Tha-Beik-Kyin Le Ayadaw Kahdohnak Ah SAC Ralhrang 20 Leng An Thi!
=====
Mandalay ramtthen Thabeikkyin (သပိတ်ကျင်း) pengchung meiduah tu hna SAC ralhrang thazaang zakhat (100) tluk cu December 28 zing Slm 6:00 tluk ah Mataw nganmi 4 in an kallio pi ah Bomb puahhnawh an tong ralhrang 20 hrawng an thi tiah theih a si.
“Nizaan i SAC ralhrang Bomb puah hnawhnak in a thimi 20 hrawng cu Letpankaung (လက်ပံကုန်း) khua ah an ruak an vui hna” tiah tualchung hriamtlai nih Khit Thit ah a chim. Sagaing ramtthen Ayadaw peng Telayba (သလဲဘာ) khua lei ah cycle in a kalmi pyusawhti ralhrang pawl cu December 28 chun Slm 2:30 tluk ah Bomb in an puahhnawh hna i 3 an thi 4 nih hliamhma an tuar tiah theih a si. Cu kahdohnak ah aa telmi hriamtlai phu hna cu (Zayar 7 Sagaing ARA) le (IBEX =) hna an si tiah thawngthanhnak an tuah.
SAC Ralhrang Nih Kum Upa Minung 3 Mei In An Khangh Thah Hna! Sagaing ramtthen Sagaing peng Min-Se ( မြင်းဆည်း) khua ah kum upa cangmi tar minung 3 hna cu SAC ralhrang nih mei in an khanghthah hna tiah theih a si.
December 27 le 28 ah Sagaing pengchung khuate pa 7 hna cu SAC ralhrang nih an luhhnawh hna i chungkhar thongkhat leng (1050), minung thongriat leng (8750) nih khua chuahtak in an zaam i inn tamtuk mei in an khanghpiak cang hna tiah Khit Thit Media nih a langhter. “SAC ralhrang nih kum upa tar 3 mei in an khanghthah hna mipi ralzaamnak hmun ah minung pakhat cu kiiktlaih zawtnak in a nunnak a liam” tiah tualchung mipi hna sin in theih a si.
Ralhrang Palik Bawi Mawtaw Lehsualnak In A Thi! Mon ramkulh Maw-la-myine ah ralhrang palik ‘2nd’ bawi Win Tun Nine mawtaw mawngh mi cu tiluannak hor chungah a tla i a thi colh tiah theih a si. “December 28 zaan slm9:00 tluk ah Mawlamyine (မော်လမြိုင်) ‘Ozone’ lampi tiluannak horchung ah ralhrang palik 2nd bawi mawtaw a tla i a thi colh, a ruak an lakhnu ah si-inn an kalpi a mawtaw No. cu (YGN-9I 5716) a si” tiah tualchungmi nih Khit Thit Media ah thawngthanhnak an tuah.
SAC Ralhrang Nih Mipi Minung 7 An Tlaih Hna I An Thah Hna! Mandalay ramtthen Nganzun peng Yesen (ရေဆင်း) khua cu SAC ralhang nih December 26 lio ahkhan an luhhnawh hna i tualchung minung 7 an tlaih hna hnu ah 6 an thah hna an ruak zong hmuh an silo tiah tualchungmi sin in theih a si.
“Minung 7 an tlaih hna hnu ah 6 an thah hna i pakhat cu thi he hma he a zaam, an ruak an kalpi hna i nihin tiangah hmuhkhawh an si rihlo, a tuhi ralhrang thazaang 50 tluk nih khuachung sianginn ah hmunhma an lak” tiah tualchungmi nih thah a tongmi hna min he Decem 28 Khit Thit Media ah an chim.
December 28 nihin chun Slm1:30 tluk ah SAC ralrhang nih Magway ramtthen Nat-Mauk peng Htan-Pin-Hmyaung khua cu SAC ralhrang nih an luhhnawh i meithal zuun 8 an puah caah mipi an chuak/zaam dih. Khuachung ah ummi U Zaw Win cu ralhrang nih an kahthah tiah tualchungmi sin in theih a si.
SAC Ralhrang Mawtaw Nih Nu Pakhat A Lu Sopdihlak In an Pahthah! December 28 nihin zing Slm6:00am tluk ah Yangon-Dawei mawtaw lampi Nyin Htwe khua pawng ah SAC ralhrang mawtaw 14 cu Bomb puahhnawh an ton hnu in an pawngkam i ‘Cycle’ aa ciitmi nu Pan Ei Phyu (ပန်းအိဖြူ) cu ralhrang nih a lu sopdih in an rialchih hraam caah a nunnak a liam tiah theih a si.
“Bomb voi 5 tiang a puah hnu ah meithal thawng hna zong kan theih chih, khualtlawng nu Pan Ei Phyu (kum 20) hrawng cu ralhrang nih mawtaw in an pah hram ruangah a lubik a choidih i a ‘Cycle” zong a sopdih, nule pa zong a ngeiti lo a chungkhat nih an zohkhenh mi a si’ tiah tualchungmi nih Khit Thit ah a chim.
