Thawngpang Tha; Missionary Cawm A Duhmi Nan Um Maw?

Missionary Cawm A Duhmi Nan Um Maw?
=========
A Hmanthlak ka tarmi nu hi Vawlei lei sianginn a dih hnuah Company nganpi pakhat ah rian a tuanmi a si. Aa thlennak hi kum khat hrawng te lawng a si rih nain Pathian nih khuaruahhar in a nunnak ah rian a tuan caah zung kai lo caan le zung in a tin hnuah Milem a biami hna sinah heh tiah Khrih thawngtha a cawnpiak peng hna. Online in Baibal lei le Missioan lei cawnnak tampi a liim cang.

An zungah a rian a ngan bikmi changtu a si nain zalawng tein thawngtha phuan ka duh tiin a rian in chuah a timhnak kong zarhpi pumhnak ah a phuan. Cucu an zung nih an hngal rih lo nain Nizan December 27 ah khan an Company Ngeitu Boss nih Manager ah a rian a kaiter ai. An zung ah a ngan bik a si cang.

Sihmanhsehlaw chuah aa tim thiamthiam rih ko. Company ah cun vawlei mirum nih Lahkhah a ka pek i Vanlei rian ka thim deuh lai, Vanlei Mirum nih a kan cawm ko lai; rawltam tuar ko u a kan ti zongah rawl lo zongin Khrih thawngtha phuan ka thim ko a ti. Company ah cun thlahlawh ting nga hrawng an ngah hleiah a lengin an hmuh mi tampi a um rih.

Missioanry cawm a duhmi nan um ahcun amah sayama nu bantuk hi cawm awk tlak cu a si. A thlahlawh cu ting 2 tal a si a hau lai. Aa thlen hlan ah a vapa he an i then i fanu pakhat an ngei. Chungkhar ah panga a cawmtu a si.

Fundamentalism Le Liberalism An I Khah Lonak. Fubdamental timi s sullam cu ahram, ahrampi tinak a si. Rampi uknak le Cozah sernak zongah mah biafang hi hman a si. Bisknak lei i Fundamental timi a sullam cu Zumhnak Hrampi tinak a si. Pathian bia Baibal lei i chim ahcun Pathian Bia Hrampi asiloah Dirnak Hrampi tinak a si. Liberal timi a sullam cu kaupi in pom tinak a si. Fundamentalism Le Liberalism An I Khat Lonak Pawl

A. Fundamentalism; 1. Minung hi Pathian sermi kan si. (Gen. 1:27). 2. Baibal dihlak hi Pathian thawchuahhnawhmi a si. (2 Tim. 3:16). 3. Jesuh cu minung tling, Pathian tling a si. (Kol. 2:9; Joh. 1:14). 4. Evi cu Satan nih a hlen, Adam nih cun hngalh buin nawl a buar, amah ruangah vawlei ah sual a lut. (Rom. 5:12). 5. Nawlbuar/ Sual i tluk ruangah minung cu Pathian aa then mi, thatnak a ngei kho lomi le a rawk dih cikcekmi a si cang.

Liberalism; 1. Minung hi saram hmete in aa thawk i Zawng phun khat hrin kan si. 2. Baibal ah hi Pathian thawchuahhnawhmi aa tel ve. 3. Jesuh Pathian tling asinak an lunghrinh, khuaruahhar thil a tuahmi pael zawng an zum kho tuk lo. 4. Misual sual i a tluknak kongah tuanvo ngei biktu cu Satan ko, Adam ruangah a si lo. 5. Sual tluknak ah a rawk ve lomi, Pathian lawhnak a um cucu sual nih a khuh, cucu hunpiak khawh a si.

Khamhnak Kongah An I Khah Lonak; A. Fundamentalism; 6. Khamhnak conak caah minung nih a tuah awk le tuah khawhmi pakhat hmanh a ngei lo. (Gal. 2:16; Efe. 2:9; Tit. 3:5).
7. Bawi Jesuh tuah ciami zumh hi khamh conak a si. (Lam. 16:30, 31). 8. Nausem le mihrut cu an aiawh in a thi i a thothanmi Jesuh Khrih thawngin Khamh an co. (Luk. 18:15-17; Heb. 2:14,15).
9. Khamhnak cotu cu an rawk than kho tilo. (Joh. 3:16; 10:27-30).

