Russia Ralkap Thimi le Hriamnam Sunghmi a tam chinchin cang!

Russia Ralkap Thimi le Hriamnam Sunghmi a tam chinchin cang!
=======
Ukraine State TV nih catialtu nih cun Russia hi 90% tluk in kan tei lai, tiah kan i zum ko, an ti ve ko hi? France nih meng hla taktak kap kho hriamnam ngan an bawmhmi Ukraine nih an hman cang. Spain nih KM 200 a vanlawng kahnak Ukraine bawmh a timh lio asi ve.

Russia Ralkap Thimi le Hriamnam Sunghmi; Ralkap 31500 an thi cang, Tank 1393 an hrawh cang, Combat Armored Machines 3429, Miakpi 703, Rocket kahnak motor (MLRS) 213, Vanlawng kahnak 96, Vanlawng 212, Helicopters 178, Drones (UAV) 559, Cruise missiles – 125, Tilawng 13, Ralkap motors 2406, Special equipment – 53.

David Bual Hre Bialehnak:2Na catialmi mi nih an vun ka kuat i lehtlak ah ka ruat lemlo nain, tuanbia in na chim caah le vun let ko an ka ti caah na tialmi hoih in tawite in ka vun in let lai cu. Zoom hna in group ah bia vun i ruah usihlaw zapi caah thathnemnak hna aum hnga maw ka ti nai manh caan vun ka chim te mu.

1. Ukraine cu US, NATO ram 30 le Japan, S. Korea le Philippines lawng nih an tanh, vawleicung ram 100 renglo nih Ukraine an tanhlo, an dohdal na timi hi na lih asi. March 2 lio ah UN Security Council session ah ram 141 nih Russia sual an phawt (condemn), ram 35 an i langh lo, Russia tanhtu ram Belarus, Eritrea, North Kore le Syria, ram 5 lawng an si mu.

UN member hi 193 lawng an si i ram zakhat nih Ukraine an tanh lo, an dohdal na timi hi lih hmanh ah lih fangfak asi. Ukraine a tanhtu ram pawl hmanh hi anmah miaknak hmuh duh ah an tanhmi asi, na timi chinchin cu mang kong chim bantuk asi. Ukraine hriamnam le thazaang in biatak tein a dirpitu tam pawl hi ram rumrum an si i Ukraine export le import a herh lomi ram an si, Russia zinan tuhi a let tamtuk in an herh deuhmi asinain Russia hi Putin hi misual tihnung asi caah an sanction deuh mu.

2. Russia nih Ukraine Jews an tanh/dirpi na timi hi tuanbia hmasa theilo in ca pakhat or cauk pakhat na relnak in nai zumh dih colh, research na tuah lo caah na au sawhsawh. Ukraine nih covo tling tein Jews miphun an pek lio ah Ukraine thluak tha lo a rak rawnhtu cu Russia an rak si hmasa timi kha vun thei te ( ka catialmi hmasa ah tling tein ka tial cang ko khah tampi ka chim ti lai lo). Ukraine nih nihnih chung ah Jews minung 40,000 renglo an thah dih colh, na timi hi na sources pawl na vun langhter hrimhrim a herh lai link or Photo in. Vladimir Lenin hi Jewish asi le si ko hi biaalnak a tampi hmuh khawh asi ko, kha cu ka main point asi lo caah ka tial lem lai lo.

Russia Red Army khi January 28, 1918 lio dirhmi asi i kha hlan Russia ralkap pawl nih Ukraine ummi Jews miphun pawl thil fir le hramnak lehmanh an pekmi hna kong kha na theih hmasa ah atha lai, cun Jews miphun zong nih zeidah an rak palh i, zeidah misinformation pawl Kap hnih kar ah aum timi kha dothlat hmasa. Tuanbia (history) timi cu cauk pakhat relnak men in le kapkhat cuanhnak men ning hngalh tuk in chim colh ding asi lo. Russia nih a rak thok timi cu thatein na dothlat ahcun na Hmuh hrimhrim lai mu.

3. Kawl Ralkap le Ukraine ralkap in KIA sakhan an kah na timi hi amak ngaingai na sources na vun kan pek te a hau lai. Cun Ukraine maw Myanmar ralkap bawmh deuh Russia timi zong kha vun dothlat te. Ukraine nih Myanmar he armed deal an tuahmi cu 2021 May thla khan an phih diam cang mu.

4. Ukraine Hi Ralhrang Bawmtu Arak Si Bal Caah Ceiseh Kan Ti Awk Asi Maw? Russia nih Ukraine a tuk hi cei pah ko seh zeicatiah Myanmar ralhrang pei hriamnam a bawmh cu, ti awk asi lai maw?. Hihi a palh taktak mi khuaruahnak asi tiah ka ruah. Ukraine cu European ah a sifak bikmi le corruption tambiknak asi, cozah duhning in zeithil hmanh hi a kal kho tuk lo ti usihlaw kan palh lai lo. Ukraine cozah bawi ngan pipi khi Russia minung an rak tamtuk thilsual le thil poi an tuah zongah an duhning in rian an tuan kho lo anmah le mah ai that viar ding phun khi an si. Nan vun fian khawhnak ding ahcun February 28 lio i Ukraine nih an i bochan taktak mi Russia he remhdaihnak caah an thlahmi delegation Denis Kireev cu Russia spy a rak si diam ko khah! Ukraine nih an thah colh ve.