SAC Ralhrang Nih Jet Vanlawng In Bomb A Thlak Hna Caa Hriamtlai Thimi Le Hliamtuar An Um! Shan ramkulh chaklei Laiyin (လိုင်ရင်) khua pawng ah tualchung hriamtlai phu (MNDAA) umnak hmun cu December 26 zing slm1:10am tluk ah SAC ralrhang nih Jet vanlawng hmangin Bomb a thlak hna caah minung pakhat nunnak a liam 5 nih hliamhma an tuar tiah theih a si.
“SAC ralhrang nih Su-30 Jet vanlawng hmang in MNDAA umnak hmun cu Bomb 10 a thlak caah tualchung hriamtlai minung pakhat nunnak a liam i minung 5 nih hliamhma an tuar” tiah The Kokang nih a langhter.
2022 kum November thla Namhpha (နမ့်ဖာ) tlaang kahdohnak ah SAC ralhrang tampi an thi. December 21 le 23 Monekoe (မုံးကိုး) khuapawng kahdohnak zongah ralhrang thimi an tamtuk ruangah Jet vanlawng in a kahhna tiah theih a si.
PDF Nih Ralhrang Thawngpetu (Dalan) An Kahthah! Bago ramtthen Waw (ဝေါမြို့) pengchung ah tualchung hriamtlai phu hna cawlcangh ning SAC ralrhang sin thawngpetu le mipi tangka khawlh tu hna ‘Dalan’ tlang Tin Mg Tun cu December 27 nizaan ah tualchung hriamtlai phu hna nih an kahthah tiah theih a si.
“SAC ralhrang thawngpetu zong simi mipi tangka khawl lengmang tu hna ‘Dalan’ tlang Tin Mg Tun cu Chungpa-Chaung (ကျုံပါချောင်း) khua pawngah meithal in a hnabeng ah awnglak an kah caah a thi” tiah tualchung hriamtlai phu (PDF) nih nihin ah thawngthanhnak an tuah.
SAC Ralhrang Le (NCA) Hriamtlai Phu 5 Hna Cu Tonbiaruahnak An Ngei! Naypyidaw khuapi ah SAC ralrhang le kahdaihnak ngawlmi phu 5 hna cu December 27 in 29 nitiang (nithum chung) tonbiaruahnak an ngei tiah theih a si. SAC ralhrang nih tlangcung hriamtlaiphu hna lei in 2008 phunghrampi remhthan herh mi kongah tonbiaruahnak ngeih dingin NCA phu 7 hna cu cathanh a pek hna nain phu 5 lawng nih tonnak an ngeih hna. Mon hriamtlai phu (NMSP) le Shan hriamtlai phu (RCSS/SSA) hna cu an kallo tiah theih a si.
“Phuhat cio i, si ningcang cu ka theihfiang ko” tiah ( RCSS/SSA) in ralbawi lubik nih a Facebook cahmai ah a tarlangh. Hi tonbiaruahnak ah aa telmi phu 5 hna cu – (1) Pa’O hriamtlai phu (PNLO). (2) Rakhine ram luatternak Party (ALP) in 2nd bawi Saw Mya Yazar Lin.
(3) Democratic Karen Buddhist Army (DKBA) in ralbawi ngan Saw Steel. (4) KNU/KNLA remdeihnak khuakhangtu bu in 2nd bawi Dr. Naw Ka Pao Htoo. (5) Lahu Democratic (LDU) in 2nd bawi Dr. Cia Phu (ဒုဥက္ကဌ ကျာဖူး) hna an si tiah theih a si.
Zu Rii Pa Nih A Mah Hringtu Pa Bak Namte In A Sawh! ‘Shan’ ramkulh chaklei, Theinni peng, Mongpar’ khua pawng, ‘Narmai’ khua ah a mah hringtu pa bak cu namte in a sawhthah tiah, ‘Shan’ thawnglak naak ah an langhter.
December 26, zan suimilam 5:30 pm hrawngah kum 30 tluk upa zu ri pakhat cu a nupi he bia i el lio ah hringtu pa nih a sik ruangah a pa cungah thinhung in namte in a sawh ti ah theih si.
“Zuri pa cu an nu he an i vua i a pa nih a fapa cu tlai in a kham peng. A fapa cu thinhung in namte a lak i amah hringtu pa cu vawitampi sawh in a hmun ah a nunnak liam tiah tualchung mi pakhat nih a chim.
Hringtu a pa that tu hi kum 30 upa “Saing Aung Kyaw” si i, A thah mi a pa hikum 60 upa mi si, A mah hringtu pa that tu hi hmun dang ah zam in tu tiang tlung ngam lo in a um rih. Tualchung hruaitu hna nih an kawl cuahmah lio pi si.
Hi konglam he pehtlaiin, Palik skhan ah report tuah si ko na in, tu tiang zei hmanh an cawlcanghnak um lo ruangah, Shan ralthuam keng simi SSPP/SSA nih Saing Aung Kyaw cu an kawl peng ti ah theih si. Credit: Lungmili Post
Leave a Reply