Seikphyu Le Myaung Peng Kahdohnak Ah SAC Ralhrang Bawi (Bothum) Telh In A Thimi Hna!

Seikphyu Le Myaung Peng Kahdohnak Ah SAC Ralhrang Bawi (Bothum) Telh In A Thimi Hna!
=====
Magway ramṭhen Seikphyu (ဆိပ်ဖြူ) peng Seikphyu – Saw lampi ah SAC ralhrang 7 hna cu moṭor pakhat in an kal lio ah tualchung hriamtlai phu fonh hna nih January 29 chun suimilam 11 tluk ah bomb nganmi 3 le bomb fami 2 in an puahhnawh hna caah SAC ralhrang an zaapi in an thi dih tiah theih a si.

“An umlai lo tiah an kan ruah caah a rat si lai, thla nihnih lio i kan ralbawi le kan ralkap hna caah teirul kan cham khawh. SAC ralhrang thimi pawl cu helicopter in an hel hna hnu ah moṭor pahnih in an ruak an raklak hna” tiah Seikphyu hriamtlai phu in nawlngei pakhat nih tuni ah a chim.

Sagaing ramṭhen Myaung(မြောင်) peng chung ah January 29 zinglei suimilam 5 tluk hrawng ah Kyaukyit (ကျောက်ရစ်) ralhrang palik sakhan in a rakchuak mi ralhrang pawl cu tualchung hriamtlai phu fonh nih bomb in an puahhnawh hna caah ralhrang pakhat hmunril in a thicolh hliamhma tuarmi an tam tiah theih a si.

Cuhnu ah Myaung khuapi in a kirmi SAC ralhrang pawl cu bomb in an puahhnawh ṭhan hna i ralhrang 2 hmunril in an thi. Myaung khuapi an phak hnu ah hliamhma faak tuarmi ralhrang 3 an thi ṭhan tiah tualchung hriamtlai T.G.R in nawlngei pakhat nih Khit Thit Media ah a chim.

Ayadaw Khuapi Ah SAC Ralhrang Nih Inn 100 Renglo An khangh Hnu Ah Tualchung Minung 10 An Thah Hna! Sagaing ramthen, Monywa (Mung Zua) peng Ayadaw Ta Le Ba khuapi ah SAC ralhrang nih January 28 ah khan inn 100 renglo an khangh pin ah Pastor pakhat telh in minung 10 an thah hna tiah tualchung mi nih an chim.

Januar 28 ah khan a ho ti theih lo mi ralkap an rak lut i, Pastor pakhat telh in tualchung minung 10 an thah hna. A hnu ah inn 110 renglo an khangh tiah Ta le Ba khua mi pakhat nih a chim.
Hithil cannak ah hin Ayadaw khua vengtu pakhat nih ” Pastor Ngyolawkapala (Ngiu Law Ka Pa Lah) telh in pa minung 7 le nu minung 3 cu an thah hna i, khua vengtu hna nih an RUAK cu an vui hna tiah an chim.

SAC Ralhrang Sakhan Le Palik Sakhan Hna Cu Drone In An Kah Hna Caah 9 An Thi! Sagaing ramṭhen Myinmu(မြင်းမူ) peng ah ummi SAC ralhrang sakhan le ralhrang palik sakhan hna cu PDF fonh nih Drone hmang in bomb an thlak hna caah ralhrang 9 an thi tiah Black Eagle Defence Force in chimphuannak nawlngei pakhat nih tuni ah a chim.

Tangkhawng January 22 lio ah Myinmu peng Taw Chaung-U (တောချောင်းဦး) hmunhma ram ah ummi ralhrang palik sakhan cu Drone in voi 7 tiang bomb an thlakhnawh hna caah ralhrang 3 an thi i pakhat nih hliamhma faktuk a tuar tiah theih a si.

Tangkhawng January 28 chun suimilam 4:oo tluk ah Myinmu peng Monywa – Mandalay (မုံရွာ-မန္တလေး) lamtonnak ah hmunkhuar mi SAC ralhrang pawl cu tualchung hriamtlai phu nih Drone in voi 2 bomb an thlakhnawh hna caah ralhrang 4 an thi i 2 nih hliamhma an tuar tiah theih a si.

Tangkhawng January 29 zing ah Myaing (မြောင်) lamtonnak pawng i hmunkhuar mi SAC ralhrang pawl cu Drone in voi 2 tiang bomb an thlakhnawh ṭhan hna caah ralhrang 2 an thi tiah theih a si.
Cu kahdohnak ah aa telmi hriamtlai phu hna cu Black Eagle Drone Force (Black Eagle), People’s Defence Force Myinmu-MMU PD, Myinmu Pah Kah Phah hna an si tiah an langhter.

SAC Ralhrang Bawi An Mah Le Mah Kahthahnak A Chuak! Mandalay ramṭhen Pyin Oo Lwin SAC ralhrang umnak, pehtlaihnak le electronic tinṭan (Cource) sianginn ah pahnihnak bawi simi SAC ralhrang bawi Kyaw Soe Aung cu ralhrang bawi pakhat nih meithal in a kahthah tiah theih a si.

Tangkhawng January 29, zaan ah humhimnak a la tu hna SAC ralhrang bawi hna le ralhrang palik hna cu bia a chimh dih hna hnu ah ralhrang bawi pakhat nih neih te in meithal zuun hnin in a kah caah si-inn ah an kalpi nain a nunnak an chanh kho tilo tiah theih a si.

