Trump Tanhtu pawl nih Hnahnawh an kan Pek!

“Trump Tanhtu pawl nih Hnahnawh an kan Pek,” tiin Election Officials nih Jan. 6 Capitol Buainak kong Tazacuainak ah an Chim
==========
2020 thimnak ah Trump a sunghmi cu a khupthal leh kan duh lo caah, Trump a tanhtu pawl nih hnahnawh an kan pek, innlam tiang an kan fanh, an kan hrocer, an kan volhpamh, tiah US state election officials nih Tuesday ah khan an chim.

Trump tanhtu pawl nih an chuahtermi Jan. 6, 2021 Capital hnahnawhnak a tonmi kong cu Congressional committee nih an hlathlai lio pi a si i, Arizona House of Representative speaker’s office le bang cu phone le email hmangin heh tiah rian tuan kho lo dingin Trump a tanhtu pawl nih hnahnawh an pek hna, tiah theih a si. “Email, voice mails, le texts cakuat hi 20,000 renglo kan sin a phan. Cu nih cun a kan tuaitamtuki rian hman tlai kho lo lakin an kan tuah. Phone chonh caan te hmanh kan i ngeih kho ti lo,” tiin Speaker Rusty Bowers nih US House of Representatives Select Committee sinah a chim.

Nov. 2020 thimnak ah a sungh ko mi cu cohlang duh lo riangmang in White House ah tanban a duh peng rih caah, the Republican (Trump) nih state officials pawl heh tiah pressure a pek hna. Tuesday in khan cun cu kong lei ah Committee pawl an i mer cang, tiah theih a si. Capitol luhhnawh a tonmi kong an ceihnak hi kum khat a rau cang i, tutan he cun avoi 4nak zung an chuahpi a si cang, tiah theih a si. Cu lio cu Democrat Joe Biden sin i Trump a sunghnak thawngpang Vice President Mike Pence nih Congress sinah thawng a thanh lio a si.

Trump nih kan election a khupthal leh ai timhmi hi phung he ai kalh lawng si lo in, punghman in kalpimi politics he zong ai kalhmi karhlannak a si, tiin Demoncrats lei in minung 7 le Republicans lei in minung 2 nih an sermi Committee nih fianter an duh caah a tu bantukin tazacuainak an tuah hi a si. Tuesday i an chuahpi cio mi tehte tamdeuh hi cu Trump nih election phichuak a khupthal leh a duh ruangah amah ralchanh in a dir ding a si, tiin a lunghrimhmi state electors pawl cu amah lei tang dingin a zumhmi officials in a thlen hna nak kong deuh ngawt an si.

“Capitol luhhnawh a si hlan zarh tamlak tein khan hnahnawhpek kan si diam cang. Ka inn ah duhlonak an hung langhter. Meithal ai tlaihmi mi pakhat le bang nih cun ka innpa zong a hro phah. Cun ka fanu faak ngaiin a zawt lio zongah heh tiah an kan hrocer, an kan volhpamh. 2020 election caah Trump ca i campaign a tuahtu ka si. Trump hi thim than hna seh, ti ka duh ngaingai,” tiin thir phang ngai bu tein Bowers nih a chim.

Jan. 6 i thinhungtein ai pum (bu) mi mibu hna cu Capitol lei kalhnawh dingin Trump nih a forh hna, tiah theih a si. Thimnak me (polls) in a sungh ko cang bu ah cun, Jan. 6 cu Mike Pence nih election phichuak a sining tein a thanh ding ni a si cang caah, a nehhnungbik caantha bantuk Trump nih a ruah ve i, a tu bantukin Capitol lei panh dingin a mipi a forh hna hi a si, tiah theih a si.

Trump siseh, naihniam a si mi sihni Rudy Giuliani le John Eastman he ti bantuk nih relection phichuak cohlan lo dingin an ka forh, tiah Bowers nih a chim. “Chiatserh in biakamnak ka tuah cangmi he ralchanh in riantuan nan ka fial. Ka biakam ka let kho ti lo,” tiin Bowers nih Giuliani a lehnak kong zong a chim. Election phichuak hon dingin amah Trump lila le a naihniam pawl nih state officials pawl an forh hna nak kong audio le video in Committee nih an langhter.

Lih in Chimmi Biaka; Vote he pethlaiin Trump le amah a tanhtu hna nih lih an chimnak kong Georgia Secretary of State Brad Raffensperger le Gabriel Sterling nih an langhter. Mithi cia thong tampi le kum tlinglo hngakchia nih vote an pek, ti a si. “Cu ti an chimmi cu voi 300 renglo hlathlainak kan tuah i zeihmanh ai palhmi thil kan hmu lo. Trump te nih an chimmi paoh cu pakhat hmanh bau lo tein kan hlathlaipiak hna. Kan relmi vote a zat a dik le dik lo, ti theih duh ah heh tiah saveh mei tlai (thazang chuah ngaiin) rian kan tuan,” tiin Raffensperger nih a chim.

Georgia ah Biden nih Trump a tei ruangah state election riantlaitu Wandrea ArShaye Moss cu amah Trump hrimhrim nih minchar bakin a hrocer. Cun miphun hoih in amah siseh, a nu siseh, a pi tiang in an volhpamh, an hrocer hna nak kong Committee sinah a chim. Moss cu a thin a hun tuk caah, cu ti a hrocertu hna cu taza zong a cuai phah hna, tiah theih a si.

“Hi thil nih hin ka nunnak a khupthal a leh dih,” tii Moss nih a chim. Cu ti a hrocertu hna caah inn chuahtak dingin Moss hringtu a nu Ruby Freeman cu FBI nih an chimh. “Ka himnak hmun a um in ka thei ti lo. US President pakhat nih a thlurhmi minung si zei a lawh hi nan teming bal ve cio maw? US President a si mi nih cun mi thlurh si lo in a mikip hi ai a kan awh ding khi a si. Asinain, business hmete ai ngeihmi i Pandemic a tlun lio pi ah Fulton County election tluang seh, tiin thazang a chuahmi keimah Lady Ruby cu a ka thlurh ko cu e,” tiin video in Freeman nih a chim.

December lio i Moss le Freeman nih an temtuarmi vialte kong cu Reuters nih hawihlan ah a thanh i, ‘hri thlai in thah dingin hrocer an tong, miphun huapi in nautat an tong, cun mising pipi an inn an phan,” ti a si. Jan. 2, 2021 ah khan Georgia ah buan a co khawh nakhnga za lakin vote damhkhanpiak dingin Georgia top election official Raffensperger cu Trump nih a fial. Cu kong cu thatein record an tuahmi ah a um ko. Nihin tiang hin Raffensperger hi Trump nih a soisel peng ko rih, tiah theih a si.

Republican party nih buan an co than khawhnak dingah thazang ai chuahsek mi Trump a thantu Republican House chungtel Jody Hice cu kan hnung thla ah khan Raffensperger nih thalo in tei thiamthiam, tiah theih a si. “Kai palhmi zeihmanh a um lo. Vote a tomtom in fir ruangah Biden nih buan a co le si ko” tiin Trump nih lih in sualphawtnak lam a kawl peng ko rih.

“Jan. 6 buainak kong heh tiah nan thlathlaimi hi a si kho lo mi thil nan tuahmi a si,” tiin Trump le a leitang pawl nih sual an phawt. Asinain, hi thil hi kan ram democracy a hnursuangtu thil a si caah, thatein kan hlathlai awk a si, tiin tutan tazacuainak a dirpitu nih an ti ve. Credit: Chelsea Bawi

Be the first to comment

Leave a Reply

Your email address will not be published.


*