Thantlang khua cu siivai aa telmi chemical weapon in kah an timh timi thawng a vun leng!

Thantlang khua cu siivai aa telmi chemical weapon in kah an timh timi thawng a vun leng!
==========
Tuni Mindat khuate pakhat ah vanlawng in bomb an thlak hna caah minung 2 an liam, hliamtuar an tam i, inn le lo tamlak a rawk. TT khua cu siivai aa telmi chemical weapon in kah an timh timi thawng a vun leng. Kalay in a rak kaimi le mipi ralkap karlak ah kah dohnak a faak ngai.

Cu lio ah Hakha i ralhrang bawi pawl he bia ai ruahmi Pastors le kan pale pawl vun hmuh hna ah thin a khenh. Hitluk inn le lo, biakinn a khaangmi, biaknak hrauitu zong a kan nawn piak cuahmahmi, kan mipi hna a that cuahmahmi pawl he cabuai pakhat ah thut in khua kan khaang ti lai ti cu, zaanmang bantuk asi. Nunnak a liammi hna chungkhat hmai tal an khaap ka ti.

Ramri ah buk isakin khua a sami hna le nunnak thaap in hriam a tlai cuahmahmi hna ruah ah an sia tel a rem. Bawi le nawlngei poh komh le an hmai ah kun a duhmi palak သာကူး an ti maw, mah cucu an lo ka ti.

Ralhrang Cozah phaisa hman awk ai phazo tilo i vava an tum lio ah, kan in siamremhpiak hna lai ti cu hngakchia bawkeuh hmanh nih zumh awk asilo. NewsPaper le ramdang sinah Credit ilaknak menmen ah an hman dingmi khi asi.
CDF Thantlang cachuah ka rel, ka hun uar tuk. Ka upat hringhran hna.

Hi ralhrang uknak kan tei hlan lo le kan kheelmi hmuitinh kan phak hlan tiang, kan dirhmun fek chin ko seh. Hi dohthlennak ah a lamkip in aa teltummi le; ralhmai ah a ummi kan nusal pasaltha hna upat peknak he, Ram Tinthei

Awlokchongmi Ralhrang nih Hmunhma Sersiamnak le Upa Min Hmang in Lungṭhennak An Tuah! Hakha khualipi ah a dormi Thantlang khuanu/pa, upa le biaknak hruaitu cheukhat Chin ramkulh Ralkap uknak hruaitu (SAC) nih an cozah zung ah tonnak an auh hna i, June 30 ah SAC lei upa le Thantlang khuanu/pa tonak an ngei. Ralkap SAC upa nih tonnak (meeting) ah ngeihthlem in an thuat hna, an ambush hna. Kawl ngian le Ralkap ziaza an hman.

Hi tonnak kong ah, Social Media chan a si bang, khulrang ngai in Online ah soisel colh a hun si. Asinain, zeitindah thil a can ning a si timi ṭha tein thanh chih le hlatchih nak he ṭialmi bel a tlawm deuhmi hmuh khawh a si. Tonnak hmanthlak le soiselnak bel cu Facebook cahmai ah a hun karh ngai.

Tonnak ah a telmi sin in, “Thantlang khua-uk hlun Hakha ah hrambunh mi, a um mi pakhat nih, Hakha khuasa Thantlang khua upa pakhat auh i, Zung ah tonak ngeih ding a chimh nak in a cangmi a si. Amahbel, Thantlang sersiam Ṭhannak kong a si lai le zei kong set dah caih a si lai timi an chim cia hna lo. Tulio nawlngeitu (hramhram in a va si ko zongah) nih an auhmi hna i, ‘Aw e, nawlngeitu pei an si fom cu…’ tiah hei kal deuh dawh khin theih a si.

Asinain, cucu mizapi nih buaipi tukmi a si ti lo ai. SAC he an i tong hrimhrim timi in upa tu mawhphurhter an si.
A taktak ah kan tuakchih lomi cu, Ralkap nih an ngian in an zerṭian an chuah mi a simi kong hi a si. A taktak ahcun, Mipi lung i ṭhennak ding “Divide & Rule” timi kan lungthin ṭhencheuter i, fawi deuh in uk khawhnak ding a lam an i tuahmi a si. Zeitin hmanh lem le sawmnak an tuah khawh lo caah, an zerṭian an chuah mi a si kan ti khawh.

Tutan, Meeting chung sining a theimi nih, anmah Ralkap nih cunglei i ripawt an tuah awk men khi a si ko lai dah. Zapi an phanh hnu in, Thantlang sersiam (reconstruction) ṭhannak timi catar an hun thlai chom le, PowerPoint projector in Thantlang kong caih ding a simi an hun langhter chom hnu lawng ah, Meeting ah tel ding an sawm mi hna nih an theih chom mi a si, tiah an chim.

