ThanTwe Thonginn Ah Kum 2 Nu Ngakchia Thong Chung Ah A Thi!

Arakan(Rakhine) ramkulh, ThanTtwe khua ah ralhrang nih tazacuai in an tlaih i thong an thlakmi Ma Ngein Eh Pyo Kyaw i a fanu Ma Shwe Yoon Ein Kum- 2 cu thonginn chung ah zahan zanṭim ah a nunnak a liam, tiah theih a si. A luancia thla thum lio ahkhan Thatwe khua ah ralhrang nih Ma Ngein Eh Phyo Kyaw tel in nu 3 an rak tlaih hna i Ma Ngein Eh Phyo Kyaw cu a fanu kum 2 hnuk ding lio a si caah ai kalpi i, an nufa in ThanTwe thonginn chung ah an um. A fanu cu zahan zaan sml 11:00 hrawng ah a nunnak liam i tuzing ah a chungkhar hna sin ah ruak rak la ding in an thanh hna.

“A hramthok ahcun ngakchia hi a pa sin ah inn ah a um ko, nain a nu sin kal a hauh peng caah a lungdamnak ah ti in a nu sin ah cun kan chiah hi a si,” tiah a chungkhar mi pakhat nih a chim. A thimi ngakchia nute Ma Shwe Yoon Ein hi a chuahka in mi ngandamlo a si i thong chung boruak a ṭhat lo caah a nunnak a liam hi a si. Zaan ah aa hngilh kho lo i a ṭap, ‘thong chung ah ṭap hlah’ tiah thong cawng nih an hro, A nu nih hla in a van thlim ah ‘thong chung ah hla sa hlah’ tiah a nu cu an hro hoi. Ngakchia cu a ruak an hlai i a hrom ah khak nih a phih caah a nunnak a liam hi a si, tiah siibawi nih a chim,” ti in a chungkhar he anmah naihniam pakhat nih a chim. A thimi hngakchia nute ruak cu Ngapali khua, Mazin khua ah nihin ah an vui lai, tiah thei a si.

Ralhrang Nih KNU Brigade 5 Chung Zanṭim Ah Vanlawng In Kah: KNU Brigade 5 hmunhma cu tuzing zinglei slm 2:00 hrawng ah ralhrang nih Jet fighter 3 bak in an kah, tiah theih a si. Ralhrang jet fighter 3 hna nihcun Dweloe peng, Nakukhi khua ah bomb lung 2, Mahtaw khuakomh, Tadwe khua ah bomb lung 2 le Ledittha khua ah bomb 2 a dihlak bomb lung 6 an thlak, tiah theih a si. Cun, tuzing ṭim arkhuang bak in ralhrang nih vanlawng in bomb a van thlak ruangah mizapi dumhau le an innkulh chung hna ah a puak nain minung tu cu hliam an um hraw lo, tiah tualchung thawngzamh Moehtaw nih a langhter

Credit: The Chin Post

Be the first to comment

Leave a Reply

Your email address will not be published.


*