Tanghra Caminpuai Van Phi Hna Uh. Nan Awng Dih Lai

Tukum tanghra caminpuai phi uh nan awng dih lai ti a si cang. Kawl uico ralhrang pawl nih an mah uknak tang ah tanghra caminpuai phit cu an van timh cang.

March 31 in April 9 tiang khi Kawlram chung dihlak khuapi kip ah tanghra caminpuai phit ding cun timhtuahnak an ngei.

Chin ramkulh zong ralhrang Pu Ngun San Aung hruainak tanghra caminpuai cu phit ding in timhtuah a si ve cang. Chin ramkulh chung ah Thantlang, Hakha, Mindat le Kanpetlet khuapi ahcun tanghra caminpuai phit a um lai lo. Min ai pemi an um lo tiah theih a si. Chin ramkulh minung 2000 leng deuh a phi ding an si.

Pu Ngun San Aung hruaitu CDM a tuah lomi ralhrang saya te pawl nihcun siangngakchia cu phone an chawnh hna i rak phi ko uh. Nan sung lai lo nan awng dih lai an ti hna tiah theih a si.

Kawlram ah covid zawtnak ruang ah le ralhrang uknak laknak ruang ah sianginn kai zong a um ti lo. Sianginn kai lo ca cawng lo bak in caminpuai an phi ko hna lai hih.

Tukum caminpuai cu result zong a tha bak lai ti an zumh. A ruang cu ralhrang saya te pawl nihhin a phi mi poh cu an awn ter dih te hna lai tiah zumh cio a si ko.

Sinain mipi nih kan theih awk le caminpuai a phi dingmi hna nih kan theih awk cu ralhrang uknak hi a dih te lai. Mipi uknak tang ah kan um te lai. Ralhrang uknak tangah zeibantuk hmanh in tanghra va awng. D 6 zong va hmu ko. Mipi cozah a kai tikah na awnnak kha cohlan piak na si lai lo. Mipi cozah tang ah tanghra in nai thawk thiam a hai te lai timi theih bak ve ding.

Ralhrang nihcun a phung men in cozah kan tuan kho. Tanghra caminpuai zong kan tuah khawh ti kha langhter an duh ruang ah a si ko. Ralhrang tang ah cozah rian zong na tuan kho hlei lai lo.

 

Be the first to comment

Leave a Reply

Your email address will not be published.


*