Social Media Lar Duh Tuk Rih Ding Si Lo, Kan Mah Kan Himnak Ding Tu Ruat Rih Hna Usih!

Social Media Lar Duh Tuk Rih Ding Si Lo, Kan Mah Kan Himnak Ding Tu Ruat Rih Hna Usih!
========
CNA le CDF luh hnu ah cun a si khawh chung in kan mah kan humhim nak caah kan i kilven tak tak a hau, top secret kan ngei tak tak a herh, Social media ah lar duh tuk ding zong a si rih lo,CNA le CDF na luh mi kha tu lio ah mitam pi nih an i theih hau rih lo, na chungkhat dih lak hmanh nih an i theih hau tuk lo, na nu le na pa na u nau nih an i theih ah cun a zarih ko, a ruang cu laimi tam deuh cu biathli kan i ken kho lo.

Biathli kan theih mi kha kan inn pa hna cu ka chim hna zong ah a poi lo cuh kan ti nak ah vawlei pum pi theih in a thang dih tawn, Ralkap thilthuam hruk i hmanthlak pi tuk zong hi uar tuk ding si lo, hmanthlak ah cun ral do peng mi raltuk nak ah a kal peng mi lawh tung i meithal voikhat te zong puah bal lo kha uar tuk ding a si lo, lar duh ngai i zeihmanh si lo nak sa in cun, a leng lei ah mi nih theih then lo i a chung tein rian tuan tak mi si hi a tha deuh.

Nangmah na himnak ding kha i tuak zungzal, mah caah cun Ralkap thilthuam (Uniform) le hriamnam he hman na thlak mi kha nangmah na phone chung te ah khan tha tein i fim rih ko, na hawi le na chungkhat kuat an hau tuk rih lo, Rian herh ah ralhrang umnak khuachung na luh ah cun, na phone chung i na hmanthlak vial te kha na hnawh (delete) siang lo hmanh ah na hawi le sin ah chiata ko, khuachung na hawi le hmuh ter duh ruah ah i luh pi chih hlah, Khuapi deuh ah um mi na si ah cun,

Social media facebook ti bantuk ah i tar tuk duh rih hlah, nangmah ruang ah na chung le na hawikom tiang an him lo kho men, Khuachung ah a um mi hna na hawi nu, na hawi pa nih ralkap he a pehtlai mi hmanthlak an kuat sual si ah cun leng na chuah tik ah hnawh (delete) ta philh hlah, hmanthlak ruang men i SAC ralhrang pawl nih tleih hi cu a si kho lo, an kut cung ah kan phak cang hnu ah hin cun zei tin dah a kan tuah lai ti khi ruah ngam zong a si lo, tu lio cu Social midia ah lar duhtuk nak sa cun kan mah kan him nak tu hi i ruah hmasa ko hna usih.

Chinchiah: Hmanthlak ruang men ah CDF le mipi sawh sawh ralhrang pawl nih tleih kan tawn pah lengmang caah siaherh nak te he ka tial mi a si, kei zong CDF ka um chung ah a si khawh chung in ka tuah ka tuan mi rian secret khawh ka zuam, CDF ka luh mi ka hawikom ka chungkhat ti ban tuk ka theih ter lem hna lo, a ka thei mi paakhat hnih te hmanh nih khawi lei ah dah ka um ti a kan thei lo.

Hliam ka tuar mi hmanh tuan ah kei mah ka si mi a kan thei tuk lo, tu ni tiang ah hliam ka tuar cu chim lo CDF ka luh mi hmanh a ka thei rih lo mi ka hawikom an um rih kho men, mah caah cun kan tuan mi rian tu ah tei ma tein le dinfel tein tuan ko hna usih. Credit: Salai Peter Sui Hnin

Be the first to comment

Leave a Reply

Your email address will not be published.


*