Thahnawnnak Atuah Ruangah US le a Hawile Cu Sanction Tuah Dingin Ready an Si!

Russia nih Bucha Mibupi Thahnawnnak Atuah Ruangah US le a Hawile Cu Sanction Tuah Dingin Ready an Si
============
“Bucha i Russia tuahsernak hi War Crime a si. Cucaah an kan tuahto tluk tein dan vun kan tatpiak hram u” tiin President Zelensky nih nawlnak a tuah hnu in, US le a ramdanghawi nih Moscow cungah phihkharnak thar tuah than dingin Wednesday ah khan timhlamhnak an ngei.

Bucha khua i sawhchih bakin mipi an kah, an thah hna nak hmanthlak le video in Western ram pawl nih an vun hmuh hnu cun, zarh 6 chung a raminnpa a luhhnawhtu Russia cung i phihkharnak vun chap hi an lung a tho chin lengmang cang, tiah theih a si. “Bucha ah mipi kan i hmaithlak hrimhrim hna lo, tehte an chuahpimi hi Western pawl an tawn chommi lawngte a si,” tiah Russia nih a chim ve.

Wednesday i phihkharnak thar tuah dingin an timhlamhnak a ruang cu Bucha i a cangmi thil vun lehrulh duh ah a si, tiah White House nih a chim. Washington, Group of Seven advanced economies le EU nih Russia banks le an officials pawl kan vun i hmaithlak hna lai i, Russia ah investment thar um lo dingin kan kham lai, tiah White House nih a chim.

EU nih ai timhlamhmi phihkharnak hi cu state member 27 nih lungtlinpi ta a hau. An lung a tlin ko ah cun, Russia meihol cawk ti lo dingin le, EU tilawng dinhnak (port) ah Russia tilawng luhter ti lo dingin an kham lai. “EU bloc nih ramdang in zinaan cawknak zong phih an timh. Cun natural gas cheuthum ah chuekhat Russia sinin a latu Europe zong nih Russia zinaan le gas cawk ti lo ruang i an ton dingmi harsatnak kong an tuaktan lio pi a si ve,” tiah EU executive Ursula von der Leyen nih a chim.

“EU kan biachahnak a thawn khawhnak dingah cun, Russia meihol hi a hmasabik in kan kham lai i, an karlak remdaihnak te he hi ral hi an donghter nakhnga kan tuan lai,” tiah German foreign minister nih a chim. “A kan kaptu Russia pawl nih an kan tuahto tluk tein a cungah phihkharnak thar vun kan tuahpiak hram ko u. A tu caan hi Western hruaitu pawl caah a biapitukmi caan a si,” tiin Tuesday i an tuahi UNSC meeting ah lungthin kekkuai bu in President Zelensky nih a duhnak a langhter.

“Russia in kan ram ah a lutmi thilri vialte hi 35% in ngunkhawi a kaiter dih lai, cun Russia sehzung he pehtlaihnak a ngeimi kan ram sehzung vialte zong Russia ah thil khua ti lo dingin kan kham dih hna lai,” tiah New Zealand nih Wednesday ah a thanh ve. “Bucha le ka dangdang i mipi cung i Russia nih thahnawnnak an tuahmi kong hmanthlak le video in kan hmuhmi hi huatthla a la in ai ningcang lo tuk lawmmam,” tiah tonghmanglo Putin cawlcanghnak he pehtlaiin New Zealand Foreign Minister Nanaia Mahuta nih a thinlinhnak a langhter.

“Russia i kan business kan ngol. A ram chuahtak kan i timh lio pi a si,” tiah US chip sertu Intel Corp nih Tuesday ah khan a chim. Western ram pawl nih phihkharnak an tuah in cun, Russia khuate Kaluga ah cun auto riantuantu a thongthong in rian an chuak, rawl man van a tawng cang ti asi.

BUCHA RUAKSUANNAK; “Bucha i khrihfabu pakhat nih thlan nganpi pakhat an cawh i, cuka ah cun a tlawmbik ruak 150 in 300 hrawng an suan,” tiah Ukraine officials nih an chim. Kan hnunglei zarh tlawmpal lio i Satellite nih hman a thlakmi ah, khua chung lampi cung i miruak phah nelnul in an rilh ko kha a lang, tiah US private company nih a chim. Ukraine nih an tawn chommi lawngte a si, tiah Russia nih an ti mi cu, cu hmanthlak mi cun a fenh dih cang.

Bucha ah cun a tlawmbik ruak 4 hi cu an lu bakah khahmi an si, pakhat le bang cu a liangleh bu in a si, tiah Reuters thawnglatu nih an chim. “A dang an thahmi an tam ngai rih. Pakhat le bang cu a mit zawn in an kah i, pakhat deuh cu thi lakin an hrem hnu ah an khangh beh,” tiah khuami hna nih an chim.

Russia nih an khua an lak hnu ah, Serhii Lahovskyi i a hngakchiat lio te i a hawipa hi kadang ah a zam i, Lahovskyi nih a hmuh tikah cun a rak thi cang. A kaa chung bak ah sawhchih in an kah, tiah theih a si. A hawipa ruak cu amah nih a vui beh. Hramh an cinnak hmun ah cun Lahovskyi le a dang nih thlan an cawh chom i, a hawipa ruak cu kawzaw (carpet) in an zual i, khur an cawhmi te ah cun an vui. “Zeiruangah hme hi saram rual nih hin ka hawi hi an kah e? Hihi Russia an si lo, khuachia an si” tiin Lahovskyi nih a chim.

RALTUKNAK HMUN AN THAWN; Ukraine hi ralkap a umlo nak ram, Nazi an umlo nak ram ah ka ser lai, timi tinhnak he Russia nih Feb. 24 in khan Ukraine a luhhnawh. Asinain, ai tinhbikmi khuapi pakhat te hmanh a lak kho lo.
“Russia nih Ukraine sual a phawtmi hi a hmanlo mi a si. A ram mipi cheuthum ah cheukhat cu a vahvaihter dih cang hna,” tiin Ukraine le Western ram pawl nih an chim.

Ukraine nih an detkhawt hna caah, Kyiv cu Russia nih an vun hlaat ngai cang. A tu hi south le east leh ah ai mer than cang. Javelin anti-armour system telh in $100 million bomh than dingin US nih lungtlinnak a tuah than cang.
Mariupol i tartahak in a ummi mipi a thong a sang hna cu tii le rawl chambau ngaiin khua an sa cang. Dominica flag ai tarmi tilawng pakhat cu Tuesday ah khan Russia nih pillakin a kah.

Hi kongah Russia thawng an hal nain a let hna lo. Mariupol chuahtak ai timmi Ukraine helicopters 2 tla lakin kan kahpiak hna, tiah Tuesday ah khan Russia nih thawng a thanh. Mariupol ah kahdohnak a um peng ko rih, tiah Ukraine lei nih an chim. Ukraine khuapi 2nak Kharkiv zong hi Russia nih an i hmaithlak ngaimi khua a si. Cuka ah cun Russia tanks 3 le hriamnaam bunhmi mawtaw 20 hrawng Ukriane ralkap nih an hrawh khawh, tiah theih a si. Credit: Chelsea Bawi

Be the first to comment

Leave a Reply

Your email address will not be published.


*