A zei a si poah ah, cucu an khuaruah ning ah fianglanghnak (transpercy) a um lo zia a langhnak le cunglei rumro (top-down) khuaruah in an ruahnak a langh khun nak a si. Cucaah, Ralkap nih Thantlang upa cheukhat hramhram siloah ngaihthlem in an thuat hna, an ambush hna i, anmah hlawknak caah an hman hna lawng silo in, kanmah mipi karlak ah thinlung thennak an tuah duh caah a si. Cucu, awlokchong le vansang in an umnak a ruang ah a si. Chin ramkulh cu an uk khawh lo le pen khawh lo khi vawleipi nih theih a si ko. Cucaah, ASEAN AHA Center nih tawlrel in bawmhnak pek dingmi Ralkap nih a tlaktlak dingmi zong Chin ramkulh cu an pek ngam lo caah, telh lo a si. Cucu, Chin ramkulh kanmah tein kan dirnak a langhnak a si.

Chin ramkulh SAC nih an rianṭuannak, an meeting lio hmanthlak Online ah an thlah bal lo khan a si. Tutan ah, Chin ramkulh cozah tang ah ummi thawngzamhnak (pian-cia-zi) nih anmah cathanhnak Facebook Page hmang lo in, a chung rianṭuan mi nih, a deu in a thar an ser mi “We Love Chin State” ah hmanthlak cu ṭha tein an langhter dihmi hmuh a si.

Cucaah, timh ciammam tein an tuahmi a si tiah kan ti khawh le ruahdamh khawh a si. Cucaah, kanmah le kanmah karlak ah soiselnak hi hrial deuh in, Ralkap SAC a thluak a simi hi kan fian ah a ṭha. A cunglei ah ripawt ding men le vawleipi hmai ah a herh ning bang, Thianchehnak ah an hman ding mi phun a si zong ruah chih a hau fawn.

Mahbel, thil pakhat a um ve mi cu, Ralkap nih an uknak a nun khawhnak hnga ding caah ukkhawh (control), daihter (stable) le ṭuanchuah (implement) timi a dotdot a bawmtu a simi thil ah cun, mizapi lei nih ralrin le fimkhur a hau ve hringhran.

Tutan ah, mizapi (netizen) nih social media cahmai ah, mah le mah karlak ah theihthiam lonak le soiselnak silo in, Ralkap nih kan thinlung an kan ṭhencheu duhmi a si timi i fian in, hmailei ralrinnak tu ah hman ah a ṭha ding mi a si.

Thantlang Dirh Ṭhan Kongah Ramkulh SAC Cozah Le Thantlang Khuanu Khuapa Meeting An Tuah. Pur (June) 30, 2022, cawn ninga ni ah Hakha khuapi ramkulh cozah meeting hall ah Thantlang dirh ṭhannak kong meeting an tuah i Chin ramkulh SAC CM Pu Ngun San Aung nih a telpi hna. Pu Ngun San Aung nih cun biahmaiṭhi a chim hnuah atu i an tuah liomi meeting cu Thantlang dirh ṭhannak ding kong a sinak, meeting a kaimi ramkulh zungkip ṭuanvo ngeitu hna zong nih Thantlang hi a hlan bantukin a si khawh nakhnga chimrel cio ding.

Cun meeting ah aa telmi Thantlang khuanu khuapa le Biaknak lei upa hna zong nih Thantlang dirhmun le dirh ṭhannak ah a herhmi zalong tein chuahpi cio ding, a bik in ralzam hna Hakha i ṭhialkamnak kongkau ah ruahnak chim ding, cuti ralzam ṭhialkamnak ah harnak a um ahcun mawṭaw timhtuah piak an si lainak kong le Thantlang dirh ṭhannak kongah a biapi bikmi cu i zumhnak a si caah pakhat le pakhat cungah zumhnak ngeih a herhnak kong a chim.

Cu hnuah North Western Command i Deputy Commander Brigader General Myo Htut Hlaing nih Thantlang kahdohnak ruangah ralzam in a ummi hna an umnak hmunhma ah chiah ṭhannak le Thantlang khuapi a daih khawhnak dingah khuanu khuapa le Biaknak lei hruaitu hna i bawm in rianṭuanṭi a herhnak kong a chim ve.

Cu khawh cun ramri runvennak vuanci Brigader General Han Win Aung le ramkulh cozah chungṭuan (Secretary) U Maung Maung San nih Thantlang dirh ṭhannak rian ṭuan khawhnak dingah zungkip i ṭuanvo ngeitu hna zong nih a hlankan in timhtuahnak ngeih chung a herhnak kong an chim ve.

Cu hnuah Thantlang lei in Rev. Dr. Lal Uk, khuanu khuapa in Pu Ngun Hram, Pu Ram Khar le Pu Lawm Bik hna nih ralzam hna an tlun ṭhan khawhnak ding le Thantlang dirh ṭhannak dingah ramkulh cozah le ramkomh cozah nih kan tuahpiak seh tiah an duhmi chimrelnak an ngei ve tiah theih a si.

Meeting a kaimi ramkulh level zungkip ṭuanvo ngeitu hna nih Thantlang ṭhanchonak caah an ṭuan cangmi, an ṭuanlio mi le ṭuan an timhmi kong chimfiannak an ngeih hnuah North Western Command Deputy Commander Brigedier General Myo Htut Hlaing nih ruahnak peknak bia a chim hnuah SAC cozah Chin ramkulh CM Pu Ngun San Aung nih meeting kharnak bia a chim i an meeting cu an donghter tiah theih a si. Credit: The Chinland Post, The Chin Post

Be the first to comment

Leave a Reply

Your email address will not be published.


*