Salem CDF Vuichip Tlang Duty Hna Duh Herh Zalh I Aizawl A Kal Mi Hna Pawl Uniform Pakhat Cio Pu Henry Nih Laksawng A

Salem CDF vuichip tlang duty hna duh herh zalh i Aizawl a kal mi hna pawl Uniform pakhat cio Pu Henry nih laksawng a pek hna pin ah lawngtlai tiang mawtor in a thlah rih hna cun Sakop pakhat a pek rih hna.

Aizawl an um Chungah tha tein a zoh khenh rih hna Pu Henry hi kan lai Miphun Caah bia tak tein Rian a Tuan mi si Chin Ram chung kan Ralkap CDF pawng hi meithal zun 400 Le jenthawng box thawng25000 hi Cozah siannak tein a rawk rel piak cang hna.

Thil tha tuah cu a man a sung I a sung lawi tuk mi si thil tha le dawtnak cu Bawipa sin in a ra mi Zia za si ban tuk in kan chim ram caah le kan Ralkap hna caah Rian na Tuan mi cungah kan I lawm tuk Bawipa nih thlachuahnak in peh ko seh Pu Henry Sian nak tein tial mi si.

Relchap:Lawmhnak He Ra Lut

Mi zeihmanh nih lungthin nuam tein um le lunglawm tein um cu kan duh dih. Lawm te le lung nuam tein kan um khawh peng ahcun nifatin kan nun zong a nuam deuh in a hninghno peng ko lai. Sihmanhsehlaw minung cu lawmhnak ka kawl kan ti i ngaihchiatnak le lungretheihnak lawng ka hmuh ti kan chuak tawn.

Ni khat cu hawi inn ah ka leng an inn luhnak innka cungah ca an taarmi ka hmuh. “Zaangfahnak tein innchung na luh hlanah lungrawknak le lungthin nuamh lonak na ngeihmi vialte kha lengah chia ta. Cun lawmhnak he ra lut” tiah an tial.

An innchung ka vung lut i an chungkhar tein mithmai panh te le lawmhnak mithmai he an um kha ka hmuh hna. Cucaah ca an taarnak a ruang an innchungkhar ah nu bik a simi kha ka hal. Mirh buin an pa cu a zoh i nangmah nih vun chim tiah a ti. An pa nih cun, “Nangmah taarmi a si i nangmah nih na taar channak a ruang cu chim ko mu, tiah a ti.

An nu nih aa thawh i, “Ni khat cu rian ka tuannak in inn ah ka hung lawi. Kan inn cu a dot linak a si caah elektrik hlei, cawihlei, lift in kan kai tawn. Nifatin ka tum kainak a si ko nain thlalang chungah i zoh awk kaa hngal lo, kaa hmu ballo. Ni khat zanlei cu rian in ka hung lawi than i hlei ka kaipa ah ruahlopi in thlalang chungah ka muipi cu ka hmuh. Ka muipi cu hing temțuam piin le duk deldul piin a um ko. Kai zoh ah ka lau tuk i keimah le keimah hmanh sau kaa zoh ngam lo. Kaa dawh lo si, ka rianţuannak thabat si, ka mithmai chiat si, ka muihmai le ka hmur nih le thinhun ingpuan mithmai. Keimah dawh lo maw a si, thlalang that lo dek a si hnga? Fb taar ding kaa thlak caan ahcun kaa dawh ngai ko rua ka ti nain heee…

Cuticun ka lung ah a hung chuakmi cu oh…! Hi tluk mui dawh lo, muichia pi le ingpuan bu he nifatin ka rak lawi hi ka pasal le ka fale nih zeitindah an hei ka hmuh hnga i an hei tuar hnga mu. Ka mui kaa hmuh ah keimah hmanh ka lau tuk va si kaw ka chungle nih an ka zoh ah zeitindah an um hnga?Inn ka phanh paoh ah ka fale ka hei rak ka hei zaihnawh rih fawn hna. Ka pasal hi teh rian in a ra lawi fatin muihmai chiapi le ingpuan buin ra lawi ve seh law zeitindah ka hei um ve hnga i ka hei tuar ve hnga? ka ti i keimah le keimah cu bia kaa hal i ka lawi fatin ka chungle nih nunu a lawi cang tiah hmaipanh te le lunglawm thanuam tein an ka don tawn kha ka mitthlam ah an hung cuang.

Cuticun a thaizing rian ka kal laiah keimah le keimah i cawnpiaknak caah seh ka ti i hi ca ka țial i ka taarnak cu a si tiah a ti. Hi ca ka taarmi nih hin keimah lawng a ka cawnpiak si loin ka chungkhar hna zong a cawnpiak hna bantuk a si ve. Cun khuaruahhar ngai a simi cu hi ca ka taar hlan le ka taar hnu aa dang ngaingai fawn. Hi ca ka taar hnuah hin kanmah innchungkhar lawng si loin kan inn i a ra kan lengmi hawileng vialte an mithmai a panh hna i lawmhnak in an khat hna,” tiah a chim.

Minung hi a cheu khat cu rian kan tuannak ah siseh, kan lennak hmun ah siseh, pakhatkhat ruangah maw thinhunnak, ingpuannak siseh, lungrawknak kan ngeihmi le mi cungah lungtlin lonak kan ngeihmi pawl kha inn ah i lawipi, i phurh kan hmang tawn. A leng i kan thinhunnak kha inn ah i phurh riangmang i nupile le pasalle cungah maw a siloah fale cungah khin kan hmang theo tawn.

Minung hi thil pakhat te kan hmuhmi nih maw asiloah ca tlangkhat te kan relmi nih khin kan lungthin kan ruahnak a kan thlen khawh tawn. Kan lungput aa thlen ahcun kan nuncan ziaza aa thleng ve. Kan nuncan ziaza aa thlen ahcun kan sining le kan tuahsernak zong aa thleng i kan nunnak (Life) zong aa thleng fawn rih.

Minung cu kan lungput tuahsernak thalo kan thlen bakin kan thinlung ah lawmhnak a ra colh. Cucaah cun, “Zaangfahnak tein innchung na luh hlanah thinhunnak, lungrawknak le lungthin nuamh lonak na ngeihmi vialte kha lengah chia ta. Cun lawmhnak he ra lut”.

Dinnak kha a cat lomi tiva bantukin luanter camcin ko u (Amos 5:24),

Salai K. Biak Lian Thawng Hamar, Norway

Be the first to comment

Leave a Reply

Your email address will not be published.


*