tuah ti lai lo,” tiah Tuesday ah khan Russia officials nih thawng a thanh ko nain, Chernihiv le Kyiv cu hehtiah tanglei le cunglei in a phomh thiamthiam ko rih. Russia nih a raltukmi dinhdorhdeuh ai timhnak kong a chimmi tham cu vun i hrim than i Ukraine i nichuahlei hmunhma pawl vun lak than a duh caah a si, tiah Western official nih an chim.

Thlanglei le a laifang in a tu bantuk i Russia ai zuhphiah thanmi hi nichuahlei kap in vun kan doh than a duh caah, ai timhlamh bia a si, tiah Ukraine President Zelensky nih a chim. “An i tinhmi kan theih ko. An kan celhlo nak hmun an chuahtak tham cu kan ca i a harsa te ding mi hmunhma biapi zawn in doh an kan duh cu kan theihtuk. Kan hmailei caan ah raltuk a um ko rih lai,” tiah Zelensky nih a chim. Zarh nga chung i Ukraine mipi a thong in a thattu le 4 million hrawng ralzam dirhmun a phaktertu ralpi kong he pehtlaiin Friday ah khin video in Russia le Ukraine biaruahtinak ngeih an i tim. Kaphnih in ral an daihter lai cu zumh a si ruam lo.

“Kan ramhnih aiawh in biaceihtu pawl nih tamdeuh in rian an lim hlan chung paoh cu, ikahnak vun mak ding le Zelensky he ton biaruahnak ngeih ding cun a tuantuk rih ka ti,” tiah Putin nih a chim. Cu a chimmi cu Thursday i telephone in Italy Premier Mario he bia an i ruah lio ah a chimmi a si. “Bomb a thla kho hriamnam ai bunhmi mawtaw ka ram nih an bomh lai,” tiah Thursday i Zelensky nih Australian Parliament sin i bomhnak a hal lio ah Prime Minister Scott Morrison nih a chim.

Zelensky nih min kheh tein a halmi four-wheel drive hriamnam bunh mawtaw cu Europe lei ah vanlawng in kuat a si colh lai. A zat belte chim a si lo. “Thla lawng kan in campiak hna lo. Kan meithal, kan zenkuan, a dangdang bomhnak kan i kuat chih hna. Meithal teihlo tangkhamh angki, hi vialte hi kan in kuat hna. A tu zong kan raltuknak mawtaw, kan Bushmasters zong kan in kuat rih fawn hna lai,” tiin Morrison nih a chim.

Russia nih caan tawite chung a cheukhat hmun ah kahdohnak ngol chung dingin lungtlinnak a tuah hnu ko zongah cun, Thursday ah khan Mariupol i rilikap khua pakhat ah bus 45 an kham i passengers an chuahter viar hna. Minung 631 lawng nih an pumpak mawtaw mongh in khua an chuah tak khawh, tiah Ukraine cozah nih a chim. Mariupol lei kuatmi tirawl le sii ton 14 tluk tam a phurtu bus 12 renglo zong Russia nih a tlaih, tiah Ukraine Deputy Prime Minister Iryna Vereshchuk nih a chim.

Hi khuapi hi tutan ral a thawh hnu ah Tulsa put in fak bik in ai rawkmi khuapi a si. Humanitarian riantuantu hna bomhnak thawngin kan hnung zarh tlawmpal chungah khuami thong tampi cu an zam manh. Ral thawh hlan ah hi khua milu hi 430,000 an si i, kan hnung zarh tiangah khan cun 100,000 lawng an tang cang. Pehzulh in Russia nih a kah hna caah, zaamnak lam le bomhnak hmuh an i harh ngaingai ko.