PDF Fonh Nih Rallam Sialtu SAC Ralhrang An Kah Hna Caah 6 Leng An Thi! Sagaing ramṭhen Myinmu peng ah SAC ralhrang hmunkhuarnak hna le ralsialtu pawl hna cu PDF fonh nih an kah hna caah ralhrang 6 renglo an thi tiah People’s knight Defense Force Myinmu (PKDF-MMU) in nawlngei pakhat nih a chim.

Tangkhawng January 30 zinglei suimilam 5:10 tluk ah Sagaing in Bomingyi khua lei ah motor pakhat in thazaang chap ding in a kalmi SAC ralhrang 20 tluk hna cu bomb 4 phirh in an puahhnawh hna caah ralhrang 6 an thi tiah theih a si.

“SAC ralhrang 6 an thi, ralhrang motor he neih te in a kalmi mipi motor zong a khenchih caah kan lung a ṭha lo tuk, SAC ralhrang motor he i neihtuk kallo ding in kan in nawl hna” tiah People’s knight Defense Force Myinmu (PKDF-MMU) nih theihternak an tuah.

SAC Ralhrang Comment In Soisel Tu, Kyi Phyu Seint An Tlaih! Nu pakhat, 2022 March thla le May thla hrawng i, a facebook ah post in ka pe bal lai lo, SAC ralhrang pawl zeitluk hmanh in Mandalay khua chung ah uico bang in vak hmanhhnasehlaw tiah comment le share a rak tuah tu cu nizan SAC ralhrang nih an tlaih i, Mandalay khuapi chung SAC ralhrang palik sakhan ah an chiah.

Hithil cannak hmun hi Mandalay khuapi chung, Aung Maetharzan ah si in an tlaih mi nu min hi, Kyi Phyu Seint tiah kawh mi si. 2023 tiang zong ah ASC ralhrang nih hin tualchung mipi sualnak ngei lo thah cu chim lo zaatlang in SAC soisel tu tiang in tlaih le khihnak an kal pi peng rih. Kum 2021 February thla SAC ralhrang cozah thlak si hnu hin, SAC ralhrang nih tualchung mipi tam tuk an tlaih cang hna.

NUG Cozah Nih CDM Minung 4000 Hrawng Kan Zohkhenh Hna Lai An Ti! NUG cozah nih CDM a tuah mi hna minung 4000 hrawng hna cu kum 2022 tiang khan Kyats nuai 12000 in kan bawmh hna tiah NUG cozah nih an chim. Ei le din thil dang dang ah Minister hna tiang in kan bawmh hna tiah NUG biachimtu U, Ne Boon Lat Nih Mizzima Media a chimh. CDM mi vialte sin ah an duhthusam in kan bawm kho hna lo tiah a chim chap.

SAC ralhrang nih uknak anlak hnu rampum ah CDM tuah mi hna hi minung 185000 hrawng an si tiah NUG sin in kan theih. Office riantuan mi hi CDM ah an lut dih ngot hna, CDM ah lut lo mi an um tuk lo tiah U Ne Boon Lat nih a chim.

MP 80 Telh In NLD Party Hruaitu Minung 1232 SAC Ralhrang Cozah Nih An Hren Hna! Myanmar Military Council nih MP 80 telh in NLD party hruaitu minung 1232 an hren hna tiah NLD party hruaitu cheukhat nih January 29 ah langhternak an tuah. NLD Party i human right lei dothlattu pawl NLD-HRDT nih an chim ning cun tukum January 5 tiang ah khan sualnak ngei lo MP pahnih le NLD Party hruaitu minung 84 SAC ralhrang cozah nih an thah cangnak hna kong an chim.

Hipin ah khuasaknak inn an khangh piak mi hna 605 a um cang fawn, hilak ah MP Inn 206 le NLD party hruaitu hna inn 371 an tel chih tiah an langhter. Military council nih nawlngeihnak an lak kum 2 hnu ah hin NLD party office le thilri vialte cu SAC ralhrang nih vawi 120 an lak piak cang hna.

Kachin Ram Ah SAC Ralhrang He A Ṭangṭimi SNA Hruaitu Telh In An Tlaihmi Pawl An Langhter Hna! Kachin ramkulh Mogaung peng ah SAC ralhrang he fonh in a cawlcangmi hna SNA hriamtlai phu an hruaitu telh in minung 9 an tlaih hna tiah tualchung hriamtlai UG BLACK-K in chimphuannak nawlngei pakhat nih a chim.

A luanciami January 24 ahkhan Mogaung khuapi lai sang ah ummi SNA hruaitu U Kyaw Soe (b) Myin Myin Hlaing tiah an auhmi le chungtel cheukhat hna cu Lakhaung khua in a hnu lei ciinthlaknak hmun ah kan tleih hna tiah UG BLACK-K in nawlngei pakhat nih KNG ah fianhnak a tuah.

Hpakan Ah Vulei Cimhnak Ruang Ah Minung 4 An Nunnak Liam! Kachin ramkulh Hpakan peng Namhmaw (နမ့်မှော်) khua pawng ah vulei cimhnak a chuak i rianṭuan tu minung 4 hna an nunnak liam tiah theih a si. Tangkhawng January 30, tuzing suimilam 9:00 tluk hrawng ah Ever Company nih a rak ṭuannak hlun ah lungmansung kawlmi hna minung 4 nih an cawhnak hmun cu vulei a cimh caah an zate in an nunnak a liam tiah theih a si.

Mit hmutu pakhat nih” Minung 4 hna an rianṭuannak cung ah hin pe’ 100 renglo hrawng a sangmi vulei nih a cimh hnawh hna caah an zapi in an nunnak liam, Rakhine miphun an si i suimilam 10:00 AM renglo hnu ah an ruak an laak khawh hna” tiah Kachin News ah a chim. Credit: Lungmili Post