Ukraine nih NATO luh a duhnak bik pakhat cu kha bantuk an ramchung i Russia misa thianhlim kha asi cuh. NATO ah a luh ahcun NATO nih hriamnam cawk le zuar kongah phunglam thatein an ngeih caah ralhrang cu hriamnam a bawm ti lo hrimhrim. Cucaah Kawl ralhrang hriamnam in a rak bawmtu asi caah ceiseh ti nak in NATO ah lut lawlaw sehlaw Myanmar ca zongah a thahnem mi asi ve cang lai kha kan ruahpi awk asi deuh rua ka ti.

Ukraine kong hi ruah le chim a herh lo kanmah kong hmanh kan chim khawhlo lio ah kan ti, a hmantukmi a lo nain a palh cikcek mi asi. Ukraine ral ruangah vawleicung pumpi ti tluk nih datsi kongah cawp le cilh in harnak kan tong colh. Company tamtuk nih Ukraine le Russia ah hram an bunhmi an phih dih i harnak tampi ton colh asi. WWII hnu in WWIII a vun naih bik caan kan phan i hi thil nihin caan donghnak a phakter kho tu dirhmun hman a phan kho dengmi thil asi caah ruah a phu, chim a tlak, i celh len a herh mi thil asi ko tiah ka ruah.

Cun Laimi a tam deuh hi thil kan theihlo tuk i thil kan theih tam deuhnak caah hi kong hi media le catialtu nih cun dongcat loin nan/kan tial awk asi ko. Amah belte kan ram kong chim le phuan belte hi cu philh hna hlah usih, kan rak hi a pakhatnak ahcun chia cio hna usih. Laimi catialtu le media tampi nih Russia nih Ukraine a tuk hi 100%100 in a palh ko nain amah lei dirhmun in cun a mawh ve lo, a timi ka hmuh len hna. Hihi a dik ngaimi a lo nain a palh taktakmi ruahnak asi.

Crimea hi autonomous pe ti cu a palh tuk hnga lo, Asinain Ukraine ram I a biapi tukmi Luhansk le Donetsk hi independence pe ti cu asi kho ti lo. Hi region hi Russian an tam caah ram dangah na chiah lai ti cu a ho fa dah duh lai? Cucu ai za rih lo i na Constitution kha na remh than lai i zeitik hmanh ah NATO ah na lut lai lo a ti rihmi cu zei he dah kan tahchun lai ti ahcun: Laipa pakhat hi zuu a rit paoh hin an nu vuak dingin an nu sualnak a kawl zungzal.

Voikhat cu zuurit buin a hung lawi i an nu sualnak a hmuh ti lo caah hi tihin a ti “ voi thum ka rel lai I kuak na zual manh lo ahcun ceilak in kan vuak lai” a ti i zeitihmanh in a zual manh lo caah cei cikcek tein a vuak! Russia zong nihhin asi kho lomi ka hal lai i a dih lai lo i ka tuk te lai ti khi ai timhmi cu asi bik ko. Nangmah le keimah hmanh hi Ukraine president si ve usihlaw Russia kan tihtuk bu ko zongah cucu asi kho lomi khi asi cu mu.

Cucaah Russia Ukraine a tuk hi mi lei he amah lei he zakhat ah zahnih in a palh I misual khuachia bantuk asi.
Zeiruang ah thla NATO le vawleicung pi nih Ukraine an tanh viar? Russia cu tam sual adi caah asi ko. Japan le German nih WWII lio i vawleicung cu a rak hrawhmi le US le UK ral bik an rak si lo maw kha? Uknak tha lo an thlak khawh i a hnu ahcun US hawikom thabik an si diam ko. Ukraine zong hi NATO ah lut citcet seh Myanmar ralhrang bawmtawntu si ti loin mipi bawmtu asi cang lai timi cu al awk a um lo.

5. Russia le Ukraine kong lawngte na tial, CNA/CDF kong vun kan hmaithlak piak deuh cang, ti hi voitam comment ah siseh, pumpak in cakuat in siseh, ka tong ngaingai. Ka si khawh tawk tein cun CDF/CNA le mipi caah thazaang peknak ka tial peng ve ko. Cun mikip nih ramchung thawngpang cu theih dih cio asi i keimah nak hmanh in nan thei deuh. International news le politics kong hi caan hman tein Laimi ah a tialmi an umlo caah zapi caah kan i thathnempi lai ruahchannak he ka vun focus deuh caah asi. CDF/CNA kong zong ka ti khawh chungin ka chim le tial kai tim peng ko. Credit: Chelsea Bawi

Be the first to comment

Leave a Reply

Your email address will not be published.


*