Thawngpang chia: CDF-Hakha nih Senthang cachim saya 3 an tlaih hna!

Chinland Defense Force – Senthang; Siangngakchia ca chim CDM Sava tell in saya pathum tlaihnak kong he pehtlai in Cathanhnak!
========
1. Phaipha(B) khua cu mah le si khawh tawk in ralkap uknak thalo le hramhram uknak a doh ve mi khua pakhat asi. Cun Khuami hnatlaknak in 19 September 2021 ni ah khuabawi zong anmah te in an thim. Phaipha (B) khua cu Senthang ram chung a ummi asi bantuk in 29 January 2022 ni ah Senthang Tribal Government he riantuan ti dingin khuami (86) percent hnatlaknak in aa pehtlai mi khua asi.

2. Phaipha (B) khua sianginn cu khua mi nih anmah te tawirelnak in 1 July 2022 ni ah tangriat tiang on asi. Hi sianginn ah cachimtu hna cu CDMers Saya/mah le Sianghleiruun a kai liomi volunteers saya/mah minung (9) hna an si.

3. 9 October 2022 ni ah CDF-Hakha nih NUG, CIDC, CNF/A min hmang in Phaipha (B) khua sianginn cu hramhram in kan hmang cang lai tiah ralrin peknak cathanh chuah in sianginn vanpangah antar.

4. 10 October 2022 ni ah CDF-Hakha nih hramhram in Salai Sang Hlei le Pu Thang Lian Mang hna cu zanlei suimilam (03:00) pm hrawngah hi kong he pehtlai in an tlaih hna. A cung lei pahnih hna cu 11 October 2022 ni chun suimilam (12:20) pm ah an rak thlah than hna.

5. 11 October 2022 ni zanlei suimilam (12:30) pm in Siangngakchia cachim CDM saya asi mi Pu Bawi Nawl (Khuabung) le Salai David (Hakha) le Sianghleiruun a kai liomi volunteer saya Mang Hei Lian (Phaipha-B) hna cu tlaih ding in Phaipha (B) khua ah an rak phan than. Hi kong he pehtlai in CDF-Senthang le Senthung Tribal Government hruaitu upa hna nih kaphnih rualrem tein tawirelnak ngeih ti ding ah kan sawm ko hna nain CDF-Hakha nih an cohlang duh lo.

6. Can Siangngakchia cachimtu CDM saya Pu Bawi Nawl le Salai David le Sianghleiruun a kai liomi volunteer saya Mang Hei Lian hna cu zanlei suimilam (03:57) pm ah CDF-Hakha nih a konglam zeihmanh langhter lo in khua nupa le mipi hmai ah thirhreng khimh in hramhram in an tlaih hna.

7. Hi tluk in ralkap uknak thu lo le hramhram uknak kan doh lioah hramhram uknak hmangin khuami nih mah tein tuahmi sianginn cu hramhram in hman ding caah cathanh chuahmi siseh, NUG Fimchimnak zong CDM saya le volunteer saya pahnih hramhram in an tlaih hnanak cungah siseh, Pau dothlennak a tuahmi CDF-Senthang le Senthang Tribal Government nih kan cohlan khawh lo caah a herh ningin tuanvo kan lak lai. Chinland Defense Force-Senthang

Nitlak Mararam (West Maraland) a ran khawh chungin chuahtak dingin nawl a chuah! Nitlak India-Mizoram Mara (West Maraland) MADC acozah, all Mara NGOs (MTP, MSO, MCHP), Khihfabu ECM le khuathlang Mara ramkhel party vialte komhnak bu ” “East Maraland Affairs Joint Action Committee” nih 20 October 2022 hlanah CDF-Mara hruaitu hna (leaders), chungtel hna (members) le thapetu le a dirkamhtu hna (supporters) le CDF-Mara a support mi, a zeibantuk phu le bu poah, Nitlak Mararam (West Maraland) a ran khawh chungin chuahtak dingin nawl a chuah.

20 October 2022 hnu in cun, a herh ningin action kan lak lai, an ti. Hmailei Mizoram kan luh kan chuahnak tiang a dawnkham kho mi thil asi.

Lai ca in relnak: EAST MARALAND AFFAIRS JOINT ACTION COMMITTEE STATEMENT; A hmasabik ah nichuah le nitlak um Mara mizapi nan dihlak “East Maraland Affairs Joint Action Committee” min in nan kut kan in tlaih hna.

Myanmar ram buainak ah Nichuah Mara (East Maraland) mi hna ruahnak ikhah lo ruangah ram ralkapbu tiang dirh veve in Mara le Mara karah idohnak/itukthahnak a tlung kho dingmi dirhmun hi Nitlak Mara (West Maraland) mipi nih a ttha kan ti lo caah, an karah tthencheunak um loin ipumkhatnak a chuahkhawh nakhnga “East Maraland Affairs Joint Action Committee” (i.e. MTP, MSO, MCHP, MADC, ECM le Maraland All Political Parties aiawh palai dihlak) nih ati khawhnak vialte chuah in hmalaknak a hun ngeih lengmang.