B. Liberalism; 6. Khamhnak conak caah minung nih tuah awk le tuah khawh vemi a ngei. 7. Bawi Jesuh liim ciami cungah thiltha tuahnak in ihlawh a herh, zumhnak lawng a za lo. 8. Nausem le mihrut hna cu pastors hna nih tipil an peknak hna le nulepa Khrihfa an si nak thawngin khamh an co lai. 9. Khamhnak a co cangmi nih sualnak a tuah ahcun a lotlau kho than. Pilhnak Kongah An I Khah Lonak

A. Fundamentalism; 10. Hrinthan hnu ah tipil in awk a si. (Lam. 2:41, 8:36-38). 11. Tipil in tikah a min sining bantukin ti chungah pilh hrimhrim awk a si. Gr. “Baptizo.” (Lam. 8:38,39).

B. Liberalism; 10. Tipil cu hrinthan hlan zongah in awk asi ko. Cun khamh conak caah tuah a herh an ti an zumh fawn. 11. Ngakchiat lioah ti thlawrh a duhmi an um i tipil a ing lo hrimhrim zong an um ve hoi. Bawipa Cawnpiakmi Thlacam Kongah

A. Fundamentalism; 12. Bawipa thlacam kan timi hi Israel miphun caah a si. (Mat. 6:7-9). 13. Baibal ah aa tel lomi, “Kan cung i a sualmi kan ngaihthiam hna bantukin kan sualnak kan ngaithiam ve, ” timi hrimhrim hi a dik lo. 14. Mat. 6:12 le Luk. 11:4 Chung bia nih Leiba i ngaihthiamnak kong a chim. Hihi Israel mi nih kum 7 dan i an tuah tawnmi chimnak a si. (Deut. 15:1-10). 15. Minung nih ngaihthiam hnuah Pathian nih ngaihthiam ve ding a si caah Nawlbia tang i cawnpiaknak a si. (Mat. 6:14, 15).

16. Velngeihnak chan ahcun Pathian nih Khrih thawngin a kan ngaihthiam cang caah midang kan ngaihthiam ve hna awk asi. (Efe. 4:32; Kol. 3:13). 17. Jesuh Pa sin i a kai hnu in cun Amah min in Pa sinah hal awk tiin a kan cawnpiak. (Joh. 16:23,24). 18. Jesuh chimmi cu a zultu hna nih an zulh colh i Amah min in Pa sinah thla an cam colh. (Lam. 4:24-30). 19. Thlacam ning a thiam lomi hna caah a ningcang Jesuh nih a cawnpiakmi a si. (Mat. 6:9). 20. A bupi in chimti awk caah Jesuh nih a cawnpiak lo. 21. “Na Pennak Tlung Cang Ko Seh, ” timi hi Jesuh Siangpahrang a tuan te nak ding kum 1000 pennak a telhchih. (Biat. 20:4-6). 22. “Vancung i Pathian duhnak a tlin bantuk in vawlei i Pathian duhnak an tuah caan cu kum 1000 pennak ah a si te lai.(Jer. 31:33, 34).

B. Liberalism; 12. Bawipa thlacam cawnpiakmi hi ksnmah Jentail mi ca zawngah a si ve. 13. Khrihfabu nih a tining a si caah Baibal i aa tialning thengte a si lo zongah a poi lo. 14. Israel hna sining le Jentail hna sining an an then lo. Baibal i tialmi cipciar in an hlathlai lo. 15. Nawlbia tang i cawnpiaknak a si lo. 16. Baibal chan thennak kong i Nawlbia tang i cawniaknak a si timi hi a dik lo.

17. Zultu hna sin i a um lio a bichim le Pa sin sin a kai hnu zongah aa khat in cam awk asi ko. 18. Baibal hi duhmi hman i duh lomi hlawt awk asi hlei lo. 19. Thlacam ning cawnpiakmi asi caah hman rih ding a si ko. 20. A bupi in caam hi a tha tukmi a si ko. 21. Mah Pennak hi zumtu hna lungthin ah a phan dingmi Pathian Pennak kong chimnak a si. 22. Minung hna sinah hihi tling seh ti Pathian tinhmi/duhmi a si. Caan Donghnak Kongah

A. Fundamentalism; 23. Velngeihnak caan a dih ah minmei cung tiang Jesuh Khrih nih amah zumtu hna a rak kan don lai. (1 Thes. 4:13-17). 24. Paradise ah zumtu hna tuan man laksawng peknak le Tufa nupi thitnak a um lai. (1 Kor. 3:12-14; Biat. 19:7-9). 25. Vawlei ah Sahrang uknak a ra lai i kum 7 chung harnak a um lai. 26. Kum 7 harnak a laifang hrawngah van ah raldohnak a um lai i Micheal le a hawile hna le Satan le a hawile hna i dohnak a um lai. Micheal le a hawile nih teinak an co lai. (Biat. 12:7-12).

