Taylor Swift hi Hlasakthiam Minthang chungin Billboard Hot 100 lak i Top 10 a Dihlak in a Tingco

Taylor Swift hi Hlasakthiam Minthang chungin Billboard Hot 100 lak i Top 10 a Dihlak in a Tingco Hmasabiktu a si!
========
US Billboard 100 lak in Top 10 a dihlak in Taylor Swift nih a lak dih caah, hlasakthiam hna lakah tuanbia thar a tialtu umchun a si. 2021 September ah khan Drake nih Top 10 hla chungin 9 hi zarh khat chung a rak i hui khawh ve nain, tutan ah cun a Top 10 ningpi in Taylor nih a hmuh caah Drake a lonh, tiin Billboard nih Monday ah khan a chim.

‘Hot 100 lak i Top 10 a ningpi in maw??? Avoi 10nak ka album ah maw??? Kai zumh kho lei kho aa’ tiin kum 32 minthang pop star nih a chim. A album thar hi 13-track standard le deluxe version with 7 bonus tracks in a sermi a si i, Oct. 21 ah a chuahmi a si. Kum 7 chungah a nganbikmi a album a si. Nu hlasa vialte lakah No. 1 albums dirhmun ah a dir zungzaltu minthangbik a rak si mi Barbra Streisand he an i tluk cang, tiin Billboard nih a chim.

Billboard i No. 1 hi Anti-Hero nih a co i, a hla cu ‘It’s me/hi/I’m the problem/It’s me’ ti a si i, TikTok zong a lar ngaimi a si. A dang Top 10 hla lakah Lavender Haze, Maroon, Snow on the Beach, Midnight Rain, Bejeweled and Question…? hei ti bantuk hi an i tel.

Midnights, timi hla in Record thar tampi a tuah khawh. Tu kum chungah zarh khat chung album zuar tambik a si. Harry Styles nih a voithumnak solo album a chuahmi Harry’s House timi hla hi cuhlan ah zarh khat chungah tambik zuarmi a si nain, Taylor nih cu a lethnih tlukin a tei. Cun a Midnights hla cu kum khat chung i zarkhat chungah online in thlah tambik a si: 72.5 m tluk in a tam i, Styles nih a chuahmi hla cu 53.9m lawng a si.

Midnights hla an chuah a nikhatnak ah Global Spotify Record a tuah khawh than rih. Cun UK i No. 1 album a hmu balmi record 9 a tlinhtu Madonna zong Taylor nih a lonh cang. UK chung nu hlasa vialte lakah UK No. 1 album hi Madonna nih ai tonnenh rih ko. Mah cazin in zoh ah cun Taylor hi a pahnihnak lawng a si i, Kylie Minogue hi a pathumnak ah a um ve.

UK ah a hlawh a tling ngai ko nain, Billboard Hot 100 i a hlawhtlinnak hi a chapchuan kho ti theng lai zumh a si lo. Ed Sheeran’s 2017 album chung i hla fung 17 lakah 16 hi Top 20 chungah an i tel kho i, UK’s single chart chungah cun minung pakhat nih a sakmi thla vialte lakah a thabik top 3 hla lawng hi khumhpaik/relhpiak an si lai.

US Satellite Kah dingin Russia ai Hrocer mi nih Van Raltuknak Phung a Hneksak! Ukraine bawmhnak ah US nih a hmanmi a satellite pawl Russia nih kah dingin ai hromi nih cuhlan a um bal lo mi Space War phung thar a chuahter i, vandum chungah ai chokmi space vanlawng pawl himnak kongkau ah sihni le space sehzung pawl an lungre a thei ngaingai.

‘Russia nih lehrulh a duhbik mi cu Quasi-civilian hmun le hma hi a si dawhdang a si. Western pumpak ta le chawlehnak ah an hmanmi satellite pawl nih Ukraine an bawmhmi hi tih a nung ngaimi thil a si. Mah bantuk hin Russia hi a thin phawh ding an si lo’ tiin Russia foreign ministry senior official Konstantin Vorontsov nih UN ah a chim.
Zeibantuk ram hmanh nih an ral hna an satellite hrawhpiak, timi a um bal lo. Mah bantuk in Russia a cawlcangh a si ah cun US he an buai ngai te kho mi a si. “Mah bantuk buainak hi cuhlan ah kan tong bal hraw lo,” tiin University of Mississippi School of Law’s Air and Space Law ah co-director a si mi Michelle Hanlon nih a chim.

