Theih awk ah ai tlakmi Khrihfa Billionaires 5 hna!

Theih awk ah ai tlakmi Khrihfa Billionaires 5 hna
=========
Billionaire pakhat vun si hi hlawhtlinnak nganpi a si. Asinain, Khrihfa si bu in billionaire vun si khawh hi ruah awk a tam khun. Tangka hi thatlonak vialte hna i an hrampi a si, tiin Bible nih tu le tu chim a a si. Cucaah, mah cu ko nih cun Khrihfa a si ko tung i billionaire a si mi hna kong hi khua a kan ruahter khun. Mah mirum hna an sining, an ngeihmi le Khrihfa zumhnak nih zeitin dah hlawhtlinnak a pek hna ning hi a si, timi kong kan zoh hna lai:

1. David Green; Billionaires tam u nih cun inn thatha, mawtaw thatha le pumpak vanlawng an i ngeih hna lio ah David Green belte cu ruahnak phundang te ai ngeih. Hobby Lobby a dirhtu le a ngeitu a si i, vawlei cung i evangelical Khrihfa riantuannak a bawmchantu bik pa a si. Forbes nih an chim ningah, 2012 tiang i khrihfa biaknak ca i phaisa a thawh/hlutmi hi $500 million a phan cang, ti a si.

A zumhnak kongah chimthiam a tong ngaimi pa a si. “Pathian, vun zoh ko. Mah hihi nangmah ta a si ko. Mah vialte hi nangmah ta an si dih. Nan sinah kan pek than hna lai” tiin chim hi ka cawn pengmi a si, tiah Forbes he interview an tuahnak ah a chim. Kan company hi zuar ding, asiloah khar ding a si sual ah cun, ka company nih ai ngeihmi vialte chungin 90% hi Pathian rian caah ka pek dih ta lai, tiin cu interview ah cun a chim. Cun manlo tein download khawh in an chiahmi YouVersion Bible app a bawmtu zong a si.

2. Jin Sook; Jin Sook hi Forever 21 a dirtu ah ai tel ve i, a dang a dirhtu hi a innchungpa Do Won Chang a si. Hrinthannak a hmumi Khrihfa chungkhar in a thanglian mi a si i, US ka phaak ka bakin tlangpar ah ka kai i thla ka cam, tiin The Guardian ah a chim. Cu ti thla a cam lio ah cun fashion hnipuan thi dingin Pathian nih a thinlung ah bia a chim. Cu hnu cun Forever 21 nih cun an chuahmi zal ah Johan 3:16 hi a tial hna i, Pathian Bia kan karhter khawh lai i, thawngtha a chim bantuk a si lai, tiin ruahchannak he an tuah.

3. Bill Gates; Bill Gate hi theithernak tuah hau lo khing a si. Vawlei pumpi ah a rumbikmi pakhat ah ai tel. Microsoft a dirtu mirum pa Bill nih cun an non-profit foundation hmangin heh tiah miharsa bomhnak a tuah. Biaknak lei i a zumhnak hi a pumpak nun ah le a chungkhar caah le biakinn a pal mi zumtu vialte hna caah zeitluk thil biapi a si kha Relevant Magazine he interview an tuah lio ah Bill Gates nih a chim. “Pathian zumh hi sullam a ngei tuk hringhran” ti zong in a chim.

4. Mary Kay Ash; Mary Kay Ash hi Mary Kay Cosmetics a dirhtu a si i, nunau lakah cun US pumpi i rianhme (entrepreneurs) ah a hlawh a tlingbikmi a si. Rian in ai din cang ko nain, zeitin dah hlawhtinnak a hmuh khawh, timi zohpiak than hi a biapi ngaingai. $5,000 he rian ai thok. “A pakhatnak ah Pathian, pahnihnak ah chungkhar, pathumnak ah rian” ti hi a tlangtar a si. Mah hi tlangtar nih hin a rian ah karsonak a tlunter i, a nunau hawi tampi hna cu pumpak le chawlehnak kongah hlawhtlinnak tampi a hromh chin khawh hna, tiah Crosswalk nih a chim. Mary Kay nih hin a riantuannak hmunhma kipah Bible phung le lam ai hman hna i, thlachiar te a company nih a chuahmi magazine zongah Bible cacang a telh chih zungzal.

5. Stefan Persson; HleM timi vawlei cung i a larbikmi ah ai telmi hnipuan brand hi Khrihfa pakhat nih a ngeihmi a si. Stefan Persson hi Swedish mi lakah a rumbikmi a si i, Lutheran khrihfabu mi a si. Hnipuan a chuah tikah hin a designs pawl hi simple tein le zohdawh tein a tuah, cucu Lutheran tradition nih a cawnpiak ning te a si. Credit: Chelsea Bawi

Be the first to comment

Leave a Reply

Your email address will not be published.


*