An hrawh cikcekmi nuclear hmunhma cu Ukraine kut lila ah Russia nih capar he an ap hna, tiah IAEA nih a chim. Friday zingka in khan Chernobyl cu Russia nih a chuahtak, tiah Ukraine cozah agency pakhat nih a chim. Nuclear khuvai ai hampmi Russia ralkap an dirhmun kongah le minung zeizat nih an i ham, timi Energoatom nih zei a chim fiang khi rih lo. Kremlin lei zong nih zeihmanh bia lehnak a um rih lo. Kanmah IAEA tu nih thawngpang kan hlat lio pi a si, tiah IAEA nih an chim.

Feb. 24 ah khan Russia nih Chernobyl nuclear hmunhma cu an lak i, radiation chuahter lakin an hrawh sual lai, tiah an thin lawng an rak i domh bal. Cuka i riantuantu nih cun a himbawmnak hnga thatein tuanvo an lak ko i, 1986 i a rak puak balmi concrete nih a chilhmi tung le vampang pawl zong thatein an zohkhenh ko. “Russia ralkap tamtuk nih a khu an i hamh lai cu zumh a si lem lo. Asinain, thawngpang dikdiar theih hlan ah cun chim awk a tha fawn lo,” tiah US ah a ummi Union of Concerned Scientists phu i nuclear lei thiamsang Edwin Lyman nih a chim.

Ukraine i nuclear kong ceihhmaiti dingin Friday ah khan Russia hmunhma Galiningrad ah IAEA director-general Rafale Crossi cu a phan. Ukraine i nuclear sehzung 15 lakah 9 hi rian a tuan cuahmahmi an si i, cu 9 lakah cun Russia nih an ukmi Zaporizhzhya ah 2 ai tel, tiah IAEA nih a chim. Tutan zarh awtka hrawngah khan Kyiv a velchum ah siseh, Chernihiv in thlanglei ah siseh Russia nih kahdohnak a thumh lai, tiah a chim. Kaphnih karlak ah khat le khat i zumhraihnak um kho seh, ti ka duh caah a si, tiah Russia lei nih an chim.

Asinain, Kyiv khuakil ah a ummi Irpin le Makariv cu Thursday ah khan Russia nih bomb in a vun phomh thiamthiam. Hostomel zongah ral an tu cuahmah ko. Brovary ah Ukraine nih Russia cu a nawr ve caah nichuahlei tiang an zam, tiah regional governor Oleksandr Palviuk nih a chim. Kyiv khualeng i checkpoint ah a ummi Ukraine ralkap le officers pawl an hmuh ve ningah, Russia nih Kyiv a hnung a chittak lai hi an zum kho ruam lo ti asi.

“Kyiv le Chernihiv i Russia nih a raltukmi a hmual a thumh hi zeidah a sullam a si? Kyiv cung i a thlah dingmi missile zun 200 kha thla than lo in 100 lawng ah maw a vun thumh lai? Asiloah zeidang a um rih hnga maw?” tiin Brig. Gen. Valeriy Embakov nih a chim. Intelligence nih a hmuhning ah, Russia nih Ukraine a kahmi hi a thum naisai lo. Donbas ah ralkap thazaang vun tharchuah le thawnter chinchin a duh bia a si, tiah NATO Secretary-General Jens Stoltenberg nih a chim.

“Russia hi ai tinhmi kongah tu le tu lih a chim. Kyiv le a dang khuapi ah kahdohnak a dorh bantuk in ai umter lio ah, kadang ah fakdeuh in fahnak tlunter ai timh timi hi kan i fian awk a si,” tiah Stoltenberg nih a chim. Donbas hi sehzung pawl an umnak hmun, Russia holh a hmangmi an umnak hmun le Russia dirkamhtu separatists pawl an umnak hmun a si. 2014 lio tein khan Ukraine cozah a dotu an si. Cucaah, a tu i Russia nih ai tinhbik mi cu Donbas hi a ningpi in vun lak khawh hi a si. Donbas chungah hin Donetsk, Luhansk le Mariupol an um. Credit: Chelsea Bawi

Be the first to comment

Leave a Reply

Your email address will not be published.


*