EMAJAC nih Nichuah Mara phuhnih (2) karah ipumkhatnak le iremnak ding hmalaknak a kalpi cuahmah lio ahcun zei activities hmanh tuah veve rih lo dingin phu hnih ningin a nawl veve hna i, phu 2 hna zong hi a dang veve in voi 2 veve Siaha, Zyhno le Chakhei khua hnaah meeting a ngeihpi hna.

MATC/MDF nih EMAJAC nih cun a hal bantuk tein biapi ngaiin a chiah i activities vialte a ngol chung lioah CDF-Mara nih cun EMAJAC nih a halmi cu zeisawpa ah rel loin activities a ngeih lengmang tikah EMAJAC nih a poi ngaingai ati i theihthiam zong a har ngaingai, ati. CDF-Mara nih EMAJAC halmi zeirel loin a pah chihmi hrammi cheukhat hna cu:

1. EMAJAC le CDF-Mara hna Zyhno khuaah tonbiaruahnak an ngeih lioah Pu Vakhaitha, Lelaipi khua cu an tlaih- an camp ah an kalpi i kut an thlak. 2. Chakhei khuaah CDF-Mara le EMAJAC tonbiaruahnak ngeih dih hnuah, Ngaiphaipi khua, khua nupa cu CDF-Mara nih an tlaih hoi hna.

3. Cu hnuah Pu Neitlau cu an tlaih i, fakpiin kut an thlak hoi. 4. Pu Saihmo, Chapau khua cu CDF-Mara le CDF-Lautu nih Pathian Ni ah Biakinn ah aa pumh lioah an tlaih i, zapi hmaiah fakpiin kut an thlak.

5. Ngaiphaipi khuami hna nih an khua humhak kilven duhah training an ngei hna i, an khua lei an hun kirnak ah CDF-Mara nih khua lut kho lo dingin an kham hna. Cu hnuah 9th October 2022 (Pathian Ni) ah CDF-Mara le a tuantihoi hna nih Pathian Ni hmanh hmaizah loin meithal in Ngaiphaipi khuami cu an rat hnawh hna i, Mara le Mara karah ikahdohnak an chuahter.

Hi bantuk in Mara mi hna karah ipumkhatnak le iremnak hrim duh loin CDF-Mara nih miphun dang isawm in le phu dang hna he tangrual in a phunhoi Mara miphun hloh le hrawh/rawh dingah a hun rathnawh ruangah le EMAJAC nih ipumkhatnak hmalaknak a kalpi liomi ah CDF-Mara nih a duhlonak ca in theihternak a hun tuah ruangah EMAJAC nih a tanglei biachahnak hi a tuah.

1. Nichuah Mararam (East Maraland) hi EMACJAC nih inches pakhat zong a lohding a siang lo i, Mara Culture, Tradition le Religion a lohtlau ding zong a siang lo. Miphun dang/phu dang, Mara asi lomi hna nih Mararam chungah nawl an hun ngeihnak dingin maw, Marami hna karah buainak chuahter dingin maw a cawlcangmi an um ahcun Nitlak Mararam (West Maraland) mipi nih fakpiin adoh lai (a zoh sawh lai lo).

2. Duhpinak nganpi he irualremnak lampi dappi cuahmah lioah, Nitlak Mararam um mipi aiawh in a dirmi, EMAJAC hmalaknak zei rel loin a kalhmi CDF-Mara hruaitu hna (leaders), chungtel hna (members) le thapetu le a dirkamhtu hna (supporters) le CDF-Mara a support mi, a zeibantuk phu le bu nan si ah, Nitlak Mararam (West Maraland) a ummi dihlak cu, a ran khawh chungin 20th October 2022 hlanah Nitlak Mararam (West Maraland) chuahtak dingin theihter nan si.

3. 20th October 2022 hnu in cun, a herh ningin kan biachahnak hi zulhdoinak kan tuah lai i, ral hriamnam thilri kuanzen luhpinak/chuahpinak kong, phaisa lei bank transaction le chuah-luh kal-umnak kong ti bantuk vialte ah action lak lengmang asi cang lai.

4. Nichuah Mararam chungah CDF-Mara movement a ngol hlan lo le irualrelnak le ipumkhatnak lampi cungah ahun kir hlan lo chung cu, a cunglei langhtermi hi pehzulh tein kalpi le tuanchuah asi lai.

EMAJAC nih a halmi ngai duh loin, Marami le Marami, ci le phun karah idohnak a chuahmi hi Mara miphun lohtlaunak lampi kan zawhmi asi timi thei in, a tthami ram policy zong umzia a ngeih lomi theithiam in, Mara miphun ci le phun a him i, a dir chuah khawhnak ding ahcun kanmah chungah ipumkhatnak a um hmasa ding hi EMAJAC nih a duhbikmi cu asi. Credit: Rual Lian Thang

Issued by: East Maraland Affairs Joint Action Committee, Date 10th October 2022

Be the first to comment

Leave a Reply

Your email address will not be published.


*