Thawngthar. …Hakha Lei In Than Tlang Ah A Van Ra Mi Ralhrang Pawl Cu CNA/CDF Nih An Phomh Hna

Thawngpang Thar, Hakha In Thantlang Lei Ah A Ra Mi SAC Ralkap Cu A Tuhi CNA Le CDF I Bawm In An Kah Cuahmah Hna.

Breaking News
Hakha le Thantlang kar ah mipi ralkap le ralhrang an i kap, tuzing ah Hakha in Thantlang lei ah ralhrang 60 hrawng ke in an kal tiah theih a si.

A tu hi bomb thawng le meithal thawng pehzulh in theih a si, kaphnih in an i kap tiah theih a si.21 The Chin Times

Relchap

Kan Ral Le Kan Ralthuam
——————————
Biabal relnak:
Efesa 6:11-12- Paul nih cun, “ Khuachia hlen thiamnak doh awkah Bawipa ralthum tling cu i ruk ko u. Kannih cu thi le sa ral kan do lo, asinain, uknak, nawlngeihnak, vawlei muihnak chung uknak le van i aummi sual thlarau hna kha kan dohmi cu an si” a ti.
Bia.13:7 ahcun, “Van in thlakmi sual thlarau, satan le a hnuzul pawl cu, “Mithiang hna kha doh i teinak nawl pek a si” tiah kan hmuh.
Kan Ral:
Vawlei ah kan rak ngabik cu “Satan nih minung hmangin satan pennak tlinter ding kha an i zuammi” a si. Cucaah kan ral cu “Adeu ” a si. Cucu Pathian minung hna nih a chan chan in an doh dih. Moses nih a doh (Exodus 3-20). Elijah nih a doh (Isiang 18:20-40). Daniel le hawile nih an doh (Daniel 1-6). Johan le bang nihcun uknak thalo hi “sahrang” ti bak ah a uh. (Bia13:5).

Khrihfa Kan Ralthuam (5):
1.Biatak Thlarau “Bia”
John8:32- Jesuh nih cun, “Biatak kha nan hngalh lai i, biatak nih an luatter hna lai”a ti. Cu biatak cu David nih, “Mithalo hna khuakhannak ah aa tel lo i misual hna lam zong a zul lo i Pathian a nihsawhmi hna sinah a thu lomi cu thluachuakmi an si(Salm1:1)” ti hi a si. Mahama Ghandhi nih “satyagraha” sullam “truth force -biatak nih um kho loin tuah or soul force -biatak thlarau nih um kho loin tuah” a ti.
Langhter duhmi cu, “Biatak dirpitu hna cu uktu hna thalo tang hirmhirm ah dirpitu le bawmtu an si bal lo” ti kha a si. Shadrak le Meshak le Abednego nih an chimmi cu, “…kan biakmi Pathian nih a kan khamh khawh ahcun, kan khamh ko seh; a kan khamh lo hmanh ah na pathian cu kan bia hlei lai lo i na phunmi milem hmai zongah cun kan kun hlei lai lo, ti kha bawipa nangmah nih hngal ko,” tiah an ti.(Daniel 2:17). Uknak tha lo cu an nawl an ngai lo. Pathian nih a umpi hna caah teinak an hmu.

2. “Chimnak” Lawng siloin “Tuahnak”:
Vawlei tuanbia zoh tikah uknak thalo cu biaknak kip nih dohnak “tuah” cio a si. Dohnak a tuahmi cu tlaih, hrem, le thongthlak a si caah luatnak dingah hmun kip ah zaam cio a si. Cu lak zongah tih sawhsawh tih, thinhan sawhsawh i “dai tein” um kan tam tuk rih.
• Adoniram Judson nih, “Pumpeknak um loin teinak a um lo”a rak chim.
• Rev.Dr. Hre Kio nih , “Adam dai tein a um kha a sual a si” a ti ve.
• Napoleon nih, “Vawlei pi hi harsatnak in a khat. Cucu mi thalomi hna ruangah siloin biaktak hngalmi nih“daite in an um ruangah a si” a ti.
• Mahatma Gandhi nih, “Ralchiat cu thil dik lo a cohlang le a ngaithiam mi hi an si” a ti ve.
• Martin Luther King nih, “Thil dik lo kha na zoh sawh ahcun nangmah kha thil dik lo lei, aa thimmi he nan i khat bak” a ti ve.
• U Tanh nih, “Dirhmun ngeilomi an tam tikah rampi a thangcho kho bal lo” a ti ve.
Cucaah “Teinak” cu khawika kan um zongah kan sining cio in “tuah le tuan” peng hi a si.

3.Ka “Tuah” Khawh Lai Ti Zumh.
Zumtu nih zeihmanh ka tuah kho lai lo ti rumro in kan i ruah ding a si lo. Phi.4:13- Paul nih, “A ka thawntertu amah thawngin zeipoah ka tuah khawh ko lai” tiah a ti. Ralph Waldo Emerson nih,“Hlawhtlinnak tawh cu ka tuah khawh ko lai timi zumhnak ngeih in aa thawk” tiah a ti.
Cucaah kan ral,satan pennak hi kan tei lai. Kan tei hrimhrim lai ti zumh a herh.

4.Lungsau Kan Herh
Teitu a simi poah lungsaumi an si. Bill Gates nih, “Lungsaunak cu teinak caah tawh fang pakhat a si” a ti. Zei rian kan tuan poah ah lungsaumi hi teitu an si peng.

5. Thlacamnak kan herh
Lamkaltu 17:28 ah “Amah chungah kan nung, kan cawl kan cang i khua kan sa” a ti bantuk in kan thinlung diklak in Pathian sinah thla kan cam hna lai. Thlacamnak hi “power” a ngei ti chim ka duh. Daniel nih thla a cam i “Nebuchanezer mang a philhmi a chim i a leh khawh”. Jonah thla a cam i ngapi pawchungin a lut. Joshua le a ralkap hna thlacamnak aunak nih, “Jericho ralhau vialte a bouh dih”. Elijah nih karmel tlang ah thla a cam i “Baal prophet 500 an thi dih. Paul le Silas thla an cam le Filipi thong in a poah dih, Thongtla bawipa a piangthar.
Chim ka duhmi cu “Thlacam” hi “power” a ngei. Joshua nih ral a doh, Moses nih Pathian pekmi thiangthunh kha a hler i, Moses cu a ban tha kha a dit tikah Aaron le Hur nih khan khattelei veve in a ban cu an dirkamh. Cucaah Joshua nih a ral cu a tei dih cikcek hna (Exodus 17:813). Teinak cu Bawipa Ta a si (Jonah 2:9) Pathian nih thluachuahnak kan pe piak ko seh.

Rev. Sang Uk Cung
GS, CBA, Kalaymyo.

 

Be the first to comment

Leave a Reply

Your email address will not be published.


*