Thlarau Thiang In Chinchiahmi Zümtu Nih

Thlarau Thiang in chinchiahmi zümtu nih

SUALNAK A TUAH TIKAH

“Ka nau le hna, sualnâk nan tuah nâkhnga lo, hihi nan sinah ka țial. Cun mi pakhat khat nih sualnak a tuah ahcun, Pa sinah chimpitu, a dingmi Jesuh Khrih kha kan ngei”. 1 Joh 2:1.

Hi Baibal nih fiang tein a kan chimh bangin Thlarau Thiang in hmelchunhmi zümtu (Thlarau in hrinthanmi zûmtu) nih Cathiang le Thlarau Thiang lamhtuainâk kha zul loin thisa duhnâk lei tukforhnâk tu kha a zulh ahcun thlaraulei a Pa Pathian duh lomi sualnak a tuah khawh ti hi zeitilei hmanh in thlen khawh a si lomi, zungzal in a hmunmi biatak a si.

Asinain Hrinthanmi Zümtu nih sualnak a tuah tikah khamhmi Pathian fa, van ro cotu asināk kha ai rawk dih tinâk a si hrim hrim lo.

Sualnak tuah dingah tukforhtu Khuachia nih, “Na lo cang kha, Pathian nih an duh ti lo, an hlawt cang, tiah sualnák a tuahtu lungthin le khuaruahnak ah bia a chim khawh.

Tukforhtu thiam thiam nih a hrinţhan lomi zûmtu hna hmangin “An si lai kan ti theu lo maw! sau an nguh lai lo kan ti theu lo maw! Na comi khamhnák a tlau bak cang khah! tiah nihsawh le diriam ngaiin an in ti lai.

Cucu tukforhtu Khuachia in a rami khuaruahnak le bia an si kha philh hlah. Bia. 12:10.

Asinain Cathiang nih cun “Mi pakhat khat (hihi zumtu a si) nih sualnâk a tuah ahcun, Pa sinah chimpitu, a dingmi Jesuh Khrih kha kan ngei” tiah a ti.

Na caah a nunnâk dihlak vailam ah a pe i thihnâk in thawhter a simi Jesuh Khrih cu atuah amah zûmtu nangmah ca hrim hrim ah CHIMPITU (sihni) rian tuan in Pa orhlei ah athu ko rih timi biatak na hngalh fian hitukforhtu nih a tih bik mi le a phân bik mi a si tihi philh hrim hrim hlah.

Rom dal 8 công 34 ah, “A thimi kha Khrih a si, culawng hmanh si loin, a tho than i Pathian orhlei ah um in a kan nawlpiaktu cu amah thiam thiam kha a si tiah a ti. Heb. 7:25 zong rak zoh.

Cucaah na tuahmi sualnak kha thlarau lei na Pa sinah phuang law na sihni Pa Jesuh zong nih an bomh lai i thlarau lei na Pa Pathian he nan i hawikomhnak kha tharchuah a si than lai i na khualtlawnnâk hi lei ah hin hnangam daihnak he a sunglawimi cân kha na Khamhtu Jesuh Khrih he na hmanh khawh than lai.

Zeicatiah Jesuh Khrih hi sual man zungzal thihnâk hell mei chungin an Khamtu lawng si loin ni fatin natlinlonāk le nasualpalhnak ca zong ah Sihni rian an tuanpiaktu CHIMPITU a si.

Credit: Evan Rual Uk

Be the first to comment

Leave a Reply

Your email address will not be published.


*