Thailand ram nih Min Aung Hlaing Ralhrang pawl cu liamter a timh cang hna!

Thailand nih SAC ralkap pawl phaisa liamter a timh hna!
=======
Kan hnung Pur (June) 30 ni ah SAC ralkap nih mizapi ralkap a kah hna nak ah an vanlawng cu Thailand ram ah a luh caah tu hi Thailand nih phaisa liam u tiah a ti hna.

Pur 30 ni ah SAC ralkap raltuknak Vanlawng MiG-29 cu Thailand ram ah a cozah theihpinak um lo in a luh caah phaisa liam ding in Thailand ramdang vuanci nih a chimh cang hna tiah the Bangkok Post nih a langhter.

“SAC ralkap lutlai hna sin ah ramdang vuanci hmang in kan ram ah siannak um loin Vanlawng an luh ter ruangah phaisa liam ding in theihternak kan tuah cang hna tiah Thailand ram a pahnihnak humvennak vuanci General Chaichan Chanmongkol (Deputy Minister) nih nizaan tihni Chiapa 8 ni ah khan a chim.

SAC ralkap nih Karen mizapi ralkap pawl cu Russia ser mi MiG-29 raltuknak Vanlawng hmang in bomb a thlak hna, cu ahcun Thailand ram ah acozah siannak um lo in a luh caah hi bantuk in Thailand nih liam ter an timhnak hi a si.

Hi bantuk in SAC ralkap nih zei poi lo tak in Thailand ram a luh tikah Thailand zong nih zoh sawh ve loin a raltuknak Vanlawng F-16 pahnih bak a thlah colh ve.

Hakha No.4 Sianginn Ah Ngakchia Pa SAC Ralkap Nih An Tlaih! Chin ramkulh, khualipi Hakha No.4 Sianginn ah ngakchia pa pakhat cu SAC ralkap nih an tlaih, tiah kan theih. SAC ralkap pawl cu nihin July 10 zanlei sml 2:30 hrawng ah No.4 sianginn ah an ra i, sianginn chung ah ngakchia pa (tangnga kai ding hrawng) cu an tlaih.

A hawile he lente an i celh i, sianginn thlalangawng an khuai sual. A hawile dang cu an zaam manh i, amah cu an tlaih, tiah Hakha ummi pakhat nih The Chin Post ah a chim. Motor pathum in an ra i, an thilri pawl cu sianginn chung ah an luhpi. Rawlchuannak belkheng hna zong aa tel. An thil an chiah dih in motor cu an kir ṭhan.

Ralkap pawl tu cu sianginn chung ah an um ko. Sianginn chungah umhmun khuar an i tim i a si ko lai, tiah a chimchap. No.4 sianginn pawng i aa chawk mi mino deuh cu an dirter hna i an phone le an cycle toolbox an chek piak hna, tiah Hakha ummi pakhat nih The Chin Post ah a chim.

Kalaymyo SaeGyi Tiva Ah Ruak Pahnih Hmuh A Si! Nizaan July 9, Kalay peng SaeGyi (ဆည်ကြီး) khua pawng SaeGyi (ဆည်ကြီး) tiva ah TaPhanEin(သဖန်းအိမ်) khuami ruak pahnih cu an ruak in hmuh an si, tiah theih a si. Nunnak liammi hna cu PyinTawU(ပျဉ်တောဦး) khuachung ah Arsa zuar in aa cawmmi nufa an si, tiah tualchung mi hna nih an chim.

Nunnak liammi nufa hna ruak ah cun an lu ah meithal kahnak hliamhma hmuh an si i, a fapa lu ah inches 4 tluk kaumi nam hliamhma zong hmuh a si, tiah an ruak chartu mibawmchantu phu nih an chim. Miruak chartu mibawmchantu phu hna nih an chim ning ah cun, “Zaanlei suimilam 5:00 hrawng ah miruak hmutu hna nih phone in thawng an kan thanh. A thi mi hna cu hmundang ah thah in an ruak an rak hlonhmi a lo, general hospital ah zohfelnak an tuah hna i nihin zinglei ah an ruak an vui hna.

An ruak pawng ah cun Ar ke, Ar chungril le nam zong hmuh a si. An phaisa bawmchung ah ummi phaisa zong laak lo in a um i, mi zei kut in an thih le zei ruangah thah an ton theih a si rih lo,” tiah an chim. Thah a tongmi nu cu kum 50 tluk hrawng a si i, a fapa cu kum 20 in 25 karlak a si lai, tiah ruah a si.

SAC Ralkap Nih Tlangzar Khua An Khangh! Chin ramkulh, Falam Peng Tlangzar khua cu nihin July 10 zanlei 1:30 hrawng ah SAC ralkap nih an khangh, tiah kan theih.

Khuami pakhat nih, “Inn 4 cu a ciam cang, inn zeizat a kangh bel kan thei kho rih lo. Zanlei sml 5:20 tiang ahhin SAC ralkap motor cu kan khua chungah an um rih. Ralkap pawl tucu ke in an kal i, Ramthlo an phan cang,” tiah The Chin Post ah a chim.

Tlangzar Khua Pawng Ah Kadohnak A Chuak! Sagaing ramṭhen, Kalay in Laitlang lei ah a rak kami SAC ralkap pawl cu Falam peng Tlangzar khua pawng ah Chin ralkap he kahdohnak a chuak, tiah kan theih. Khuami pakhat nih,”nihin July 10 zing ah ah kan khua pawng ah kahdohnak a chuak. Ralkap pawl cu kan khua an phan cang. Motor belte a phan rih lo,” tiah The Chin Post ah a chim. Credit: The Chin Post, Suimilam Media

Be the first to comment

Leave a Reply

Your email address will not be published.


*