Sianginn kai le kai lo kongah?

Sianginn kai le kai lo kongah?
=======
Sianginn kai hi hlawknak a um lai tiah na ruah a si ahcun va kai law, na zumhlo a si ahcun va kai duh hlah, nang mah nawl. Mi hmai ka khaplo e na ti a si le va kai hlah, ka kailo ahcun keimah pei ka sungh lai cu na ti a si le va kai ko.

Atu uknak hi cu ka duhlo tuk e, na ti i kai na duh lo ahcun va kai duh hlah, a ho nih aa kan uk zongah sianginn ka kai lawngah Graduate ka si lai na ti a si le va kai ko. Atu dohthlennak a dih hlan chung ka kai lailo na ti a si le va kai duh hlah.

Sianginn na kai duh zongah,,na kai duh lo zongah sianginn cu an hun peng kolai. sianginn na dih lo zongah i rumnak ding rian cu a tampi a um bantuk in, sianginn dih hnu lawngah rumnak dingmi rian zong a tam pi ve. Graduate ka si lawngah mi thlumal ka si lai tiah i ruat hlah. sianginn na hei kaiter duhlo ruangah minih a kan ngaihsan lai tizong i ruat fon hlah.

Sianginn nakai zongah na kailo zongah, cozah le politician pawl nih cun nangmah kha an duhmi a silo in, na min list te kha an duh mi a si. sianginn na kai a si ahcun MAH nih pazeizaat an kai tiah an phuanglai i, na kailo a si ahcun NUG nih an kai mi a tlawmtuk tiah an ti velai, anmah caah cun nangmah hi cazin(list) pakhat men na si nain nangmah caah cun nangmah hi na nunnak cu a si.

Cucaah, nangmah le nangmah kha i ruat hmanh, na thluak kha hmang. sianginn cu na duh le kai, na duhlo le kai hlah.
Amahbelte thil pakhat te cu nawl kan duh, a kailo mi pawl zong sual va phaw hlah, a kai mi pawl ca zongah va ti buai hlah.

Minung kan timi cu mah le ruahnak/ zumhnak cio in khua sa mi kan si. Cucu thildik le biadik a si, i pom khawh cu naa harh tuk ko lai nain, zei kan ti hnga i pom ko.

CDF tih ruang ah sianginn ka kai ngam lo’ timi tuanbia thar a um nak hnga lo. Atu sianginn vialte khi nang le kei kan rak kai nak kha asi ko, MAH nih a thar in a sakmi asi lo. Cachimhtu zong MAH nih rian a pekmi an si lo. Cawn dingmi ca zong MAH nih a ser thar a um lo, NLD chan i an rak cawn ciomi lawngte a si ko.

Tukum ah kan nau/fa le sianginn an kai than khawh lo ahcun an vaivuan dih lai i kan miphun caah sunghnak fak bik kan ton a si te hnga. Mino sianginn kai lo nih kan miphun caah sunghnak a chuahpi ding a tam tuk. Dohthlennak a tuahtu kan unau zong nih kan ral taktak a simi uico ralkap tu khi biatak tein kan doh piak ko u, kan ral a si lomi sianginn kai khi cu kan doh piak hram hlah u tiah kan nawl ko hna.

Fimcawnnak hna nan doh tuk ahcun kan miphun harnak nan pek bantuk a si kho. ‘CDF kan tih ruang ah sianginn kan rak kai ngam lo, kan future a tlau’ tiah Lai mino tampi nih hmailei an chim te ding khi tihnung ngai a si.

Kawlrawn ah nikum thawk in sianginn an kai than dih ngawt cang. Laitlang hmanh ah peng dang cu nikum thawk in an rak kai pah dih cang; Thantlang, Hakha, Kanpalet le Mindat lawng khi an rak kai lonak peng an si. Sianginn kai hi cu a duhmi poah nih zalawng tein kai ko cang hna seh, forh zong an hau lo bantuk in thlauh le tlerh awk zong an si bak lo tiah ka ruah.