27. Kum 7 nak a donghnak leiah Vawleicung i tih a nung bikmi Harmagedon raldohnak nganpi nih a zulh lai. (Mat. 24:21-23; Luk. 21:25; Biat. 16:16). 28. Israel ral teipiak dingin le a pennak dirhawk ah Jesuh Khrih kha ive tlang in a rung tum lai. (Biat. 19:11-15; Dan. 2:44, 45; Zak. 14:3,4). 29. Miphun hna biaceihnak le tuu le meheh thennak a um lai. Khrih mo hna cu kan i tel ve lai lo cung leiah kan um lai. (Mat. 25:31-45). 30. Sahrang le profet deu hna cu tlaih an si lai i mei chungah thlak an si lai i Satal cu an tlaih lai i khur chungah an thlak lai i cuka ah kum 1000 chung hren a si lai. (Biat. 19:20-20:1-3).

31. Vawlei ah Jerusalem in Khrih nih a pen lai i kum 1000 chung a uk lai. (Biat. 20:4, 5). 32. Kum 1000 dih ah Satan cu chuah a si lai i Gog le Magog a hlen hna lai i mithisng hna umnak a kulhter lai. (Biat. 20:7-9). 33. Van in Pathian Mei a rung tla lai i Satan le ahawile cu a kangh hna lai i Mei Tili chingah paih an si lai. (Biat. 20:9,10). 34. Khrih a zum lomi vialte an sualning bang biaceih an si lai i Mei Tili chungah thlak thluaah an si lai. (Biat. 20:12-15). Mah biaceihnak ah Khrih zumtu kan i tel ve lai lo. 35. Thutdanhrang biaceihnak ah hin Vancungmi a sualni hna zong biaceih an si ve lai. (1 Kor. 6:3; 2 Pet. 2:4; Jud. 1:6). 36. Vawleicung huap Khrihfabu hawikomhnak WCC ah tel an duh lo.

B. Liberalism; 23. Vawlei caan dongh tikah zumtu le zumlotu Pathian nih a pumh hna lai. 24. Zumtu hna laksawng peknak le Tufa nupi thit puai a um lai an zum lo. 25. Biathlam chungbi Sahrang timi hi a um cang mi kong a si. (Nero a si an zumh). 26. Kum 7 harnak hi a dang in a um hlei an zum lo. Atu i harnak kan tuar hi asi ko an ti. 27. Tihnung Harmagedon raldohnak pi hi atu velngeihnak caan ah a um lai an ti. 28. Zumtu hna lak (Rapture) le Olive tlang in Jesuh rung tum ding hi aa khatmi a si ko. 29. Tuu le Meheh thennak ah kan i tel dih lai i Tuu kan si lai an ti. 30. Satan hi atu ah khur chungah a um cang i cuka in minung chungah a lut in zawtfahnak phunphun a chuahter tiah an ruah.

31. Kum 1000 uknak timi nih a chim duhmi cu caan saupi timi chim duhnak asi atu zongah asi lio ko an ti. 32. Kum 1000 pennak a dih hnu i Gog le Magog kong te hna pawl i a um taktak lai timi an zum lo. 33. Hihi a hnu ah a phan te lai timi an hngal lo. 34. Caan donghnak biaceihnak ah nihin zumtu zong kan i tel dih lai, hihi tuu le meheh then nak asi an ti. 35. Biaceihnak a phunphun a um an zum lo, vawkei caan dingh tikah voi khat a um an zumh. 36.WCC i tel hi Jesuh cawnpiakmi Pum Khat Sinak ah an ruah. Credit: Benjamin Khamhbawi Aung

Be the first to comment

Leave a Reply

Your email address will not be published.


*