Mah bantuk thil hi a um kho te ding khi cu a si ko nain, a tu bantuk in biaka in a chimtu ngaingai hi cu an um bal hraw lo. Niamtein vawlei a heltu Elon Musk i a Starlink satellite network hi Ukraine ralkap nih an i rinhmi a si. Maxar hei ti bantuk a dang US company pawl nih satellite in ralram hman an thlakpiak ve, tiah theih a si.

Ukraine i khat le khat an i chonhbiaknak ah an hmanmi seh thilri a thong a sang hna hi US satellite Iridium network sinin an lakmi an si. ‘Zeibantuk a ruang a va um ko hmanh ah, space i satellite a um ko mi tla lakin ka kah lai, ti cu a phung hrim a si lo. Kan space hi ningcanglo viar in a um phah te lai,’ tiin Iridium chief Matt Desch nih Reuters ah a chim.

‘Mi pakhat nih satellite kah a thok sual ah cun, cu nih cun kan space hi hmakhat lo ah himbawm lo in a tuah colh ko lai, tiah ka ruah,’ tiin Desch nih a chim. Musk le SpaceX belte nih zei an chim rih lo. Ukraine ah ka Starlink ka hman kho ti lai lo, tiin tu thla chungah Musk nih a chim bal. Hriamnam in buainak tuah kong hei ai pehtlaimi phung ning te ah cun, Russia nih US private company ngeihmi satellite tla lak in a kah a si ah cun, US nih lehnak a tuah ding a fiang, tiin Hanlon nih a chim.

US kan inn le lo, ngeihmi thilri a dotu paoh cu lehrulh an si colh ko lai, tiin Thursday ah khan White House aiawhbiachimtu John Kirby nih a chim. “Mah hi kong i phung le phai hi a fianglo ngai. Cuhlan ah raltuk lio ah midang satellite kahpiak, timi hi tuanbia ah kan ngei bal lo. Cucaah, a zei ti i vun tawlrel ding hi kan herh ko rih,’ tiin Secure World Foundation ah space phungphai a thiammi Brian Weeden nih a chim.

Space ah hriamnam tihnungmi chia lo ding, hei ti bantuk 1967 Outer Space Treaty hi Russia nih a buar a si ne lai maw, ti hi theih a si rih lo, tiin sihni pawl nih an chim. Liability Convention of 1972 zongah Russia nih min a thut ve i, space ah a ummi ramdang thilri a hrawktu paoh cu cawiter an si lai, ti a si.

Nikum ah khan Russia nih space ah a thingmi a satellite pawl a puah hna. Ukraine a tuk hnu ah Ukraine ram nih an hmanmi satellite le internet pawl a thli in bihzoh (hack) tuah ai tim peng, tiah Western officials nih an chim.
Anti-satellite kahnak missile an sermi hrim hi Western ram le arfizohthiam pawl nih sual an phawt ngaingai. Mah hi nih hin vawlei helnak rian a hnuarsuan lai, minung million tamtuk nih an i hmanmi GPS networks zong a hnuarsuan dih ding khi a si.

2008 ah khan US, China, le India nih anti-satellite missiles an hneksak bal ve cang. Asinain SpaceX nih ai ngeihmi Starlink hi Russia nih ai hmaithlak khunmi cu a si. Starlink hei ti bantuk kan vawlei a heltu satellites tampi hna hi US nih thatein a sermi hna an si caah, fawitein cun a ningpiin voikhat lo ah hrawh khawh an si lai lo. Satellites tamtuk an i chawh caah a zei theng kah awk theih a fawi lo, tiin US Space Force deputy chief Lieutenant General Philip Garrant nih a chim.

Starlink network ah hin buaktlakin satellite 3,000 lenglo an um i, Russia le Ukraine hman a thlatu US satellites hi pahra lenglo an um rih. Satellite pakhat, asiloah pahnih a si loh pahra hrawng an kah khawh hmanh ah zei ti ngaingai in an riantuan a dawn kho hlei ding a si lo, tiin Weeden nih a chim. Credit: Chelsea Bawi

Be the first to comment

Leave a Reply

Your email address will not be published.


*